Kada Bulawan 23 - Alkitab Duri

–6–

¹ Ia ke cumadokkoko kumande sola tomapangka', ingaranni inda joo musioloan.

² Ia ke gaja doangmoko kumande, ta'tanni jolo' joo kamadoanganmu.

³ Danggi' musokoi to kande marasa napasadia, la naniiri nnissen sipa'mu.

–7–

⁴ Danggi' muparukui la messugih. Pajaii joo akkatta susi joo.

⁵ Nasaba' cingga'tu'ra nalanynya' to ewanan, butung to kepani' male mentia' susi langkan.

–8–

⁶ Danggi' mukande kandena tomacecceng. Danggi' mukacinnaii to kande marasanna,

⁷ nasaba' den nareken llan penawanna. Nakuanko, “Takumande! Pado'pi,” apa sitonganna te'da nalantuk penawanna.

⁸ Iamo dau ke mangkai mukande mulua pole'i, na sininna to kada macanningmu lako, te'damo bua'na.

–9–

⁹ Danggi' mupangngajahhi to tobattuk, nasaba' te'da na la nnangga'i to kada bulawanmu.

–10–

¹⁰ Danggi' lalo mupalele patok katonan to nang denmo tempon jiona mai, ba'tu nnala padangna pea biung.

¹¹ Nasaba' mawatang to tomangla'bakna, la Naewako mpangkadananni to kara-karana pea biung.

–11–

¹² Parinawa tonganni to pangpangngajah, patanan rampa'i talingammu lako sininna kada kapaissenan.

–12–

¹³ Danggi' paja mpangngajahhi anakkamu. Ia ke mupekajui, te'dara nalampumatei.

¹⁴ La mupekajui, dikuara napusalama'i jio mai lino tomate.

–13–

¹⁵ Ee anakku', gaja mariona' ke maccako.

¹⁶ Gaja sannangna' ke messunni jio timummu to kada tongan.

–14–

¹⁷ Danggi' mangngimburu lako tompugauk bang dosa, apa da'tanko ngkalaja' ngkasiri' Puang Allataala,

¹⁸ namelo to katuoanmu to muoloi lako, muampa'i to apa murannuan.

–15–

¹⁹ Ee anakku', pesa'dingngii memmaccako, parinawa meloi to tujunna katuoanmu.

²⁰ Danggi' lalo musisoba' to topangmalangoan ba'tu tomaullak,

²¹ nasaba' nang la menjaji tokaasi-asii. Ia ke mamma'-mamma' manda mupugauk, undinna dau nang la mebaju titape-tapeko.

–16–

²² Pesa'dingngii to ambe'mu, nasaba' iara muden, angga'i to indomu moi namatuamo.

²³ Ia to sininna katonganan, kamaccan, pangpangngajah na kamapahangan sipato' mupengkullei muampui, danggi' lalo mupaboko'i penawa.

²⁴ Liwa' napumasannang ambe'na, ke makassingngi to anakkana, napumarioi ke maccai.

²⁵ Ake' napumarioko indo ambe'mu, napumasannangko pajajianmu.

–17–

²⁶ Ee anakku', kita rampa'i to katuoanku', mupangpasusii!

²⁷ Ia to baine bandarang butung garuang gaja dalan, na ia to baine sala kedo susi poja gaja mecilakai.

²⁸ Susii parampo' kumuku-muku la mangjokko, napusaba'i buda muane te'da napugauk janjinna lako balinna.

–18–

²⁹ Indara to masessa? Indara to sumarro? Indara to massipura? Indara to salle sarro? Indara to kojong kalena to te'da naissenni saba'na? Indara to malea matanna?

³⁰ Iamo to tosiupuh bongi cumadokko mangiso' anggoro' na nakabudai nniso' tuak dirau.

³¹ Danggi' lalo napamacinnako anggoro' moiraka nagaja melo dikita, macinnaki' ngkitai pancillang-cillang llan isotan, na gaja rasa diamma'.

³² Apa undinna, susimoko to mangka natitto ulah napa'dikkiko ipohna.

³³ Na makalaen-laen to apa mukita mumangkada tangmalilingan.

³⁴ Susiko to jao kappala' naroge bombang llan tangnga tasik susi to jao potok ariri kappala'.

³⁵ Mumangkada kumua, “Dibunona' pale', na te'da kusa'dingngi, ditampelengna', na te'da kurasai. Piranra kulamangngingaran kunnangah o anggoro'?”