Nyabusulu ya Yowane 8 - Musamu Wamubwete 2013

Kinyemu kyansaamu

¹ Ha kadziburi nde kinyemu kyansaamu, mayulu mawura lusuku, kampe mu kitinu kya kilookolo kimosi.

² Me nyamono bambasi bo nsaamu, bateleme ha busu bwa Nzaambi, na babaha mamvumvuri nsaamu.

³ Mbasi yikimi yayisa na yateleme ha dziku, na yaba yakwaata kiyokolo kya mananaasi kyawoolo. Nde bamuyakisa mananaasi malaka, mpisi heki kaha mo mu kikabu, na nsaambulu dza bobanso bangisi, ha yulu dziku dyawoolo, diri ha busu bwa mboloko.

⁴ Ha kooko kwa mbasi, mwiisi mananaasi wutoomboko ha busu bwa Nzaambi, na nsaambulu dza bangisi.

⁵ Mbasi yaholo kiyokolo kya mananaasi, waluulusa kyo mu mbaawu dziku, na watubu kyo ha butoto; manzasi, mambeembu, manseremi na ningununu butoto byasalama.

Mamvumvuri

⁶ Bambasi bo nsaamu, baba na mamvumvuri nsaamu bayirima mu kumasika.

⁷ Mbasi yatete yasika mvumvuri; bvula ya mindiingi yabvuuta na mbaawu na makila yanoko ha butoto. Kibari kya butoto kimosi mu bitatu kyanyeenge, ndaambu miti mosi mu mandaambu matatu yanyeenge, na bitiiti byobinso bya maampa byanyeenge.

⁸ Mbasi yaboolo yasika mvumvuri, kitotolo kiri bunu mulaandu wamunene wa mbaawu kikweluluka, bakituba mu mubu. Kibari kimosi mu bibari bitatu bya mubu kyakituka makila,

⁹ ndaambu mosi mu mandaambu matatu, ma bibulu byamwooyo bya mu mubu, yawa kufwa, na ndaambu mosi mu mandaambu matatu ma mabwaatu, yawa kutsyaamuka.

¹⁰ Mbasi yabatatu yasika mvumvuri, mbwetete mosi yayinene yikweluluka bunu kyufu kya mbaawu, yanangukina ku yulu, yasonoko na yabwa, ha yulu kibari kimosi mu bibari bitatu bya manyari, na mu bidzinga bya maampa.

¹¹ Mbwetete yiyo nkuumbu nkari. Kibari kimosi mu bibari bitatu bya maampa kyaba kyeki nkari, na baatu balaka bafwa mu maampa mamo, bukuri maba meki nkari.

¹² Mbasi yabana yasika mvumvuri, kibari kimosi mu bibari bitatu bya ntaangu, kibari kimosi mu bibari bitatu bya ngoondo, na kibari kimosi mu bibari bitatu bya bambwetete babiseembe, kuri heki kibari kimosi mu bibari bitatu bya byo kiba mampimbisi, na kibari kimosi mu bibari bitatu bya mwiini na bya butsuku kihele kuba kunsa buungi.

¹³ Me nyamono na nyayuka, ngo-noni yaba yooko ku nkati-yulu, yileele mu mbeembu yayinene ti: «Kyaari! Kyaari! Kyaari kuri baatu ha butoto, mu ntoono lusuku lukimi lwa mamvumvuri ma bweese kusika bambasi batatu!»