Nyabusulu ya Yowane 7 - Musamu Wamubwete 2013Baatu ba bari basa kinyemu kya Nzaambi 1 Ha mambisa haho, me nyamono bambasi bana, baba bateleme mu manto ma butoto momana, bo baba bakaanga biteembu bina bya butoto, mpisi heki kiteembu kihele kuluta ha butoto, ha yulu mubu na ha yulu muti ti mosi. 2 Na me nyamono mbasi yikimi, yaba naaka ku mpele ya este, yaba yakwaata kinyemu kya Nzaambi yamwooyo. Nde wabikisa mu mbeembu yayinene kuri bambasi bobana, ba bari baloombo mu kumonoso butoto na mubu mpasi, 3 yaleele ti: «Yaa lumonoso butoto, mubu, na miti mpasi ko, natee ku tumana kusa beetu binyemu, mu mambuunsu ma bisari bya Nzaambi yeetu.» 4 Me nyayuka lutaangu lwa babo ba basiiri binyemu: nkama na makuumi mana na mana ma mafuunda, ma ba basiiri binyemu mu mpisi kaanda dya baala ba Isaheli: 5 mu kaanda dya Yuda, mafuunda kuumi na moolo ma baatu bari basa binyemu; mu kaanda dya Lubene mafuunda kuumi na moolo; mu kaanda dya Ngada mafuunda kuumi na moolo; 6 mu kaanda dya Asere mafuunda kuumi na moolo; mu kaanda dya Nefetali mafuunda kuumi na moolo; mu kaanda dya Manase mafuunda kuumi na moolo; 7 mu kaanda dya Simehoni mafuunda kuumi na moolo; mu kaanda dya Levi mafuunda kuumi na moolo; mu kaanda dya Isakara mafuunda kuumi na moolo; 8 mu kaanda dya Dzabuloni mafuunda kuumi na moolo; mu kaanda dya Yosefi mafuunda kuumi na moolo; mu kaanda dya Benyamini mafuunda kuumi na moolo ma ba basiiri binyemu. Fundu-fundu dya baatu ha busu bwa mboloko 9 Ha mambisa haho, me nyatala na nyamono mpuumbu baatu yayinene, yiri muutu ti mosi lo wahele kubangisina kutaanga, baatu ba mansi momanso, ba bitsuumbu byobinso, ba makaanda, na ba mandiinga momanso, baba bateleme ha busu bwa mboloko, na ha busu bwa Mwaana kimeeme, baba balwaata madzweele mahembeke na bakwaata matsweenyi mu myooko. 10 Bo baba bikisaa mu mbeembu yayinene ti: «Mvuukulu yiri na Nzaambi yeetu, yadzakala ha mboloko, na yiri na Mwaana kimeeme!» 11 Bambasi bobanso baba badyengekele mboloko, binuni na bibulu byobina; bo bayilimisa mabusu maaku ha nsi, na basaambila Nzaambi, 12 baleele ti: «Amene! Kuri Nzaambi yeetu, kuba ndumusu, nkeembu, madyeele, matoondo, lukiinsu, mpinu na makwa mu bibvu ngo bibvu! Amene.» 13 Mosi mu binuni wafuula kuri me ti: «Balwaata madzweele mahembeke bamaba ba na, na kuri bafumuni?» 14 Me nyaleele kuri nde ti: «Mfumu yaami, ye yaari.» Nde waleele kuri me ti: «Bamaba ngo bamwiini mpasi dzalaka, baswaakiri madzweele maaku, na bahembikisi mo mu makila ma Mwaana kimeeme. 15 Mu didyo bo bari ha busu bwa mboloko ya Nzaambi, na bari mu kumusaambila butsuku na mwiini mu Nzo-nzaambi yaandi. Wunde wadzakala ha mboloko, sa kabafuka kunsa musaampu waandi. 16 Bo ka babweese kumono nzala ko, ka babweese kubaka mpwiisu ko, ka babweese kumono mwiini ko, na ka babweese kumono nzunuku ko, 17 bukuri Mwaana kimeeme wuri ha kakati dya mboloko, sa kabatwaalisa na sa kabanata ku bidzinga bya maampa mamwooyo, na Nzaambi sa kayaala mansangasa momanso mu miisu mya bo.» |
Nouveau Testament Beembe © Bible Society of the Republic of Congo, 2013.
Bible Society of Congo (Republic)