Nyabusulu ya Yowane 15 - Musamu Wamubwete 2013

Bambasi nsaamu na biteesu nsaamu bya mpasi bya mpotulu

¹ Me nyamono kidiimbu kikimi kyakinene, na kya nkimukunu ku yulu; bambasi nsaamu baba na biteesu nsaamu bya mpasi bya mpotulu. Mu byo, nkesi dza Nzaambi dziwiila.

² Me nyamono bunu ti mubu wasaanga na mbaawu, wuri mu kuseme bunu lumweenye, babo baluulukiri mu kibulu, mu kiteki kyaandi na mu lutaangu lwa nkuumbu yaandi, baba bateleme ha yulu mubu wuri mu kuseme bunu lumweenye, bari na mangoomfi ma Nzaambi.

³ Baba yimbilaana mukuunga Moose, kisari kya Nzaambi, na mukuunga Mwaana kimeeme wuleele ti: «Mfumu Nzaambi Mwa-mpuungu, biyiriki byaaku byabinene, na bya nkimukunu! Mbyaasi ya makaanda, manzila maaku masuunguma na mari mangwanwa!

⁴ Mfumu, na wunde wuhele kubvumina ye, wuhele kudumusa nkuumbu yaaku? Bukuri ye kitsu wuri wangisi, makaanda momanso sa miisa ha busu bwaaku na sa makusaambila, bukuri nsundusulu dzaaku dzimwaamonoko.»

⁵ Ha mambisa haho, me nyamono Nzo-nzaambi ku yulu yadzibulu, mwaba musaampu wa kimbaangi,

⁶ na bambasi bo nsaamu bapala mu Nzo-nzaambi, na biteesu byo nsaamu bya mpasi, baba balwaata binkuta bya ntalu bikweseme, na misweele myawoolo mu ntulu.

⁷ Mosi mu bibulu bina waha kuri bambasi nsaamu, mambasa nsaamu mawoolo maluula mu nkesi dza Nzaambi, yiri mwooyo mu bibvu ngo bibvu.

⁸ Nzo-nzaambi yaba yaluula mu mwiisi munkeembu Nzaambi, na mu mpinu dzaandi; kuri muutu ko waba wakuka mu kukoto mu Nzo-nzaambi, natee kwawiiri biteesu byo nsaamu, bya mpasi bya bambasi bo nsaamu.