Biyiriki bya Bantumu 23 - Musamu Wamubwete 2013

¹ Pawulo katala kikuutu kya Bayudayo kisooso waleele ti: «Bampaangi baami, mu nsimunu yaami yoyinso, me nyadyeeti ha busu bwa Nzaambi, mu kifwaani kyakibwe natee kiluumbu ki.»

² Mukuutu ngaanga-nzaambi, Ananya, watuma kuri baba haho, mu kumulata mu munwa.

³ Ngo Pawulo waleele kuri nde ti: «Ngo Nzaambi ye-meene kalata, kibaki kyakila mpeembe! Ye wadzakala haho mu kutsuundisa bunu buri mangisi, na mu nsaanunu mangisi ye wutuma balata me!»

⁴ Baba haho baleele ti: «Ye tukiri mukuutu bangaanga-nzaambi!»

⁵ Pawulo waleele ti: «Bampaangi baami, me mbee nyahele kuyaaba ti nde mukuutu ngaanga-nzaambi. Mukwongo, matinu maleele ti: "Yaa dzoonsolo bwabubi mu mfumu kaanda ko!"»

⁶ Pawulo bu kaba kayaari ti kunsa kikuutu babamosi baba Basaduki, na bakaka Bafarisi, nde wabikisa ha busu bwa bo ti: «Bampaangi baami, me nyiri mu Mufarisi, mwaana Mufarisi, [me] bari mu kutsuundisa, mu ntoono nsiitu na mu ntoono mfulukulu ya bafwa.»

⁷ Nde bu kamana kuleele bubwo, yumu dyabwa ha kakati dya Bafarisi na Basaduki; mpuumbu yakabuka.

⁸ Mukwongo, Basaduki bakooleelaa ti, mfulukulu, na bambasi, na mampeeve biri ko; ngo kasi Bafarisi babitaambulaa.

⁹ Misaakulu myaminene myayukukuna, batina bamosi bari mu kibari kya Bafarisi, bateleme, basa nkalikisi baleele ti: "Beetu twahele kumono dyadibi mu muutu wu; kampe mbasi bunu pe mpeeve yidzoonsiri kuri nde!"

¹⁰ Yumu dyamonoko dya makwa, mukuutu wabaka boomo ti Pawulo bee bamusebiri. Nde watuma bayongolo basunduka, beende bamupalisa ha kakati dya bari mu kuyumuna, na bamunata ku lumpaangu lu dzakalaa bayongolo.

¹¹ Mu butsuku bwaba nama, Mfumu wamonoko kuri nde waleele ti: «Ba na kibakala, bukuri, bunu bu teerye kimbaangi mu mitariri me ku Yerusalemi, bunubwo se ye yelimini, kweeta kimbaangi ku Loma.»

Pawulo bamusiila mamfuundu

¹² Bwiisi bu bwakya, Bayudayo basa mfuundu, balaba maalu bo-meene baleele ti, natee bakiri kudzusa Pawulo tumi bo badya na banwa.

¹³ Badiiri kikaandu kikyo baba baluta makuumi mana ma baatu.

¹⁴ Bo bakokosolo kuri bangaanga-nzaambi na kuri bakulu ba babakala baleele kuri bo ti: «Beetu tumwaalaba-maalu beetu-meene ti, beetu mu kusa kitotolo mu munwa, natee beetu twakiri kudzusa Pawulo.

¹⁵ Hango mu lumalu, yukusunee beenu na mukuutu bayongolo kintwaari na kikuutu kya Bayudayo, batwaala Pawulo kuri beenu, luyirika kufyongokono mya nde, na beetu, tekesele katubuka hamaha, twayirima mu kumudzusa.»

¹⁶ Ngo mwaana kibusi kya Pawulo wayuka kele didyo; wayende ku lumpaangu lu dzakalaa bayongolo, wayaabisa momanso kuri Pawulo.

¹⁷ Pawulo kateelaana mosi mu bakuutu ba nkama bayongolo waleele ti: «Nata munkuula wu kuri mukuutu fuunda, bukuri nde wuri na ma kuyaabisa kuri nde.»

¹⁸ Wunde kamuholaana, wumuneti kuri mukuutu fuunda na waleele ti: "Pawulo wuri mu boroko, teeriryee me, na ndoombiri, me nyikutwalikila munkuula wu, wuri na dya kuleele kuri ye."

¹⁹ Mukuutu fuunda, wamukwaata mu kooko, wayende na nde ha lumperi, wasaka kuyaaba: "Nkya mo wuri na mo ma kuleele kuri me?"

²⁰ Nde waleele ti: "Bayudayo bamwaakaanga kitsimi kya kuloombo kuri ye, mpisi heki bweepari, ye nata Pawulo kuri kikuutu, bunu ti ye tiiri kuyaaba na tswitswikii mya mu nde."

²¹ Ye ngo wuri, yaa tambukila mya bo ko; baatu baluta lutaangu lwa makuumi mana bamwaamulebekele mweete. Bo balaburyee maalu mu bo-meene ti, natee badzusiri Pawulo tumi badiiri na banwiini. Mu lumalu bo bayirima, bakiingika lusiilulu lwa ye.

²² Hango, mukuutu fuunda wabvutula munkuula wunde, na wamudika ti yaa kuyaabisa ma kamuyaabisiri mamo, kuri muutu ti mosi.

Pawulo bamunata ku Kayisareya

²³ Mukuutu fuunda, bu kateele bakuutu boolo ba nkama, waleele ti: "Holee nkama dzoolo dza bayongolo, makuumi tsaamu ma banati ba makavaalu na nkama dzoolo dza bakebi, bayirima mu kwende ku Kayisareya, mu kilookolo kya bitatu kya butsuku.

²⁴ Yirikeenu se makavaalu ma lunatina Pawulo mpee-mpolo kuri ngoforo Felikisi."

²⁵ Nde watina mukaanda, na mi katinini mimami:

²⁶ "Kolodyo Lisya, kuri ngoforo ya lukiinsu Felikisi, mboto!

²⁷ Muutu wu, Bayudayo bamukaangiri, na bamono dyo ti bayelemene kumudzusa. Me bu nyayukiri ti muutu bari Loma, ha nyayensi na mpuumbu bayongolo mu kumukuula.

²⁸ Bu nyasakiri kuyaaba bubi bu bari mu kumfuundila, me nyamuneti ha busu bwa kikuutu kya bo.

²⁹ Me mwiinyee ti mi bari mu kumufuundila, mitariri mi bakwesa nkalikisi mu mangisi ma bo. Kuri musamu ti mosi ko, mu mi bari mu kumufuundila, wu bayelemini mu kumudzusa bunu pe mu kumusoko mu boroko.

³⁰ Bu ba nyaabisiri kele dya mu nde, mawasu-mawasu, me nyikuheekiri nde, na me ndoombiri kuri bari mu kumufuunda, biisa baleele ha busu bwa ye, myamibi mi kari kayirika."

³¹ Hango, bayongolo, bunu buri lutumu lu bari bataambula, baholo Pawulo, bamunata mu butsuku ku bvula dya Antipatiri.

³² Bukyaanaa, baha miswa kuri banati ba makavaalu mu kweemuholo na kumunata; tumi bayongolo babvutuka ku badzakalaa.

³³ Bu bakoto mu Kayisareya, bayakisa mukaanda kuri ngoforo na basoongo Pawulo kuri nde.

³⁴ Bu kataanga mukaanda, wafuula bula bwa fumuni Pawulo, na bamuyaabisa ti ku Kilikya.

³⁵ Nde waleele ti: "Me kukuywiila mu ntaangu yiri bafuundi ba ye batelemini ha busu bwa me." Nde waha miswa mu kumukebele mu nzo miyalu ya Erode.