1 Atesalonika 4 - Mawu a MullukuMakhallello oomuhakallalliha Mulluku 1 Voomallihella, asinnihu ni arokorihu, mwahiiwa ovenyera wa hiyaano dda makhallello oomuhakallalliha Mulluku. Munnattakihera yaalla. Nave vano ninuuvekani mu nnddina na Apwiya Yesu wi mweereke ohiyana ni khalle. 2 Vawi munnadduwella malamulo nuuvahilleeyeni moolamuliwa ni Apwiya Yesu. 3 Mulluku anapaalla wi mukhalle aweella ni wi muhikhalle ooraruwa. 4 Arive muthu anyuwaano adduwelleke okhalla ni mwaariye mwaweella ni moolemu, 5 ohiri okhalla ni minkhella ddoonanara, wonanko oohikhulupilila ayo ehinamudduwella Mulluku. 6 Mwawi ddiidda, muheereke yoonanara apaalle omulleka mwanamunno apaalle murokoriyo. Vawi Apwiya eneerewaallaka ayo eneera yeeyo wonanko nuulleelleeyeni ni wuuchenjezani khalle. 7 Mulluku khaaniithanne wi neereke ddooraruwa koma ddaweella. 8 Sika vano, oyo anakhoota ehuddiho yeella khanamukhoota muthu koma Mulluku, oyo anuuvahani munepaaye Waweella. 9 Khonapaalleyattho wi nuulembelleni ddawaakonda akhwiinyu ookhulupilila. Nyuwaano nyookha moohuddihiwa ni Mulluku mmo munakondellaneenyu. 10 Munneera ddenndda wa asinninyu ni arokorinyu attheene mu Masedoniya muttheene. Koma ninnullipihani murima, asinnihu ni arokorihu wi mweereke ddenndda ohiyana ni khalle. 11 Mweeseeseke okhalla oomaalleya nave mullipaneke ni ddanyookhaanyu nave muphareke mutteko ni mattaanyu wonanko mmo nuulleelleeyeni khalle, 12 wi athu oohikhulupilila yuuvahekeni olemu nave wi muhimuroromelleke arive muthu va ddoopaalla ddanyu. Owa wa Apwiya 13 Asinnihu ni arokorihu, ninapaalla wi mudduwelle ddawoona dda ookhwa wi muhikhupanyeke wonanko ayo ehinna yootiyerella. 14 Vawi ninnakhulupilila wi Yesu aakhwa nave aavenyattho. Mwawi ddiiddattho ninnakhulupilila wi athu ayo yakhwille ekhulupililaka mwa yooyo, Mulluku aneerewaavenyiha nave aneerewaakusa vamodda ni Yesu wa olliye. 15 Vawi ella ninuuhuddiheehuni tti ehuddiho ya Apwiya. Hiyaano ookumi khanaahoollella ayo yakhwille, va nllapo na Apwiya. 16 Vineerokhalla okhuwa ni mawu a muullupalli a angelo, owaaka mawu a nipallapata na Mulluku nave Apwiya weekhiiwa eneerokittha ovenyera oddullu. Nave ayo yakhwille emukhulupililaka Yesu eneerovenya mwawaambeellella. 17 Vano hiyaano niri ookumi nineerotthukumanihiwa ni alliwaayo nave nineerotukhullelliwa m'miraponi wi nakumane ni Apwiya muddullu. Nave vawiddiidda nineerokhalla ni Apwiya wa enthawi yoohimalla. 18 Sika vano mullipihaneke murima ni mawu yaalla. |
The Bible in Elhomwe © The Bible Society of Malawi, 2019.
Bible Society of Malawi