Biyiriki bya Bantumu 9 - Musamu Wamubwete 2013

Nyiingulu madyeele dya Sawulo

¹ Sawulo waba kwesilikina kusa bubi na kudzusa bayiki ba Mfumu, nde wakokosolo kuri mukuutu bangaanga-nzaambi,

² Nde wamuloombo mikaanda mya kwekoto mu manzo-mankutukunu mari ku bvula dya Damasiko, mu kuri ti, mbuti bweeni bamosi bari mu nzila, baba babakala bunu pe bakyeetu, lo kabankaangana, wubaneti ku Yerusalemi.

³ Mu ntaangu yi kari mu kweende, wakokosolo na Damasiko, na sisuu, buungi bwafumini ku yulu, bwamudzungukila,

⁴ bu kabwa ha nsi, nde wayuka mbeembu yaleele kuri nde ti: "Sawuli, Sawuli, mu nki ye wuri mu kwekwaamisa me?".

⁵ Nde wafuula ti: "Ye na, Mfumu?" Wumawu waleele ti: "Wu me Yesu wu wuri mu kwekwaamisa,

⁶ ngo kasi teleme na koto kunsa bvula na sa bakuleele mamo ma yelemini ye kusa."

⁷ Bambasi baba kintwaari na nde mu budyeengi bateleme, bafwa mapana, bayuka mbeembu, ngo bahele kumono muutu ti mosi.

⁸ Sawulo watelemusu ha butoto, miisu myaandi miri mwaasi, ngo wahele kumono ti kyabu; bu bamukwaata mu koko, bakoto ku Damasiko.

⁹ Nde wasa biluumbu bitatu kuri wahele kumono, wahele kudya na kunwa.

¹⁰ Ku Damasiko kwaba muyiki mosi, nkuumbu yaandi Ananya. Mfumu, mu mamono-miisu, waleele kuri nde ti: "Ananya". Ananya waleele ti: "Me ndewu Mfumu!"

¹¹ Mfumu waleele kuri nde ti: "Teleme, yende mu nzila yi bateelaa ya Lubakala, na saka mu nzo Yuda, muutu wa ku Taraso, nkuumbu yaandi Sawulo. Nde wuri mu kusaambila,

¹² na nde wamono [mu mamono-miisu] muutu wuri nkuumbu Ananya; bu kakoto mu nzo, wateteke myooko ha yulu nde mpisi kabweese kumono.

¹³ Ananya wabvutula ti: "Mfumu, baatu balaka badzoonsiri me mu muutu wu, nde wayirika mamabi malaka kuri bangisi baaku ku Yerusalemi.

¹⁴ Na hamaha, nde wuri na lutumu lwa bakuutu ba bangaanga-nzaambi mu kukaanga bobanso basaambila nkuumbu yaaku.

¹⁵ Mfumu waleele kuri nde ti: "Yende, bukuri weki kisalulu kya me ki nyiri nyasoolo, mu kunata nkuumbu yaami ha busu bwa makaanda, na se ha busu bwa bambyaasi na baala ba Isaheli;

¹⁶ bukuri, me sa nyamusoongo mamo mayelemini kuri nde, mu kumono mpasi mu nkuumbu yaami."

¹⁷ Ananya wayende na wakoto mu nzo, na bu kamutetekele myooko, waleele ti: "Sawuli mpaangi yaami, Mfumu heekiri me, Yesu wukumonikinye mu nzila yi bee kwiisa, mpisi heki ye bweese kumono, na se ba waluulusu mu Mpeeve."

¹⁸ Hanaho, byaba mu miisu mya nde biri bunu makala byasonoko, na nde wabweese kumono, na bu kateleme wataambula mbotokulu,

¹⁹ bu kadya byandya, wabweese kubaka makwa. Nde wadzakala ku Damasiko, mu mwaa-biluumbu byantele, kintwaari na bayiki,

Sawulo wayikisa ku Damasiko

²⁰ na hanaho, nde wayikisa mu manzo ma nkutukunu ti Yesu ngo Mwaana Nzaambi.

²¹ Bobanso baba yuka, bakimuka na baleele ti: "Buri kari wumawu ko wabee kwenwaanisa ku Yerusalemi babo babee kwetaanguna nkuumbu Yesu, na hamaha nde kwiisa kari mu kubakaanga na kubanata kuri bakuutu ba bangaanga-nzaambi ko?"

²² Ngo Sawulo wabaka makwa ha yulu makwa, Na wasukuka Bayudayo baba dzakalaana ku Damasiko, mu kubasoongo ti Yesu ngo Kiristo.

²³ Biluumbu byalaka bu byaluta, Bayudayo bakaanga kitsimi bya kumudzusa;

²⁴ mfuundu bo, ya mu Sawulo bu yabakana, bakebe myeelu butsuku na mwiini, mpisi bamudzusa;

²⁵ bayiki bu bayuka, bamusoko mu mpiri, na bamusundula butsuku ku mbisi kibaka.

Sawulo ku Yerusalemi

²⁶ Bu katubuka ku Yerusalemi, nde watsiitsa kuba na bayiki, na bobanso baba na boomo bwa nde, na baba bahele kusa kanyi ti nde weki muyiki.

²⁷ Ngo Barnaba bu kamuholo, wamunata kuri bantumu, na Sawulo wabaangula kuri bo, bunu bu kamwiinini Mfumu mu nzila, na bunu bu kadzoonsiri kuri nde, na bunu bu kadzoonsiri, ku Damasiko, mu nsiitu nkuumbu Yesu.

²⁸ Nde waba kintwaari na bo, mu kotulu na mu mpalulu na bo ku Yerusalemi, wukwe dzoonsolo mu nsiitu mu nkuumbu Mfumu.

²⁹ Nde waba kwedzoonso, na waba kwesaa se nkalikisi se na Bahelene; ngo bamaba basaka bwa kumudzusa;

³⁰ Bampaangi bu bayaaba, banata Sawulo ku Kayisareya, na bamubvutula ku Taraso.

³¹ Dibuundu dyaba na kidzuunu mu Yudaya dyodinso, mu Ngalili na mu Samariya, dyatuunguma na dyadyaata mu kibvumi kya Mfumu, na mu mboondulu ya Mpeeve Yangisi, dyo dyaba Kwefununaana.

Nsinukusu ya Ayineya

³² Petelo wayooko mwomunso, na kiluumbu kimosi, wasunduka kuri bangisi badzakala ku Lida.

³³ Nde wamono muutu mosi, nkuumbu yaandi Ayineya, wabwa mambwolokoto, kuholosono mibvu mpoomo, waneŋesene ha mbuka

³⁴ Petelo waleele kuri nde ti: Ayineya, Yesu Kiristo wu kutsinikisi! Teleme kwaaku na yirika mbuka yaaku. Hanaho nde wateleme.

³⁵ Bobanso baba ku Lida na baba ku Sarono bamumono, bo bayiingiri madyeele mu Mfumu.

Dorka bamufulukisa

³⁶ Ku Yope kwaba muyiki mosi wa mukyeetu, nkuumbu yaandi Tabita, mambangukulu "Dorka". Nde waba waluula mu biyiriki byabibwete na waba kwehaanaa lubakusu.

³⁷ Mu biluumbu bibyo nde wabwa kubeele na wafwa. Bu bamuyooso, basuusa [nde] mu kwarita dya ku yulu.

³⁸ Lida dyaba bebele na Yope, bayiki bu bayuka ti Petelo waba kukwo, bamuheekele baatu boolo, mu kumuteele: "Yaa dziingila ko, wasa natee kuri beetu."

³⁹ Petelo bu kateleme, wayisa na bo. Bu katubuka, bamunwaatisa ku kwarita dya ku yulu, bafwiiri bobanso bamumonokono kuri bari mu kudila, na bamusoongo binkuta na biyuungu byaba tuunga Dorka, bu kaba kintwaari na bo.

⁴⁰ Petelo bu kapalisa bobanso ku mbasi, nde watsukuma, wasaambila, na bu kasyeeteke kwaba nyutu waleele ti: "Tabita, teleme". Tabita wadzibula miisu, bu ka mono Petelo, nde dzakiri.

⁴¹ Bu kamukwaata mu kooko, Petelo wamutelemese; bu kateele bangisi na bafwiiri, Petelo wasoongo Tabita kuri wuri mwooyo.

⁴² Mamo mayabakana mu Yope dyodinso na balaka basa kanyi mu Mfumu.

⁴³ Petelo wadzakala biluumbu byalaka ku Yope, ku nzo Simoni waba musari mukaanda ngoombo.