1 Atesalonika 5 - Mawu a Mulluku

Mukhozekelle owa wa Apwiya

¹ Khonapaalleya wi nuulembelleni, asinnihu ni arokorihu, dda enthawi apaalle mallapo vineereye ddeko ddenndda.

² Vawi nyuwaano nyookha munnadduwella phaamaddene wi nllapo na Apwiya nineerophiya wonanko mullupaawiiya mahiiyu.

³ Athu yaallotaka wi, “Vookhalla murendelle navettho nookhalla vaphaama,” vano yawoononga eneerewaamorella moorurumusa! Enaaphiye moorurumusa wonanko ovoreya onamphiyera mutthiyana aamuyaraka mwaana nave athu khewora othawa.

⁴ Koma nyuwaano, asinnihu ni arokorihu khamuri mwiipiphini wi nllaponno nihuururumuseni wonanko mullupaawiiya.

⁵ Nyuwaano attheene tti athu a owala ni a otthaana. Khaniri a mahiiyu naari a epiphi.

⁶ Sika vano nihikoneke wonanko amodda ayo koma muvenyeke nave mukhalleke oowehera.

⁷ Athu enakona mahiiyu navettho enalezela mahiiyu.

⁸ Wawi hiyaano tti a otthaana, nihilezeleke. Niware echikhulupililo ni echikondi wonanko yoowara yawiitetezella ekhakadda ni etiyerello ya ovullusiwa wonanko echipewa yawiitetezella omuruni.

⁹ Mulluku khaanitthoonlle hiyaano wi nihoowena osha murima waye koma wi naakhelle ovullusiwa oyeella mwa Apwiihu Yesu Khrisitu.

¹⁰ Olliyooyo aanikhwella hiyaano wi naari niri ni okumi apaalle nikhwille niwe nikhalle akumi vamodda ni yooyo aawaaka.

¹¹ Sika mullipihaneke murima ni okaviherana wonanko mmo muneerelleenyu.

Malamulo ni mavekello

¹² Asinnihu ni arokorihu, ninuuvekani wi mwaavaheke olemu ayo enaphara mutteko variyari vanyu vawuuhoollellani ni vawuuhuddihani ettilla ya Apwiya.

¹³ Mwaavaheke yaayo olemu wunchichi ni echikondi ekaamba ya mutteko enaphariiwa. Variyari vanyu vikhalleke murendelle.

¹⁴ Asinnihu ni Arokorihu, ninuuvekani wi mwaahumullulleke athu oohipaalla ophara mutteko, mwaallipiheke murima athu awoova, mwaakavihereke athu oofooka navettho mumuvillelleke arive muthu.

¹⁵ Chenjerani wi mmodda ahimuhokolloselleke yoonanara mukhwaaye oyo amweerelle yoonanara. Koma mallapo mattheene mweeseeseke weera ddaphaama wa ookhulupilila akhwiinyu ni wa athu attheene.

¹⁶ Hakallallani mallapo mattheene.

¹⁷ Vekellani moohihiyerera.

¹⁸ Muthokozeke mu ddittheddene. Vawi nndda sika Mulluku anapaalleeye wi mweereke nyuwaano muri mu eyaattano mwa Khrisitu Yesu.

¹⁹ Muhithiimihe Munepa Waweella.

²⁰ Muhivevulleke ollotella.

²¹ Nave mweeseke ddittheddene nave mupharesese yaphaameeyo.

²² Nave muheereke erive yoonanara.

²³ Nave Mulluku amurendelle aweelliheni nyuwaano mu erive ello navettho munepaanyu, okumaanyu ni mwiillaanyu ddihikhalle ni erive yoolakwa yaawaaka Apwiya Yesu Khrisitu.

²⁴ Oyo anawiithanani aneereweera yeella kaambiiwa tti oororomelleya.

²⁵ Asinnihu ni arokorihu, munivekellelleke hiyaano.

²⁶ Muvahaneke mooni mwa echikondi ya ookhulupilila.

²⁷ Kinimuulamulani mu nnddina na Apwiya wi kalata yoolla eerengiwe wa ookhulupilila attheene.

²⁸ Echisomo ya Apwiihu Yesu Khrisitu ekhalle ni nyuwaano.