Lukas 1 - Alkitab Duri

Pamula sura' 1:1-4

¹ Ee, Teofilus, to mala'bihku'. Budamo tau mpengkulle-kullei tonganni nnuki' rampa'i katuoan-Na Puang Isa to mangkamo jaji lan tangnga-tangngata'.

² Ia to nauki' tau, susi bang unamo to napangpeissenan to tongkita kalenai apa to mangka jaji, mellao jio mai pamulanna. Iamo tuu lako tau mpangpangngajaran kadan-Na Puang Allataala tongkuuki'i tee.

³ Ia tongkupasilolongan ngasanni tuu lako mellao jio mai pamulanna, kusanga melo ke kuukiran pole'ki' to mangrundunanna.

⁴ Iamo kupugaukki susi joo, dikua antaissenni kumua, tongan to apa mangka tasa'ding.

Kajajianna Nabi Yahya dipangpeissenan 1:5-25

⁵ Ia tonna Raja Herodes mangparenta jio tana Yudea, den imang jio disanga Zakharia, rapunna imang Abia. Ia to bainena disanga Elisabet, bati' imang toda ia.

⁶ Ia to sipa'na sola dua napumasannang Puang Allataala, na naturu'i ngasan to parenta-Na na atoran-Na Puang Allataala.

⁷ Te'da anakkana, nasaba' tamanangngi to Elisabet na matuami sola dua.

^8-9 Den wattu, tonna dete'mi wattunna rapunna imang Abia la mangjama, mentamami Bola Puang Allataala imang Zakharia, nasaba' nakannai undi la ntunu kamanynyang. Ia to kabiasan joo wattu, ia to carana mpattantu imang la mangjama, diundi.

¹⁰ Ia tonna ntunu kamanynyang, ia to tobuda massambajang jio salean.

¹¹ Denmi malaeka'-Na Puang Allataala mpangpekitan kalena lako Zakharia. Ia joo malaeka' ke'deh jio sa'de kananna meja to dinii ntunu kamanynyang.

¹² Ia tonna kitami, sabakanmi namalaja' too.

¹³ Apa mangkadai joo malaeka' nakua, “Ee, Zakharia, danggi' mumalaja'! Natarimamo Puang Allataala to passambajangmu. Ia to balimmu la njajianni mesa' pea muane, ammusangai Yahya.

¹⁴ La gaja sannangko, na buda tau la mpumasannangngi to kajajianna joo pea.

¹⁵ Ia joo pea, la mala'bih situru' pengkitan-Na Puang Allataala, na te'da nalamangngiso' anggoro' ba'tu nniso' to makarrahna. Mangpamula nakeba'tangan indona nakuasai tarruhhi Roh Allataala.

¹⁶ Buda to-Israel la napapole lako Puang Allataala, Puangna.

¹⁷ Na la menjaji pesuro matappa'-Na Puang Allataala, na dipakuasa susi Nabi Elia. La napasikalinoi to ambe' na anakkana. Na ia to totangkainawa naajahhi mangtangngah susi tomelo penawa. Susimo joo napasadiai to tau ntarima Puang.”

¹⁸ Mangkadami Zakharia lako joo malaeka' nakua, “Umbo la kukua nnissenni kumua la jaji susi joo? Sanga matuamo', na ia to balingku' matua todamo.”

¹⁹ Mebalimi joo malaeka' nakua, “Aku'mo tee Jibrail, pesuro matappa'-Na Puang Allataala, disua mpauanko tee kareba kamarioan.

²⁰ Apa ia to kupauanko la jaji ke wattunnami. La mamangko sajajinna joo, sanga te'da mukatappa'i.”

²¹ Ia to tobuda ntajan bangmo Zakharia jio salean. Takkajanna' tuu lako tau, sanga gaja sainmi lan Bola Puang Allataala.

²² Na ia tonna messunmo Zakharia, tangnaissenmi mangkada. Mangkada tomamang bangmira lako tau, sanga mamangmi. Ta'pa naissenmi tobuda kumua mangkami ngkita pengkita makalaen-laen lan Bola Puang Allataala.

²³ Ia tonna puramo to wattu mangjama lan Bola Puang Allataala, polemi Zakharia lako bolana.

²⁴ Te'da namasai mangkanna joo, keba'tangmi Elisabet balinna, anna torro bang membuni jio bolana limang bulan.

²⁵ Mangkadami nakua, “Iamo tee pangtulung-Na Puang Allataala lako kaleku', nata'dei to siri'ku'.”

Kajajian-Na Puang Isa dipangpeissenan 1:26-38

²⁶ Ia tonna annanmo bulanna keba'tang Elisabet, nasuami Puang Allataala to malaeka' Jibrail male lako kota Nazaret, mesa' kota jio tana Galilea,

²⁷ lako mesa' ana'dara disanga Maryam, to dipasitangka'mo Yusuf, bati'na Raja Daud.

²⁸ Ia tonna ratumo lako, mangbere sallangmi nakua, “Salama', nabarakka'imoko Puang Allataala narande pala'ko.”

²⁹ Sabakanni Maryam ssa'dingngi joo kadanna, natangngah-tangngahhi lan penawanna kumua apa battuananna joo passalama'.

³⁰ Mangkadami joo malaeka' nakua, “Maryam, danggi' mumalaja', nasaba' napumasannangko Puang Allataala.

³¹ La keba'tangko ammujajian mesa' pea muane, na la musangaii Isa.

³² La mala'bihhi joo pea nadisanga Anak Allataala jao majaona. La naangka'i Puang Allataala menjaji Raja susi Raja Daud, tojolona.

³³ Na la mparenta bati'na Yakub. Na ia to kadatuan-Na te'da cappa'na.”

³⁴ Mangkadami Maryam nakua, “Umbo nakua la jaji tuu, na ana'dara unapa'?”

³⁵ Mebalimi joo malaeka' nakua, “Roh Allataala la rratuiko na kuasan-Na Puang Allataala la torro ssolanko. Iamo joo namala'bih joo pea la jaji nadisanga Anak Allataala.

³⁶ Parallu muissen, Elisabet to rapummu, annanmi bulanna keba'tang, moiraka nakua ngasanmo to tau tamanangngi, sanga matuami.

³⁷ Te'da to apa tanglajaji napugauk Puang Allataala!”

³⁸ Mangkadami Maryam nakua, “Ia tee aku' kaunannana' Puang Allataala. Ake'mo najaji lako kaleku', susi tuu mupau.” Mangkai joo too ta'demi joo malaeka'.

Maryam male ssikitan Elisabet 1:39-45

³⁹ Mangkai joo too malemi Maryam lako mesa' kota jio padang membuntunna tana Yudea.

⁴⁰ Ia tonna ratumo lako, mentamami bolana Zakharia, namangbere sallang lako Elisabet.

⁴¹ Ia tonna sa'dingmi Elisabet to passalama'na Maryam, nakuasaii Roh Allataala, nata'pa pundiu to tau lan ba'tangna,

⁴² anna gumalasi Elisabet nakua, “Ee, ikomo baine to kaminang dibarakka'i to sininna baine! Dibarakka'i tooi tuu tau la mujajian!

⁴³ Indara' tee, anna ratura indo-Na Puangku' ssikitanna'?

⁴⁴ Kusa'dingna passalama'mu, pundiumi to tau lan ba'tangku', sanga kamarioanna.

⁴⁵ Masannangko iko, nasaba' mukatappa'i kumua la jaji to apa napauanko Puang Allataala.”

Maryam mpakala'bih Puang Allataala 1:46-56

⁴⁶ Mangkadami Maryam nakua, “Kupakala'bih to Puang Allataala,

⁴⁷ na mariona', nasaba' Puang Allataala mpasalama'na'.

⁴⁸ Naingaranna' dikka' aku' tokai'da'-i'da'! Mammula tee too nakua sininna tau kumua masannangna'.

⁴⁹ Nasaba' Puang Allataala to makuasa mpupenjaji tauna'. Dipakala'bih sangan-Na!

⁵⁰ Napangpekitanmi to kamamasean-Na lako mangpapa'-papa' bati' to ngkasiri'i.

⁵¹ Napangpekitanmi to kuasan-Na, Napasisarambui to tomajao penawanna, na tangjaji to pangtangngaranna.

⁵² Napamajiong to raja, anna te'damo namangparenta, Napaendek tuka'i to tokai'da'-i'da'.

⁵³ Nabenni to totangbarah na sabarahna, na ia to tosugih nasua pole mangpala' lo'bang.

⁵⁴ Natulungmiki' to to-Israel, taun-Na, situru' basse-Na lako tojolota'.

⁵⁵ Naingaran bang Puang to basse-Na, mpangpekitan tarruh kamamasean-Na lako Nabi Ibrahim na lako sininna bati'na.”

⁵⁶ Torromi Maryam jio bolana Elisabet agi-agi tallung bulan, namane' pole lako bolana.

Kajajianna Nabi Yahya 1:57-66

⁵⁷ Nadete'mi allo kakeanakanna Elisabet, njajianmi pea muane.

⁵⁸ Ia tonna sa'ding ngasanmi bali bolana sola rapunna to kamamasean-Na Puang Allataala, mariomi sola Elisabet.

⁵⁹ Ia tonna karuamo allona jajinna joo pea, ratumi to tau la ssunna'i, nalassangaii Zakharia, susi sanganna ambe'na.

⁶⁰ Apa mangkadai to indona nakua, “Tangngia! La disanga ia Yahya.”

⁶¹ Mangkadami tuu lako tau nakua, “Te'da rapummi mpusangai joo sanga.”

⁶² Iamo joo nabenni tau tanda to ambe'na, ngkutanai apara la disanganni joo anakkana.

⁶³ Mpeta'dami batu dinii mangnguki' nauki'i, “La disangai Yahya.” Jangngah ngasanmi to tau.

⁶⁴ Ta'pa mangkadami ambe'na mpakala'bih Puang Allataala.

⁶⁵ Malaja' ngasanmi to bali bolana, na ia ngasan tau ncuritai joo kareba jio sininna membuntunna tana Yudea.

⁶⁶ Padami tossa'dingngi, mangpikkiri'i nakua, “Ba'tu la umbo ia susinna joo pea keanu'?” Nasaba' pajan, kumua narande pala'i Puang Allataala.

Zakharia mpakala'bih Puang Allataala 1:67-80

⁶⁷ Nakuasaii Roh Allataala joo ambe'na Nabi Yahya napaui to pepasan-Na Puang Allataala nakua,

⁶⁸ “Tapakala'bihhi to Puang Allataala, Puangta' kita' to-Israel, sanga ratumi ntulungki' anna la'bakki'.

⁶⁹ Nabenmiki' Tomangpasalama' to makuasa, bati'na Raja Daud, taun-Na.

⁷⁰ Susi to pura napau Puang Allataala tonna anu', napatarruhhi nabin-Na to pura napilei kumua,

⁷¹ la napasalama'ki' jio mai ewalinta', na jio mai kuasanna to tongkaba'ciki'.

⁷² Nampangpekitanmo kamamasean-Na lako tojolota', naingaranmi to basse mala'bih-Na.

^73-74 Massapahmo lako Nabi Ibrahim, ambe' tojolota', kumua la napasalama'ki' jio mai ewalinta', anna te'damo tamalaja' ssompai,

⁷⁵ antapangben kaleta' lako Puang, napumasannangngi penawan-Na, padapi tanii tuo.

⁷⁶ Ee anakku', la disangako nabin-Na Puang, to Puang Allataala makuasa. Disuako njoloan Puang, la mpasadianni lalan naola,

⁷⁷ la mpangpeissenanni lako umma'-Na, kumua la dipasalama'mi, ke nadampanganmi Puang Allataala.

⁷⁸ Mamase na manana' Puangta'. Ratumi la mpasalama'ki'. Susi to allo ollong ke makale'

⁷⁹ la nnarrangngi sininna tau, to tuo lan kamalillinan na kamalajatan. Napatujuki' lako lalan to nanii kasikalinoan.”

⁸⁰ Samatonggo-tonggona na saendek-endekkena toomi sumanga'na tee anakkana Zakharia. Torromi jio padang pallawangan, sanadete'na wattunna mpangpekitan kalena lako to-Israel.