Lucas 4 - Yura porciones de la biblia

Na yurawu radubatiaditu Jesús chakawabapaidi

¹ Espíritu Santo Jesús mera ika idi. Naya Jesús ede Jordán aduax udi. Na tsua ikabadu Espíritu Santopa Jesús iyudi.

² Naskaidu na yurawu radubatiaditu cuarenta peda Jesús chakawabapaidi. Jesúspa awa pidiba. Ma cuarenta peda ikadu Jesús wudikuidi.

³ Na yurawu radubatiaditu Jesús yuidi: “Mi Diospa Wakemaiki da ruwe yuiwe pantanu”, wadi.

⁴ Jesúspa kebadi: “Na Diospa tsai adu kedea ẽ bia dikabanu: ‘Piti wisti udua yurawu ditiruwuba’. Naduri kedea”, Jesúspa wadi.

⁵ Naskata na yurawu radubatiaditu Jesús machiwãri iyudi. Machiwãrixu naatiiwi diaiwuu atũ yurawuya atu Jesús kushi uĩbadi.

⁶ Naskata yuidi: “Na mi uĩyawu na awara pei sapa ichapatu yurawawe witiruwuya naatiiwi ẽ bia inatiru mi atũ iwu inu. Naawu wetsã ea inadi. Watura wetsa naawu ẽ inapaikĩ ẽ inatiru.

⁷ Naawu ẽ bia inanu ea duikĩ mewẽ ratukunu bai chachipakewuwawe”, wadi.

⁸ Jesúspa kebadi: “Na Diospa tsai adu kedea ẽ bia dikabanu: ‘Matu Diaiwu Dios duikĩ matu ratukunu bai chachipakewuwakawe. Naa wisti dikakawe yuduxuxikakĩ’. Naduri kedea”, Jesúspa wadi.

⁹ Naskawadu na yurawu radubatiaditu Jerusalén adu Jesús iyudi. Dukuta oración pexe mamakayakui iyudi. Naskata yuidi: “Mi Diospa Wakemaiki duduax pakewe.

¹⁰ Na Diospa tsai adu kedea ẽ bia dikabanu: ‘Diospa na dai arixu awẽ tsai webiswu kekẽxiwi bia kexenuwu.

¹¹ Mi pakeaitu bia pitsuiniwuwaxikadi mi ruweki yutekebeyabanu’. Naduri kedea”, na yurawu radubatiaditu wadi.

¹² Jesúspa kebadi: “Na Diospa tsai adu kedea ẽ bia dikabanu: ‘Matu Diaiwu Dios chakawabapaiyabakawe’. Naduri kedea”, Jesúspa wadi.

¹³ Aweskawaxu Jesús chakawabatiruxakĩba na yurawu radubatiadi abakiduax kadi wetsatiã chakawabapaiyaxakĩ.

Galilea bai aduxu Jesúspa yurawu atu tapibakĩ taewadi

¹⁴ Jesús Galilea bai adu dasudi. Espíritu Santo uduax Jesús bitsisipa idi. Naatiiwi na bai adu ipaudiwawe Jesús udua yuipaudiwu.

¹⁵ Atũ sinagoga pexe aduxu Jesúspa atu tapibawuwasawapaudi. Naatiiwawe “Jesús sharakui”, wapaudiwu.

Nazaret adu ipaudiwawe Jesús retepaidiwu

¹⁶ Pexe ichapa Nazaret adu Jesús kadi naa pexkudi adu. Sábadowaidu sinagoga pexe ikikaĩdi na ipaudi keskai. Chipu na Diospa tsai kedea adu adexikĩ diinakawãdi.

¹⁷ Na libro profeta Isaíaspa kededi sinagoga pexe aduxu judíowu atu awara axupauditu Jesús inadi adenu. Naa libro wepeta na adepaiyai wichidi. Wichixu duduri adekĩ atu dikabadi:

¹⁸ “Diaiwu Diospa awẽ Espíritu Santo ewe dia. Ea kañawaa na awayabawu ẽ atu Diospa tsai shara yuinu. Ea nichia ẽ na yurawu wetsawawe achikaxu nichikaspakadi ẽ nawu yuinu: ‘Ẽ batu nichiyua’, atu wanu. Ea nichia ẽ wexuwu kayawanu. Ea nichia ẽ yurawu nichinu wetsawawe ana atu chakawayabanuwu.

¹⁹ Ea nichia ẽ yurawu atu yuinu: ‘Da wari Diospa batu sharawaaxiwi’”, Jesúspa wadi.

²⁰ Libro weputa na sinagoga pexe aduxu judíowu atu awara axupaudi naa Jesúspa libro nasudi. Naskata Jesús tsaudi. Naatiiwixu aas uĩdiwu.

²¹ Jesúspa atu yuidi: “Nawu ẽ adea keskara datiã ma iki taei eemai Espíritu Santoyake. Naskatariwi Diospamai ea kañawadike nawu ẽ anu”, atu wadi.

²² Jesúspa tsai shara yuiyaitu dikakadi wetsa keskaradiwu. A udua yuisharakĩ wetsadiwu. Naskata awirasi yuinanadiwu: “Datsiwi Josépa awẽ wakeki”, iki wetsediwu.

²³ Jesúspa atu yuidi: “Na ma yuitiru keskara ea ma yuikaiki: ‘Doctor, biwi kayawanabewe’, ea ma waikai. Naskatariwi ma ea yuikai: ‘Na mi pexe ichapa Cafarnaúm aduxu akita keskara ma nu dikaita. Na mi arixu akita keskawakĩ duduax na mi pexkudi aduxuriwi awe’, ea ma waikai.

²⁴ Ẽ batu yuikuinu. Watura profeta wetsa na pexkudi adu kaitu yurawawe iwikaspatiruwu.

²⁵ Profeta Elías ipauditiã tres wari ita seis uxe ui wediba. Israel bai adu ipaudiwutii wunaipaudiwu. Ẽ batu yuikui. Israel adu iyubawawu ichapa ipaudiwu.

²⁶ Naskaweke nuku iyubawawu adu Diospa Elías nichidiba. Iyubawa wetsa adu nichidi. Naa iyubawa pexe ichapa Sarepta adu ipaudi pexe ichapa Sidón chaiba.

²⁷ Profeta Eliseo ipauditiã Israel bai adu iruba isiyawu ichapa ipaudiwu. Naskawiyaiwawe Diospa nuku iruba isiya ipaudiwu atu kayawadiba. Dukuwede awẽ ade Naamán kayawadi. Naa iruba isiya ipaudi Siria bai adua ipaudi”, Jesúspa atu wadi.

²⁸ Naduri yuiyaitu dikakadi sinagoga pexe adua yurawu naatiiwi sidakui wetsediwu.

²⁹ Widiniwuwakata Jesús pitsikiyana Nazaret aduxu tsekadiwu. Machiwã mamakaya atũ pexewu idiwu. Mawawãri Jesús iyudiwu. Narixu putapaidiwu.

³⁰ Naskaweke Jesús atu nexpakayaduax kaĩkaĩdi.

Jesúspa dukuwede awẽ kaya meradua waka keskara putadi

³¹ Jesús pexe ichapa Cafarnaúm adu kadi Galilea bai adu. Narixu sábadowaidu yurawu tapibadi.

³² Jesúspa atu tapibaitu dikakadi wetsa keskaradiwu. Shinadiwu: “Diaiwu bitsisipatu yuiyadu duku tapibai”, wadiwu.

³³ Naa sinagoga pexe adu dukuwede waka keskaratu iwuwaa ipaudi idi. Naatu wasĩkui Jesús tsai ewapatu yuidi:

³⁴ “¡Duku wekaxtiwayabawe! Jesús na Nazaret aduatu, ¿aweskakĩ mia duku chakawaiyuame? ¿Mi duku mituiyuame? ¡Ẽ bia tapia! ¡Dios aduax mi udi! ¡Mi Diosna!” wadi.

³⁵ Jesúspa na waka keskara yuidi xatenu: “Tsaiyabawe. Da dukuwede awẽ kayaduax tsekekaitawe”, wadi. Naskawaidu na waka keskaratu na dukuwede yurawu nexpakaya nama putadi. Dukuwene awẽ kayaduax tsekekaĩdi awa chakawataba.

³⁶ Naatiiwi wetsa keskaradiwu. Naskata awirasi yuinadiwu: “Na tsai datu yurawu atu tapibairuku na tsai wetsawawe atu tapibabiswu keskarabaki. Diaiwu bitsisipatu Jesús yuiyaidu Jesúspa awẽ tsai bitsisipatu waka keskarawu kekẽaitu yurawawe atũ kayaduax tsekewaĩtiruwu”, iki wetsediwu.

³⁷ Naatiiwi na bai adu ikawawe Jesús udua yuikadi idiwu.

Simónpa awẽ rayus Jesúspa kayawadi.

³⁸ Sinagoga pexe aduax kaĩta Jesús Simónpa awẽ pexe adu ikidi. Nadu Simónpa awẽ awĩni awa yudapawã idi. Jesúspa kayawanu yuidiwu.

³⁹ Amanau kakupakekawa yudapawã yuidi: “Ana yudabayabawe”, waidu ana yudadiba. Nadu widinakawãdi. Naskata atu pibadi.

Jesúspa isinikaiwu ichapa kayawadi

⁴⁰ Ma wari kaadu Jesús adu naatiiwi na isinikaiwu ewediwu. Atũ isi wetsa keskarawu idi. Wisti rasi Jesúspa awẽ meke atũ bapu adu mamakĩ atu kayawapadi.

⁴¹ Waka keskarawu yurawawe atũ kayaduax tsekekakĩ wasĩkui Jesús tsai adiwu: “¡Mi Diospa Wake!” wadiwu. Jesúspa atu tsaitibawadi. Waka keskarawawe tapia idiwu Diospa Jesús kañawadi naatiiwuna atũ Diaiwu inu. Naskawaiwawe atu tsaitibawadi Jesúspa.

Jesúspa Diospa tsai yurawu atu yuiwuwasawadi

⁴² Ma pedadu na pexe ichapaduax tsekekaĩdi na tsua ikabari Jesús kadi. Yurawawe wedadiwu. Wichikaxu netewapaidiwu atuwe netenu.

⁴³ Naskaiwawe Jesúspa atu yuidi: “Pexe ichapa wetsawu aduriwi ẽ yurawu Diospa awẽ tsai shara ẽ atu yuiwuwasawanu eamai Diospa nichidike ẽ yurawu yuinu: ‘Dios yurawawe atũ diaiwu ipai’, ẽ atu wanu”, Jesúspa atu wadi.

⁴⁴ Naskata Judea bai aduxu sinagoga pexewu aduxu atu Diospa tsai shara yuiwuwasawadi.