Mukaanda wa Yakobo 2 - Musamu Wamubwete 2013

Kuhele kusalila bubayi

¹ Bampaangi baami, yaa lusalila bubayi ko, mu kanyi di luri na dyo mu Yesu Kiristo, Mfumu yeetu ya nkeembu.

² Mukwongo, mbuti muutu mosi, walwaata lungele lwa woolo, na binkuta bikweseme, kotiri mu nzo-nkutukunu yeenu, na wamuwelu se walwaata binkuta byamviindu kotiri,

³ ngo beenu lusyeetuka kuri walwaata binkuta bikweseme lumuleeriri ti: "Ye, dzakala ha kibeendu kyakibwe ki"; na kuri muwelu lumuleeriri ti: "Ye ngo wuri teleme hamaha, bunu pe dzakala ha nkata-miilu mya me ha".

⁴ Buri haho kari nsobokoso luri mu kusa mu beenu-meene ko? Na kari lweki batsuundisi bari na mfyongokunu yayibi ko?

⁵ Bampaangi baami ba mutima, yukeenu: Buri kari Nzaambi ko wasooriri bari bawelu mu mya nsi ngo bisina mu mitariri kanyi, na bakondiri ba Kimfumu ki kari kasa lusiilulu kuri babo bamutyaanaa?

⁶ Ngo kasi beenu lwasaanini muwelu. Buri kari bisina bakookwelubamisaana, na bakookwelunataana ha mbasi ya mutsuundu ko?

⁷ Buri kari bo bakwesaana nkuumbu yayibwe, yibari balutangukina ko?

⁸ Mbuti ngwanwa beenu lukukisaa ngisi ya kimfumu bunu buri Matinu: "Tya mbaasi yaaku bunu ye-meene", haho lo luyirikaa mamabwe.

⁹ Ngo mbuti beenu luri bangaa-bubayi, lo luyirika masumu, na lufwaanaa nsoni mu mitariri mangisi, bukuri lweki basinini ba mangisi.

¹⁰ Bukuri wunde wukebaa mangisi momanso, ngo bwiiri mu ntoono mosi, lo bakimini mu momanso.

¹¹ Mukwongo, wunde waleele ti: "Yaa ta kimpala ko", waleele se ti: "Yaa dzusa ko". Ngo mbuti ye wahele kuta kimpala, kasi dzusiri, lo ye weki musinini mangisi.

¹² Mu didyo, dzoonseenu na salileenu, bunu beenu luba batsuundusu, mu ngisi ya bunsaalisi.

¹³ Mukwongo, mutsuundu wahele na ngebe kuri wunde wahele na ngebe; ngo muutu ngaa-ngebe wahele na boomo bwa mutsuundu.

Kanyi na biyiriki

¹⁴ Bampaangi baami, mbuti muutu wuleele ti nde wuri na kanyi, ngo wahele na biyiriki, lo nkya ndaandu? Buri kanyi dya bubwo lo dimubvuukisiri?

¹⁵ Mbuti mpaangi mosi, bunu pe kibusi kimosi, bari mpene, na bahele na mbyandya bya mpisi-tsuku,

¹⁶ ngo mosi mu beenu wubaleeriri ti: "Yendeenu mu kiyeengi, lwateenu binkuta bya kyoosi, na yukuteenu", ngo kasi wahele kubaha biri mufunu mu nyutu, lo nkya ndaandu?

¹⁷ Bunubwo se buri mu kanyi, mbuti dyahele na biyiriki, lo dyafwa mu dyo-meene.

¹⁸ Ngo muutu habaanaa wuleele ti: "Ye wuri na kanyi, ngo me nyiri na biyiriki. Sa soongo me, kanyi dya ye kwahele biyiriki, na me nyikusoongo kanyi mu biyiriki bya me."

¹⁹ Ye wutaambula ti Nzaambi yomosi yiri, bwabubwe wuyirikaa; mampeeve mamabi se mataambula na matekitaa.

²⁰ Dzeeke dya muutu! Yaaba kuri ti, kanyi dyahele na biyiriki, lo dyahele mufunu.

²¹ Buri Abalaami, taayi dyeetu, kari mu biyiriki kari kalulukusu, bu kaheeri mwaana waandi, Isaki, mu kikabu ha yulu dziku ko?

²² Wumono ti, kanyi dyaba salisinaa na biyiriki byaandi, na mu biyiriki, kanyi dyatubuka mu kiteesu kyakuka.

²³ Matinu mayende mu mana: "Abalaami kasanaa kanyi mu Nzaambi, ngo bamwiini dyo ti wasuunguma, na bamuteele ti nduku Nzaambi".

²⁴ Lumono ti muutu wuri walulukusu mu biyiriki, nkani ka munu mu kanyi kitsu ko.

²⁵ Bunubwo se, Lakabi ngaa-buyala, mu biyiriki kari kalulukusu, bu kataamburi bantumu, na bu kabayitikisi mu nzila yikimi.

²⁶ Mukwongo, bunu buri nyutu yahele na muwuumunu yiri yafwa, bunubwo se kanyi dyahele na biyiriki diri dyafwa.