Biyiriki bya Bantumu 4 - Musamu Wamubwete 2013

Petelo na Yowane ha busu bwa mfuunda ya kikuutu

¹ Petelo na Yowane baba bakiri mu kudzoonso kuri baatu, bakuutu ba bangaanga-nzaambi, mutumi Nzo-nzaambi na Basaduki bayisa.

² Bu baba na nkesi mu ntoono yiri bo baba yikisaana baatu na baba yaabisaana mfulukulu ya bafwa mu Yesu.

³ Bo babakaanga na babasa mu boroko natee bu bwakya; bukuri yaba yeki nsinsika.

⁴ Balaka bayukiri maampu basiiriri kanyi, na lutaangu lwa baatu [kampe] lwakuka mafuunda mataanu.

⁵ Bu kyaanaa, bamfumu ba bo, bakulu ba babakala na batini ba mangisi babvuutuna ku Yerusalemi.

⁶ Ana mukuutu bangaanga-nzaambi, Kayafa, Yowane, Alekandere na bobanso babutukila mu kikuutu kya kingaanga-nzaambi,

⁷ bu basuusa Petelo bo na Yowane ha kakati, babafuula ti: «Mu nkya mpinu, bunu pe, mu nkya nkuumbu, beenu luyirikiryee mamo?»

⁸ Hanaho, Petelo kaluula mu Mpeeve Yangisi, waleele kuri bo ti: «Bamfumu ba kaanda na bakulu ba babakala,

⁹ mbuti lolo di bari mu kutufuula, mu ntoono kiyiriki kyakibweete, mu muutu wabeele wutsiinikini,

¹⁰ diba dyayabakana kuri beenu-banso na kuri kaanda dyodinso dya Isaheli ti: mu nkuumbu Yesu Kiristo wa ku Nadzareti, wu lwabee komono beenu, wuri Nzaambi wamufulukisi mu bafwa, mu nde, wumawu kari kateleme nangwii ha busu bwa beenu.

¹¹ Yesu ngo "Tari, dyanyaafunu kuri beenu batuungi, dyeki dyanguri ha kuumbu."

¹² Mvuukulu yahele mu mukimi; bukuri kwahele nkuumbu yikimi ha butoto, yi bari baha kuri baatu, yiri lo mu yo, beetu tubvuukiri.»

¹³ Bo bu bamono nsiitu dza ba Petelo na Yowane, babakula ti baatu ba bahele kuyika, na bahele na nyaabulu, bapamuka; babayaabula ti bo babee kwebaanaa kintwaari na Yesu.

¹⁴ Ngo bu bamono muutu wu batsiinikisi, wateleme ha teke bo, bakoono kubaka dya kuleele.

¹⁵ Bu babapalisa ku mbasi, kikuutu kyadzakala mu kusa mfuundu,

¹⁶ baleele ti: «Nki tuseenee mu baatu bamaba? Baatu bobanso bari ku Yerusalemi, bayaari mu ngwanwa kidiimbu ki bayirikiri bo, na ka tubangisina kutuna kyo ko.

¹⁷ Ngo mu kuri ti mihele kuba myatsamikisa kwalaka kunsa kaanda, tubaŋaŋinyeenu, mpisi bahele kubweese kudzoonsolo mu nkuumbu yiyo, kuri muutu ti mosi.»

¹⁸ Babateelaana, babadika mu makwa, mu kudzoonsolo na kuyikisa mu nkuumbu Yesu.

¹⁹ Petelo na Yowane babvutula kuri bo, baleele ti: «Lalamee, mbuti buri bwasuunguma, ha busu bwa Nzaambi, mu kutumuma kuri beenu, ti na mu kutumuma kuri Nzaambi.

²⁰ Mukwongo, beetu tubangisina ko, mu kuhele kuyikisa ma turi twamono na ma turi twayuka.»

²¹ Bo babaŋaŋinaana, babapaturi, bahele kubaka bwa kubaseembele, mu ntoono kaanda, bukuri bobanso baba dumusaa Nzaambi mu mayirimini.

²² Muutu wunde, wabakiri butsiina mu kimaangu kikyo, waba waluta mamvula makuumi mana.

Lusaambulu lwa basiila kanyi

²³ Babapatulaana, Petelo na Yowane bayende kuri ba bo-meene, na bayalimina momanso ma bayirikiri bakuutu ba bangaanga-nzaambi na bakulu ba babakala.

²⁴ Bo se bamanaa kuyuka, mu mutima mosi, batoombolo mbeembu kuri Nzaambi na baleele ti: «Mfumu, ye wayirika yulu na butoto, mubu na bitotolo byobinso biri mu byo,

²⁵ ye wadzoonsiri mu Mpeeve, mu munwa Davidi, taayi dya beetu, kisari kyaaku ti: "Mu ntoono nki mansi makwesa kisaangila? Mu ntoono nki baatu bakwesa myahele mufunu?

²⁶ Bambyaasi ba butoto bayirima, na bamfumu bakutukina, babvuutuna ha kimosi mu kunwaanisa Mfumu, Kiristo dyaandi."

²⁷ Mukwongo, mu ngwanwa, Erode, Pontyo Pilato kintwaari na bangooyi na baatu ba Isaheli, bamwaakutukina munsa bvula dimadi, mu kunwaanisa kisari kyaaku kyangisi, Yesu wu wuri wakila maasi,

²⁸ mu kukukisa myominso mi watsimi ye mu mpinu na bitaasi [bya ye], tekesele miyirima.

²⁹ Na mu lumalu, Mfumu mono kibakala kya bo, na ha kuri bisari byaaku, mu nsiitu yoyinso mu kuyikisa maampu maaku.

³⁰ Laambula koko [kwaaku] mu kusoongo nsinukunu, bidiimbu na bimaangu mu nkuumbu ya kisari kyaaku kyangisi, Yesu.»

³¹ Bu baba mu kusaambila, kibeendu ki baba bakutukina kyatembele, na bo baluula mu Mpeeve Yangisi, na babeke kweyikisaa maampu ma Nzaambi mu nsiitu.

Basiila kanyi bakabula bi bari na byo

³² Mukwongo, mpuumbu ya basiila kanyi yaba mutima mosi, na muheebulu mosi; kuri muutu ko waba na bitotolo bwa nde-meene, ngo byobinso byaba bya ntwaari.

³³ Bantumu baba taanaa kimbaangi, kya mfulukulu Mfumu Yesu, mu mpinu dzamakwa, na bweese bwabunene bwababaa ha yulu bobanso.

³⁴ Kwaba kwahele muutu mu bo, waba wahelele kitotolo; mpisi baba na bibiti, bunu pe nzo, baba yarikaana na baba twaalaana mboongo dza bi bayarikiri,

³⁵ na baba suusaana ha miilu mya bantumu, baba kabulaana kuri muutu-muutu bunu buri nzala yaandi.

³⁶ Yosefi, wubaluka Barnaba kuri bantumu, mambangukulu ti mwaana wa mboondulu, mosi mu kisari kya mu Nzo-nzaambi, wafuma ku Kiporo,

³⁷ bu kaba na nseke yaandi, wayarika yo, wanata mboongo na wasuusa dzo ha miilu mya bantumu.