Nyabusulu ya Yowane 10 - Musamu Wamubwete 2013

Mbasi na mukaanda wantele

¹ Me nyamono mbasi yikimi, yiri na makwa yanangukina ku yulu, yasunduka, yalwaata tuti, na wuri na mungongolo ha yulu mutu waandi, busu bwaandi bunu ntaangu, na miilu myaandi bunu makuunsi ma mbaawu.

² Wakwaata mu kooko kwaandi, mwaa-mukaanda wantele wadzibulu. Wateeteke kuulu kwaandi kwa lubakala ha yulu mubu, na kwa lumoso wasuusa ha butoto.

³ Wafula musaakulu mu mbeembu yayinene bunu nkosi yiwuma. Nde bu kafula, banzasi nsaamu badzoonso.

⁴ Banzasi bo nsaamu bu badzoonso, lo me nyaba nyeki baandika kutina, ngo nyayuka mbeembu mu yulu yaleele ti: «Kebe mamo, ma leeriri banzasi bo nsaamu, na yaa tina mo ko.»

⁵ Mbasi yi nyamwiini yaba yateleme, ha yulu mubu na ha yulu butoto, yanaanguna kooko kwaandi kwa lubakala ku yulu,

⁶ yaa laba maalu mu nkuumbu ya wunde wuri mwooyo mu bibvu ngo bibvu, wayirika mayulu na byobinso biri mu mo, wayirika butoto na byobinso biri mu bwo, wayirika mubu na byobinso biri mu nde. «Ku sii ntaangu ko.

⁷ Ngo mu biluumbu bisika mbasi yansaamu mvumvuri, mpaanu dza Nzaambi sa dzayirima, bunu bu kayaabisiri dyo kuri bisari byaandi, babikiri.»

⁸ Mbeembu yi nyayukiri ku yulu, yabweese kudzoonso kuri me yaleele ti: «Yende weholo mukaanda wadzibulu, wuri ha kooko kwa mbasi yateleme, ha yulu mubu na ha yulu butoto.»

⁹ Me nyayende kuri mbasi na nyaleele kuri nde ti, ha me mukaanda wantele. Nde wandeele ti: «Holo na mudya, sa kasa midya mya ye nkari, ngo kasi mu munwa waaku sa kaba wadzuuna bunu maasi ma nyosi.»

¹⁰ Me nyaholo mukaanda wantele, mu kooko kwa mbasi, na nyamudya, waba mu munwa waami wadzuuna bunu maasi ma nyosi, na bu nyamana kumudya, midya myaami myaba myeki nkari.

¹¹ Baleele kuri me ti: «Ye yelemini kubikula lukimi mu baatu, mu makaanda, mu mandiinga na mu bambyaasi balaka.»