Musamu wamubwete watina Malako 7 - Musamu Wamubwete 2013

Yesu na kikulu kya bankaaka

¹ Bafarisi na mwaa-ndaambu batini ba mangisi bafumini ku Yerusalemi bakutukina hari Yesu.

² Bo bamono babamosi mu bayiki ba Yesu, bakwedya byandya na myooko mya mviindu, haho lo ti myahele kuswaaka.

³ Mukwongo, Bafarisi bunu buri Bayudayo bobanso, badyaana kwahele kuswaaka myooko natee mu mambongono ko, mu kubvumina kikulu kya bakuutu.

⁴ Mbuti bafumini ha kibeendu bya bobanso, lo bakiri kuswaaka myooko tumi badya. Bari na bifu bikimi byalaka bi bari bataambula, bi bakoobvuminaa busiiri: nswaakulu mambasa, bisa byansoongo, nkoombo [na mankwaala].

⁵ Bafarisi na batini ba mangisi bafuula Yesu ti: «Bayiki ba ye buri bari kikulu kya bakuutu kubvumina pe, bo kwedya byandya na myooko myamviindu?»

⁶ Yesu wabvutula kuri bo ti: «Esaya nkati wabikuri kwa kwakubwete, mu ntoono beenu bangaa-bumpitu-bumpyoongo, bunu bu diri dyatinu [ti]: "Kaanda dimadi dikiinsa me mu bibori; ngo kasi mutima mya bo miri la na me.

⁷ Kwa buunu bo bari mu kwensaambila. Nyikusulu dzi bari mu kweyikisa mangisi ma kimuutu."

⁸ Bu lubwoongiri mangisi ma Nzaambi, beenu lukaangimini mu kikulu kya baatu!»

⁹ Nde wabweese kubaleele ti: «Beenu luyaari nkati kunyaafunaa mangisi ma Nzaambi, mu kukebe kikulu kya beenu-meene!

¹⁰ Mukwongo, Moose waleele ti: "Kiinsa taayi dyaaku na nguri yaaku". Na ti: "Wunde wubula mampopi kuri taayi bunu pe kuri nguri, lo manunu lufwa."

¹¹ Kasi beenu lukweleele ti: "Mbuti muutu leeriri kuri taayi bunu pe kuri nguri ti: "Bibyo bi nketi kuha ye, bunu lubakusu kolobani diri", haho lo ti "kikabu kya kuha kuri Nzaambi."

¹² Beenu lumutala, kuri wahele kuyirika kitotolo ti kimosi, kuri taayi bunu pe kuri nguri.

¹³ Beenu luyalaana Maampu ma Nzaambi, mu kuyiingisa kikulu kyeenu, ki luri mu kweyikisa; misamu myalaka luri mu kweyirika mya bubwo.»

Bitotolo bikoosumunaa muutu

¹⁴ Yesu wabweese kuteele mpuumbu baatu, wabaleele ti: «Ywiilee me beenu-banso na bakuleenu.

¹⁵ Kuri kitotolo ko kya ku mbasi, kiri kikotaana mu muutu, lo kimusumuni. Ngo kasi bisumunaa muutu, bipalaa mu muutu.» [

¹⁶ ]

¹⁷ Yesu kamanaa kukoto mu nzo, kuri weki la na mpuumbu, bayiki baandi bamuha kifuuri mu mitariri nkuma.

¹⁸ Nde wabvutula kuri bo ti: «Buri beenu se lwahele na madyeele? Lwahele kubakula kuri ti byobinso bya ku mbasi bikotaana mu muutu, lo byahele kumusumuna,

¹⁹ bukuri byahele kukoto munsa mutima waandi, ngo munsa mwooyo, tumi byeki pala ku mutsyeeku, mu didyo, byandya byobinso byatsyeemeke?»

²⁰ Nde wabweese kuleele ti: «Mamo mapalaa mu muutu, mamo masumunaa muutu.

²¹ Bukuri mu mitima mya baatu, mu palaana bitsimi byabibi: buyala, kwiibi, munzusu baatu,

²² kimpala, ntiki-mboongo, mamabi, mawunu, kisaangila, miisu-mbengele, nsaanunu, masiiku, buwulu;

²³ momanso mamabi mamo, mapalaa mu muutu na mamusumunaa.»

Mukyeetu wa munzeense wasa kanyi mu Yesu

²⁴ Yesu kayisikaa ha kibeendu kikyo, wayende mu mankoonsi ma Tiro. Bu kakoto mu nzo mosi, nde kasii tya ko ti, muutu ti mosi kayaaba, ngo kasii bangusina kuba wasweeme.

²⁵ Hanaho, mukyeetu mosi, waba na mwaana wa mukyeetu waba na mpeeve yayibi, bu kayuka dyo, wayisa na wabwa ha miilu mya Yesu.

²⁶ Mukyeetu wunde waba Muhelene, wabutukila ku Fenisi dya Sirya. Nde wayingukila Yesu mpisi kapalisa mpeeve yayibi yaba mu mwaana waandi.

²⁷ Yesu waleele kuri wa mukyeetu ti: «Hemeseeti mwaa-baala bayukuta, bukuri bwahele bwabubwe mu kuholo mampa ma baala, na kutuba mo kuri bambwa.»

²⁸ Mukyeetu wabvutula na waleele kuri Yesu ti: «Mfumu, mwaa-baala ba bambwa se bakoodyaana bisyele bya mampa ma baala ku nsuku taabala.»

²⁹ Yesu waleele kuri nde ti: «Mu ntoono ma leeriri ye mamo, yende kwaaku, mpeeve yayibi yipariri mu mwaana waaku.»

³⁰ Bu kabvutuka ku nzo yaandi, mukyeetu wamono mwaana wabwoongulu ha yulu mbuka, na mpeeve yayibi yapala.

Yesu watsinikisa baba

³¹ Yesu wabweese kusisa nkoonsi ya Tiro, walutila ku Sidoni, kunsa mumvuka wa mabula kuumi, mu kweende ku mubu wa Ngalili.

³² Baatu banata kuri Yesu muutu wafwa makutu, wuri na mpasi mu kwedzoonso. Bayingukila Yesu mpisi kamutetekile myooko.

³³ Yesu wamunata ku lumperi, ha nde mukaka, la na mpuumbu, wamusoko mileembu mu makutu, waboloso mileembu mu mante maandi, na wabelemene ludima lwa mubeeru,

³⁴ Yesu watala ku yulu, wanana muwuumunu waandi, na waleele kuri mubeeru ti: «Efata» haho lo ti: «Dzibuma!»

³⁵ [Hanaho], makutu maandi madzibuma, lulyeele lwa ludima lwaandi lwa nyanguka, na wadzoonso kwakubwete.

³⁶ Yesu wadika baatu, ti yaa bayaabisa kuri muutu ti mosi ko. Ngo bu kabadika, bo kusa kuhamisa kutsamukisa mvuumfu.

³⁷ Baatu bamono dyo dyankimukunu yalaka na baleele: «Nkati momanso ma kari mu kweyirika mamabwete. Nde wuyukusa bafwa makutu na wudzoonsoso mababa.»