Nyabusulu ya Yowane 6 - Musamu Wamubwete 2013

Binyemu

¹ Me nyamono, haba dzibula Mwaana kimeeme kinyemu kyatete, mu byo nsaamu, na nyayuka kimosi mu bibulu byobina, kyaleele mu mbeembu yiri bunu nzasi ti: «Wasa!»

² Me nyamono kavaalu dyahembeke. Wunde waba wadzakala ha yulu dyo, waba wakwaata buta bwa nsyaari; nde bamuha lukoongolo, na wayende bunu muutu waluuluka, mu kweeluuluka.

³ Ha kaba dzibula nde kinyemu kyabyoolo, me nyayuka kibulu kyabyoolo kileele ti: «Wasa!»

⁴ Kavaalu dikimi dyabeenge bunu mbaawu, dyapala. Wunde waba wadzakala ha yulu dyo, bamuha makwa ma kuyisila kiyeengi ha butoto; mpisi heki baatu bekekesene bo na bo. Nde bamuha mbeesi yayila yayinene.

⁵ Ha kaba dzibula kinyemu kyabitatu, me nyayuka kibulu kyabitatu kileele ti: «Wasa!» Me nyamono kavaalu dyapiinda. Wunde waba wadzakala ha yulu dyo, waba na kipeesulu ha kooko kwaandi.

⁶ Me nyayuka bunu mbeembu, yaba palilaa ha kakati dya bibulu byobina yaleele ti: «Mutooto masaangu nkama mipata, mitooto mitatu mya bwaangala nkama mipata; ngo mu mitariri maasi na malu yaa wubibibiiyisa ko.»

⁷ Ha kaba dzibula kinyemu kyabina, me nyayuka kibulu kyabina kileele ti: «Wasa!»

⁸ Me nyamono kavaalu dya ntiinta ya maampa ma nsaka. Wunde waba wadzakala ha yulu dyo nkuumbu yaandi lufwa, na nsi ya bafwa yaba kwemunama. Baha kuri bo lutumu mu kibari kimosi, mu bibari bina bya butoto, mpisi badzusila baatu mu mbeesi yayila, mu nzala, mu lufwa na mu bibulu byansisi biri ha butoto.

⁹ Ha kaba dzibula kinyemu kyabitaanu, me nyamono ku nsuku dziku, miheebulu mya babo babakekiri mu ntoono maampu ma Nzaambi, na mu ntoono kimbaangi ki bari baleele.

¹⁰ Bo babikisa mu mbeembu yayinene ti: «Natee kya ntaangu, Mfumu yangisi na yangwanwa, ye wukiinga mu kutsuundisa bari ha butoto, na kubvutula kitete mu makila ma beetu?»

¹¹ Kuri mosi-mosi mu bo, bayakisa dzweele dyahembeke, na babaleele ti, bakiinga mu mwaa-ntaangu yantele, natee kukuka lutaangu lwa bambaasi ba bo, bari mu bunkutu, na bampaangi ba bo baba badzusu bunu bo.

¹² Ha kaba dzibula kinyemu kyabisaamunu, me nyamono, butoto bwaningina mu makwa; ntaangu yaba yeki yapiinda bunu nsaanda yapiipi; na ngoondo yoyinso yaba yeki bunu makila.

¹³ Bambwetete baba ku yulu basonoko ha butoto, bunu busononaa mungenge bimbutu byaandi byankaaka, habaanaa kiteembu kya makwa, kiri mu kumuningisa.

¹⁴ Yulu dyadziimbila bunu mukaanda wu bafutukiri, milaandu myominso na bibuma bya butoto, babiyisila mu bibeendu byaaku.

¹⁵ Bambyaasi ba butoto, baatu ba lukiinsu, bakuutu ba bayongolo, bisina, bangaa-mpinu, na bobanso bari bankutu, na baatu bari na bunsaalisi, basweeme kunsa miduku na kunsa matari ma milaandu.

¹⁶ Bo baleele kuri milaandu na kuri matari: «Bweeneenu ha yulu beetu, na tusweekeenu ha busu bwa wunde wadzakala ha yulu mboloko, na ha busu bwa nkesi dza Mwaana kimeeme,

¹⁷ bukuri, kiluumbu kyakinene kya nkesi dza bo kimwaatubuka, na wakuka mu kuteleme?»