Biyiriki bya Bantumu 18 - Musamu Wamubwete 2013

Pawulo ku Korinto

¹ Ha mambisa haho, Pawulo wasiisa Atena na wayende ku Korinto.

² Nde wabwaana Muyudayo mosi, wuri nkuumbu Akila, wabutuka ku nkoonsi ya Pontiko. Kidzika kyantele kaba kamwaasa, wafumuni ku Italya, bo na Piriska, mukasi waandi, mu ntoono Kolodyo waheeri lutumu ti Bayudayo bapala mu Loma. Nde wakokosolo na bo,

³ na bukuri waba kisalu kimosi na bo, nde wadzakala kuri bo na wasala kintwaari na bo. Bo baba batuungi ba misaampu.

⁴ Nde waba dzoonsaana mu nzo-nkutukunu, mpisi kiluumbu kya mpuumunu, na waba yukusaana misamu ku Bayudayo na Bahelene.

⁵ Sila bo na Timoteho bu baba tubuka kuri ba mwaanangukina ku Makedonya, lo Pawulo wuri mu kwelutusa ntaangu, mu maampu ma Nzaambi, mu kweta kimbaangi ha busu bwa Bayudayo ti Yesu ngo Kiristo.

⁶ Mukwongo, Bayudayo bu baba kwemunyaafuna na kwemutuka, nde wakubula binkuta byaandi na wabaleele ti: "Makila ma beenu mabwa ha yulu mitu myeenu, me nyahele na kibila mu mo; mu lumalu, me ntalisiri kuri bangooyi."

⁷ Nde wayisika haho, na wayende kukoto mu nzo muutu mosi, nkuumbu yaandi Tityo Yusto munsaambiri Nzaambi, wuri nzo yaba ha teke nzo-nkutukunu.

⁸ Kirispo mfumu nzo-nkutukunu, wasii kanyi mu Mfumu, nde na nzo yaandi, na baatu balaka ba ku Korinto bayukiri, basii kanyi na bababotukiri.

⁹ Butsuku bu mosi, Mfumu waleele mu mamono-miisu kuri Pawulo ti: "Yaa ba na boomo ko, kasi dzoonso, na yaa wura ko,

¹⁰ bukuri me nyiri na ye, na kuri muutu ti mosi ko, wukwiisa mu kusa ye bubi, bukuri me nyiri na baatu balaka mu bvula dimadi.

¹¹ Nde wadzakala na bo mu mubvu mosi na mangoondo masaamunu mu kweyikisa maampu ma Nzaambi.

¹² Ngalyono waba kimonikisi kya nsi ya Loma ku Akaya; Bayudayo bayukusina batelemise kitaatu mu Pawulo, na bamunata ku nzo ya miyalu,

¹³ mu kuleele ti: "Muutu wumawu wuri mu kwesinda baatu mu kusaambila Nzaambi, mu kiteese kya kuhele kubvumina mangisi.

¹⁴ Pawulo bu kabaandika kudzibula munwa, Ngalyono leeriri kuri Bayudayo ti: "Mbuti habeeri lumvuki bunu pe musamu wamubi, nkani me ntaamburi nyayulu yeenu;

¹⁵ mbuti nkalikisi mu ntoono maampu, mankuumbu na mu mangisi meenu, lo monee beenu-meene; me ntiiri kuba mularimi mimyo ko.

¹⁶ Na nde wabapalisa mu nzo miyalu.

¹⁷ Bobanso bakwaata Sosetene, mfumu nzo-nkutukunu, bamulata ha mbasi nzo miyalu; kasi myominso mimyo myaba myahele kutala Ngalyono.

Pawulo ku Antyoke

¹⁸ Pawulo wabweese kulutisa biluumbu byalaka. Tumi wasiisa bampaangi na wakoto mu bwaatu, mu kweende ku Sirya, ha kimosi na Piriska na Akila. Nde watebe mfu ku Nkengerya, mu lusiilulu lukasiiri.

¹⁹ Bo batubukaa ku Efeso, wubasiisiri kukwo. Bu kakota mu nzo-nkutukunu, nde wadzoonso na Bayudayo.

²⁰ Bo bamuloombo mu kulutisa mwaa-ntaangu yalaka na bo, kasi nde wabisa.

²¹ Ngo nde wabasisa, waleele ti: "Me sa bweese kwiisa kuri beenu, mbuti Nzaambi tiri. Na wakoto bwaatu ku Efeso.

²² Nde wakulumuka ku Kayisareya, bu kanaaka ku Yerusalemi mu kuha dibuundu mboto, tumi ha kakulumuka ku Antyoke.

²³ Nde bu kalutisa mwaa-mantaangu, ha kataba mankoonsi malandisina Ngalatya, Firingya, mu kwesyaamisa bayiki bobanso.

Apolo ku Efeso na ku Korinto

²⁴ Muyudayo mosi, nkuumbu yaandi Apolo, wabutuka ku Alekanderi muutu wuri na bunzoonsi, wayisa ku Efeso, waba na nyaabulu mu matinu.

²⁵ Nde waba na nyaabulu mu nzila Mfumu, na ntiiti mu kisalu, waba kwedzoonso na kweyikisa mu bunkete misamu mitariri Yesu, ngo yini mbotokulu ya Yowane kaba kayaari;

²⁶ Nde wabaandika kuyikisa mu kibakala mu nzo-nkutukunu; Piriska na Akila bu bamuywiila, bamuholo mu kuba na bo, na bamuyikisa nzila [Nzaambi].

²⁷ Nde bu kaba katya kweende ku Akaya, bampaangi bamusyaamisa na batinina kuri bantumu mu kuri ti bamutaambula, nde bu katubuka wamonoko mufunu walaka kuri babo basii kanyi mu bweese.

²⁸ Mukwongo, nde waba tungukilaa Bayudayo mu makwa, ha busu bwa baatu, na waba soongaa mu matinu ti Yesu ngo Kiristo.