Mukaanda wa Yakobo 4 - Musamu Wamubwete 2013

Kinduku na nsi

¹ Kuri kukoofuminaa midziingu, na nwanusunu ha kakati dya beenu? Buri kari mu mantiilu meenu mamabi, makwenwaana munsa binamu byeenu ko?

² Beenu lukwenyiima, na lwahele kubaka, lukwedzusa, lukwesa musoki, na kalutsiitsa kutaambula ko. Lukwenwaana na lukwesa midziingu, lwahele kubaka bukuri lwaloombaa ko.

³ Beenu lukweloombo na lwahele kutaambula, bukuri luloombaa kwakubi, mu nzala kuyukutisa mantiilu meenu.

⁴ Bangaa-kimpala! Buri beenu lwahele kuyaaba ti kinduku na nsi ngo kitaatu na Nzaambi? Mpisi wunde wutiiri kuba nduku nsi, lo kitukiri mutaatu Nzaambi.

⁵ Buri beenu lutsimini ti, kwa mungengi Matinu mari mu kuleele ti: "Nzaambi tiiri mu bukwa mpeeve yi kari kasuusa mu beetu"?

⁶ Nzaambi kootuhaanaa bweese bubvuriri bunene, hango-nkuumbu diri dyaleele ti: "Nzaambi wutungukilaa bangaa-masiiku, ngo kasi wuhaanaa bweese kuri bakuluka".

⁷ Ngo tumumee kuri Nzaambi, tungukilee dyabulu, na nde sa kayitika la na beenu.

⁸ Kokosolee kuri Nzaambi, na nde sa kakokosolo kuri beenu. Swaakee myooko myeenu, beenu bangaa-masumu. Tsyeemesee mitima myeenu, beenu bangaa-maketi-keti.

⁹ Beenee mu ngebe, kotee bufwiiri na dileenu. Biseyu byeenu bikituka bufwiiri na kiminu kyeenu kikituka ngebe.

¹⁰ Kulukeenu ha busu bwa Mfumu, na nde sa kaludzaangisa.

Yaa tsuundisa mpaangi yaaku ko

¹¹ Bampaangi, yaa lwekelesene ko, wunde wusa makele mu mpaangi yaandi, bunu pe wutsuundisa mpaangi yaandi, lo wudzoonsolo bwabubi mu mangisi, na wutsuundisa mangisi; ngo mbuti ye wutsuundisa mangisi, lo ye wuri wukukisaa mangisi ko, ngo kasi mutsuundisi.

¹² Mosi kitsu wuri mukaangi-mangisi na mutsuundisi, nde wakuka mu kubvuukisa na mu kufuukisa; ngo ye na wuri mu kutsuundisa mbaasi?

Kuri babo bakwesa bitaasi

¹³ Haheki mu lumalu kuri bakweleele ti: «Lumalu bunu pe bweepari, beetu sa tweende ku bvula didyo, sa twadzakala kukwo mubvu mosi, sa twasa mumbungu, na sa twabaka ndaandu»;

¹⁴ beenu lwahele kuyaaba bubeele kidziingu kya beenu bweepari. Mukwongo, beenu luri bunu mubuungi wuri, kapalaa mu mwaa-ntaangu, ha mambisa haho dziimbiri.

¹⁵ Ha kibeendu kya kuleele ti: «Mbuti Mfumu tiiri, beetu sa twaba mwooyo, na sa twayirika mamama bunu pe mamo.»

¹⁶ Beenu mu lu, lukwesa kimweese mu masiiku meenu; mpisi kimweese kya bubwo lo kyakibi.

¹⁷ Ngo wunde wuyaari kuyirika mamabwe, kasi wahele kumayirika, lo mamo masumu kuri nde.