Biyiriki bya Bantumu 20 - Musamu Wamubwete 2013

Budyeengi bwa Pawulo ku Makedonya na ku nsi ya Bahelene

¹ Misamu mya tungu mimyo milutaana, Pawulo watumisa bayiki, bu kabasyaamisa, nde wabaha mboto na wayende ku Makedonya.

² Bu kaba kwetaba mankoonsi mamo, nde wabasyaamisa mu maampu malaka, watubuka ku nsi ya Bahelene,

³ nde walutisa mangoondo matatu kukwo. Nde bu kasaka kuholo bwaatu mu kweende ku Sirya, nde wayuka kele dya Bayudayo mu nde, na wataambula kubvutukila mu nzila ya Makedonya.

⁴ Bayende na nde mu nzila ngo: Sopatero mwaana Piro wa ku Bere, Aristarako na Sekundo ba ku Tesalonika, Ngayo wa ku Derbe, Timoteho, Tikiko na Torofimo ba ku ha Asya.

⁵ Bamaba bateekilaana, batukiingila ku Torowasi.

⁶ Beetu twakoto bwaatu ku Filipo, ha mambisa ma biluumbu bya mampa mahele lufunusu. Beetu tababakala ku Torowasi ha mambisa ma biluumbu bitaanu, na twalutisa lumiingu kukwo.

Budyeengi bwa mpotulu bwa Pawulo ku Torowasi

⁷ Kiluumbu kyatete kya lumiingu, bu twabvuutuna mu kubukunu mpa, Pawulo waba dzoonsaana na babo, bukuri waba kweende mu kiluumbu kyaba nama, nde wanonono luyolo natee mu kakati dya butsuku.

⁸ Miinda myaba myalaka, mu kihekiri kya ku yulu mu twaba twakutukina.

⁹ Mwaa munkuula mosi, nkuumbu yaandi Etiko, waba wadzakala ha mweelu nzo wantele, wuri tolo twa mpoondo. Pawulo wanamitina mu kudzoonso mu ntaangu yalaka. Ngo munkuula wunde, tolo bu twabvulila, wasonoko kuholosono mu mve yamatatu ya nzo natee ha nsi, na wafwa.

¹⁰ Pawulo bu kasunduka, wabwa ha yulu nde, wamuholo mu munsa myooko myaandi waleele ti: "Yaa lunyoongo ko, kiluunsi kyaandi kyakiri mu nde.

¹¹ Bu katoomboko, wabukuna mpa na wadya, walutisa ntaangu yalaka na wadzoonso natee ku nkyeelele bwiisi, na wayende.

¹² Bo banata mwaana wamwooyo na bataambula mboondulu yalaka.

Budyeengi bwa ku Torowasi natee ku Mitilene

¹³ Beetu bu twatekele mu bwaatu, twatalisa ku Asoso, ku twaketi kuholo Pawulo. Bukuri nde watiiri kuholo nzila ya mu nsi.

¹⁴ Bu katubakala ku Asoso, beetu twabweese kumuholo, na twayende ku Mitilene.

¹⁵ Tuyisikaa haho, beetu twaholo nzila ya mu mubu. Mu kiluumbu kyanama, twatubuka ha simi dya Kyo, mu kiluumbu kyabweese kunama beetu twataba Samo, na mu kiluumbu kyakaka twatubuka ku Mileto.

¹⁶ Mukwongo, Pawulo waba tiiri kulutila la na Efeso, mu kuhele kulutisa ntaangu ku Asya, nde waba kwebingukila, bukuri waba tiiri ti, mbuti bwakuka lo nde kaba ku Yerusalemi, mu kiluumbu kya Pantekote.

Pawulo wadzoonso kuri bakulu ba babakala

¹⁷ Kuholosono ku Mileto, Pawulo waheeke mukeensu ku Efeso mu kutumisa bakuutu ba dibuundu.

¹⁸ Bu bayisa kutubuka hari nde, nde wabaleele ti: "beenu luyaari ti kuholosono kiluumbu kyatete kinyasuusiri me kitaambi kunsa Asya, bunu bu nyabee na beenu mantaangu momanso,

¹⁹ nyasalila Mfumu mu nkulukulu yoyinso; kunsa bidilu na kunsa nsindukulu dzantumbukila mu makele ma Bayudayo.

²⁰ Me nyahele kusweeke kitotolo ti kimosi, mu byaba mufunu kuri beenu, mu ntaangu ya kuyaabisa na kuyikisa, ha busu bwa baatu na mu manzo.

²¹ Me nyaloombo kuri Bayudayo na kuri Bahelene mu nyiingulu madyeele mu Nzaambi na kusiila kanyi mu Mfumu yeetu Yesu.

²² Mu lumalu me Mpeeve wankaanga, na me nyeensi ku Yerusalemi kwahele kuyaaba misamu mi nyibwaanikina na myo ku mankula.

²³ Mpeeve Yangisi yiri mu kunswiikisila ti, mu bvula ngo bvula bikonyi na mpasi biri mu kunkiingila.

²⁴ Kasi ha miisu mya me, kidziingu kyaami kyahele mufunu, kasi miri mufunu kuri meenu kusukisa nzila yaami na kisalu ki nyataamburi kuri Mfumu Yesu, kya kweta kimbaangi mu Musamu Wamubwete mu bweese bwa Nzaambi.

²⁵ Mu lumalu me nyaari ti beenu lubweese kumono busu bwa me ko, beenu-banso kunsa baatu ba nyabee kweluta mu kuyikisa maampu ma Kimfumu kya mayulu.

²⁶ Mu ntoono bubwo me nyilutswiikisa mu kiluumbu kya lolo ti, mu makila ma beenu-banso me nyiri na kibila ko.

²⁷ Mu ngwanwa, me nyahele kulusweekele kitotolo ti kimosi, mu kuluyikisa kutya kwa Nzaambi.

²⁸ Seenee madyeele mu beenu-meene, na mu mpuumbu bimeeme yoyinso yiri Mpeeve Yangisi wulutelemisi mu kuba bakebi. Buunguleenu dibuundu dya Nzaambi di kari kabaka mu makila ma nde-meene.

²⁹ Me nyaari ti ha mambisa ma nyendukulu me, kunsa beenu bambulu bari na kibakala sa bakoto, na babvuukisa mpuumbu bimeeme ko,

³⁰ na munsa beenu se sa kwateleme baatu ba kwesa biwobiri, mu kunata bayiki ha mambisa ma bo.

³¹ Mu ntoono bubwo, beene naana na baambukeenu mwooyo ti, mu lutaangu lwa mibvu mitatu, butsuku na mwiini, me nyahele kudzimbikina kulubula mpisi nde mu beenu, mu mansangasi.

³² Mu lumalu, me nyiluyekele beenu-banso kuri Nzaambi na kuri maampu ma bweese bwaandi, nde wuri na mpinu dza kutuunga nzo na dza kuha saala kuri bobanso basakumunu.

³³ Me nya sii saka mboongo, bunu pe woolo, bunu pe binkuta bya muutu ko.

³⁴ Beenu-meene luyaari ti myooko mimami, myabakisiryee me-meene na banduku baami mu manzala.

³⁵ Mu myominso, me nyasoongiri kuri beenu ti, mu kusala, beenu luyelemini kubakisa bari na buyonsi, na kubaambuka mwooyo mu maampu ma Mfumu Yesu, bukuri nde-meene waleeriri ti: "Kiminu kibvuriri mu kuha ti na mu kutaambula."

³⁶ Bu kamana kuleele mimyo, nde watsuka maboongo ha nsi, na wasaambila na bobanso.

³⁷ Bobanso bakoto kunsa bidilu byalaka, babeke kwemudumukuna mu nkiingu na kwemunyumutina.

³⁸ Bo bamono ngebe mu ntoono yi kaleeriri ti, bo babweese kumono busu bwaandi ko. Bo bayende kumufila natee ku bwaatu.