Kada Bulawan 2 - Alkitab Duri

Den bua'na to macca

¹ Ee anakku', tarimai to pangpangngajahku', mutuli nningaranni to pangpatujungku'.

² Parinawa tonganni to macca, mupatuju lakoi kamapahangan to penawammu,

³ peta'dako kamapahangan mumetamba meta'da arannai mapahang tonganko,

⁴ muangahhi butung to nnangah pera', ba'tu butung to nnangah ewanan jiong litak mandalan.

⁵ Ia ke mupugauk ngasanni joo, la mupahang apa battuananna to ngkalaja' ngkasiri' Puang Allataala muwa'ding nnissenni inda to Allataala,

⁶ nasaba' Puang Allataala mbenki' kamaccan, na pole jio mai kadan-Na to kapaissenan sola kamapahangan.

⁷ Ia mpasadian pangtulungan lako tomaruruh penawanna, Nabutung perisai llendungngi tote'da caccana.

⁸ Da'tan njagai katuoanna totangmangpasilaenan, na mparakai katuoanna to tonturu' pakkaeloran-Na.

⁹ Iamo muwa'ding mapahang jiona kamakassingan, tangmangpasilaenan mumaruruh penawa, umbopi la muissen umbo dikua tuo mangpanggaukan melo.

¹⁰ La maccako, na kapaissenanmu la mpamasannangko.

¹¹ Naparakaiko kamatarrusan pangpikkirisanmu, najagaiko kamapahanganmu,

¹² dikua nadanggi' mumangpanggaukan gaja' mupamambela kalemu jio mai tomajekkong

¹³ to ssalai lalan maruruh, nannola lako lalan kamalillinan,

¹⁴ tomasannang mpugauk kagajatan, tompumario nnuraga tau,

¹⁵ totuli majekkong, nalao sala.

¹⁶ La maccako dikua mula'pah jio mai baine bandarang. Danggi' muturu'i to bainena tau massede manggauk sala.

¹⁷ Ia to baine susi joo ssalaimo muanena, to nasialan tonna malolle'pa, na te'da naingaranni to bassena tonna botting, to mangka naakui jio olo-Na Allataala.

¹⁸ Ia ke maleko lako bolana battuananna mangnguju lakoko kamatean, pada una to mbawa kalemu lako lino tomate.

¹⁹ Sininna to nturu'i to baine susi joo te'damo nakullei pole la mangnguju lako lalan katuoan.

²⁰ Iamo joo, turu'i to panggaukanna tomelo penawa, mualai palelean mata to tomakassing.

²¹ Nasaba' ia to tomaruruh penawanna, iamo la ntorroi tana Nabasseanni Puang Allataala, sininna to tote'da caccana la torro tarruh jio.

²² Apa ia to togaja' la dilanynya'i llan mai joo tana, na ia to totangdikatappa'i la diula'i llan mai.