Mukaanda kuri bari Loma 2 - Musamu Wamubwete 2013

Nsundusulu yasuunguma ya Nzaambi

¹ Hango-nkuumbu, ye muutu, wuri mutsuundisi, wuri mbakila mpemisi ko bwooso ye beele; bukuri ye wubaanaa wutsuundisa mbaasi, lo nyutu ye-meene wuri mu kubwiisa, bukuri ma wutsuundisila mbaasi, ye-meene se manamo wuri mu kuyirika.

² Tuyaari ti nsundusulu ya Nzaambi yilutilaa bunu buri ngwanwa, kuri babo bayirikaa mya bubwo.

³ Ye muutu, wuri mutsuundisi bakweyirika mya bubwo, na ye-meene se wukwemiyirika; buri ye butsimini ti ye ngo wuri sa bvuuka mu nsundusulu ya Nzaambi?

⁴ Hoti busina bwa mbweeyulu-mutima waandi, nkuundulu na nkindusulu-mutima waandi, ye wuri mu kunyaafuna, mu kuhele kuyaaba ti mbweeyulu-mutima ya Nzaambi, yinataa ye ku nyiingulu madyeele?

⁵ Ngo mu bunkuri bwaaku na nkubusulu mutima waaku, ye wukwekutukisa nkesi dzibwa mu ye, mu kiluumbu kya nkesi, na kya nyabusulu nsundusulu yasuunguma ya Nzaambi,

⁶ nde mbasi-tsuku wubvutula kuri mpisi muutu bunu buri biyiriki byaandi.

⁷ Sa kaha kidziingu kyahele manunu kuri babamosi, bakwesaka mu kifiki kunsa kisalu kyaandi, nkeembu, lukiinsu na kiteesu kyahele mbolulu.

⁸ Sa kasoongo nkesi na kabala kuri bakaka, mu ntoono tungu na bukuri bahele kutumuma kuri ngwanwa, kasi batumuma mu mya bubayi.

⁹ Manyoongi na kinkuukulu kuri mpisi muutu wukweyirika mamabi, dyatete kuri Muyudayo tumi kuri Muhelene.

¹⁰ Ngo kasi nkeembu, lukiinsu na kiyeengi kuri bakweyirika mamabwe, dyatete kuri Muyudayo tumi kuri Muhelene;

¹¹ bukuri Nzaambi wahele na bubayi.

¹² Mukwongo, bobanso bayirikiri masumu kwahele mangisi, sa bafuuka se kwahele mangisi; na bobanso bayirikiri masumu kunsa mangisi, sa baba batsuundusu mu mangisi.

¹³ Bukuri kari bayukaa mangisi basuunguma ha busu bwa Nzaambi ko, ngo kasi basalilaa mangisi sa baba balulukusu.

¹⁴ Mukwongo, mbuti bangooyi bahele na mangisi, bakwesalila mangisi bunubwo, bo bu bahele na mangisi, bo-meene ngo mangisi.

¹⁵ Bo basoongaa kuri ti, biyiriki bya mangisi byatinima mu mitima mya bo, nsimunu bo yita kimbaangi, mu bo na bo bitsimi bikwebafuunda bunu pe bikwebakalila.

¹⁶ Bubwo buba, mu kiluumbu ki tsuundisa Nzaambi mu Kiristo Yesu, mansweeki ma baatu, bunu buri Musamu waami Wamubwete.

Bayudayo na mangisi

¹⁷ Ye wuri na nkuumbu ya Muyudayo, wasa nsiitu mu mangisi, na wuri na kimweese mu Nzaambi yaaku.

¹⁸ Ye yaari kutya kwaandi, wusaanaa nsobokoso mu mari mufunu, wayikusu mu mangisi.

¹⁹ Ye yirikiri kuyaaba ti ye wuri munati bafwa miisu, buungi bwa bari ku mampimbisi,

²⁰ muyikisi baatu bahele na nyaabulu, muyikisi mwaa-baala, wunde wuri na dyeele dya kuba na nyaabulu, na dya kuba na ngwanwa mu mangisi.

²¹ Ngo habaanaa ye ngo wukweyikisa bambaasi, dyaburi wuri ye-meene kuyikisa pe? Ye wukweyikisa ti kuyiba pe, buri ye-meene wukweyiba?

²² Ye wukweleele ti kimpala kusa pe, buri ye-meene wukwesa kimpala? Ye wumonaa kinkeni mu biteki, buri wuri mu kweyiba mu manzo ma Nzaambi?

²³ Ye wukwesa kimweese mu mangisi, buri wuri mu kwesaana Nzaambi mu kwesinina mangisi?

²⁴ Mukwongo, diri dyatinu ti: «Mu ntoono beenu, makaanda makwesaana nkuumbu Nzaambi.»

²⁵ Mukwongo, nteendulu bubakala yiri ndaandu mbuti ye wusalilaa mangisi; ngo mbuti ye wuri musinini mangisi, lo nteendulu bubakala bwa ye yampya.

²⁶ Ngo mbuti muutu wahele kuteende bubakala, wubvuminaa mangisi, buri lo mpelulu nteendulu bubakala bwa nde, yahele kumonokono bunu nteendulu bubakala?

²⁷ Muutu wahele kuteende bubakala mu muswinyi, ngo wusalilaa mangisi, sa katsuundisa ye wuri na mukaanda mangisi, na wateende bubakala, ngo wuri musinini mangisi.

²⁸ Mukwongo, Muyudayo kari wunde wubamonaa mu miisu ko, na nteendulu bubakala kari yibamonaa mu muswinyi ko,

²⁹ ngo Muyudayo, wa mansweeki; na nteendulu bubakala, ya mutima mu Mpeeve, nkani ka ya mu mukaanda ko. Wa bubwo wutaambula ndumusu ya Nzaambi nkani ka ya baatu ko.