Mukaanda kuri Tito 2 - Musamu Wamubwete 2013

Nyikusulu dzataasulu kuri binuni

¹ Ye ngo wuri leele, myayelemene na nyikusulu dzadzibwete.

² Babakala ba binuni baba na ndiilu na nwiinu byayelemene, baba bakiinsuma, basoongolo, bakuma mu kanyi, mu ntiilu, na mu kifiki.

³ Bakyeetu ba binuni se bwobumosi, mu kidziingu kya bo basoongo nzelu yayelemene mu bangisi. Yaa baba na makele ko, yaa baba bankutu ba nwiinu malu ya mawaamba ko, ngo baba bayikisi ba mamabwe,

⁴ mpisi heki bayikisa bantuumba, bwakutiila balumi na baala,

⁵ baba basokomo, bakiinsa manyutu maaku, bakwesa bisalu mu nzo, babweeye mutima, bakwetumuma kuri balumi baaku, mpisi heki maampu ma Nzaambi mahele kuba masaanu.

⁶ Syaamisa minkuula se bwobumosi, baba basokomo

⁷ mu myominso. Ye-meene se, soongo kifwaani mu biyiriki byabibwete, nsyemukunu na lukiinsu kunsa nyikisulu.

⁸ Maampu ma ye hemese maba matsyeemeke, mahele na bwa kumanwaanisina, mpisi heki bataatu bafwa nsoni, bahele kubaka ntoono yayibi yi batuseembele.

⁹ Bankutu baba batumuma kuri bamfumu ba bo-meene mu myominso, baba na mbweeyulu, yaa baba na muhaawu ko,

¹⁰ yaa beyiba ko, ngo bamonokoso mu myominso kanyi dyadibwete, mpisi babweeyese mu myominso, nyikusulu dza Mubvuukisi weetu Nzaambi.

¹¹ Mukwongo, bweese bwa Nzaambi Mubvuukisi, bwamonokono kuri baatu bobanso.

¹² Bwo buri mu kwetuyikisa, mpisi heki bu tubisiri bungooyi na nyiimunu dza nsi, twenata kidziingu kya ntaangu ya lumalu, mu kusokomo, mu nsungumunu na mu kinzaambi,

¹³ mu kwekiingila nsiitu yayibwete, na monokunu nkeembu ya Nzaambi wadzaangama, na ya Mubvuukisi weetu Yesu Kiristo.

¹⁴ Nde wayekiri nyutu yaandi mu ntoono beetu, mpisi katukuula mu momanso mamabi, na kutsyemekese kaanda dya nde-meene dyasoolu, diri na kuheme mu biyiriki byabibwete.

¹⁵ Ye yelemini kudzoonsolo mu mamo, kusyaamisa na seembe mu lutumu lwolunso. Muutu yaa kakunyaafuna ko.