Lucas 21 - Yura porciones de la biblia

Iyumawa Dios duikuidi

¹ Oración pexe aduxu na awa yupaiba ipaudiwawe pei sapa wapaudiwu mera pei sapawu miiyaiwawe Jesúspa atu uĩ idi.

² Iyubawa awayabatu pei sapa wake rawe miiyaituriwi uĩdi. Askara pei sapã tsuã awa ichapa witiruba ipaudi.

³ Jesúspa auxũ tapipaudiwu atu yuidi: “Ẽ batu yuikuinu. Da iyubawa awayabatu ichapa ina. Na awa yupayaiwubawawe ichapa inawuba.

⁴ Naawawe atũ pei sapawu na atuki texea inawu. Da iyubawa pei sapa ichapayayabawixu nikisi ina. Datiã awane awẽ piti witiruba”, Jesúspa atu wadi.

Jesúspa auxũ tapipaudiwu atu yuidi: “Oración pexe ana inupukuiba”, atu wadi

⁵ Atiriwi Jesúsuxũ tapipaudiwawe oración pexe udua yuikadi tsainiwuwadiwu: “Yurawawe ruwewa sharashtakuiyuxũ oración pexe sharashtakuiwadiwu. Na yurawawe awara shara Dios inayabeawu netakekaxu naskawakaxuri oración pexe sharashtakuiwayakeyabeawu”, wadiwu. Naskawawiyaiwawe Jesúspa atu yuidi:

⁶ “Ẽ batu yuinu na ma uĩyai udua. Wetsatiã wetsawawe oración pexẽ awẽ ruwewawu naatiiwi pau anupukukadi. Da ruwewawu bai adu inupukukadi”, atu Jesúspa wadi.

Jesúspa auxũ tapipaudiwu atu yuidi na inupukuwai keskara

⁷ Na auxũ tapipaudiwawe Jesús ñukadiwu: “Diaiwũ, ¿askara awetiã iixiwime? ¿Awa nu uĩxu nu tapixiwime na mi yuiya askaxiwaitu?” wadiwu.

⁸ Jesúspa atu yuidi: “Uĩta ikawe batu parayabanuwu. Yura ichapatu batu yuixikadi: ‘Ẽ na Diospa kañawadi naatiiwuna atũ Diaiwu inu. Na Diospa yuidi keskara sababashta iki’, waaxikadi. Atuwe wuyabakawe. Atu ikũira wayabakawe.

⁹ Yurawawe batu ‘Soldadowu soldado wetsawuwe retenakadi. Naskatariwi atũ diaiwu putaxikakĩ yurawu soldadowuwe retenakadi’, batu waiwawe dikai rateyabakawe. Rewu naskanupukui. Naskaweke Diospa naatiiwi adaiti inupukuiba”, wadi.

¹⁰ Naskawata atu yuidi: “Yura wetsawuwe yurawu retenaiwudu xuku wetsawuri xuku wetsawuwe retenanupukukadi.

¹¹ Bai ichapawu adu wasĩkui bai daya daya ikaidu bai kaxkei wetsenupukukadi. Bai ichapawu aduax yurawu wuni danupukukadi adu ana pitiyabake. Bai ichapaduax yurawu isi besekuiwawe inupukukadi. Yurawawe dai aria awara besekuiwu uĩnupukukadi. Dai ari na uĩbisbawu keskarawu uĩkaxu tapinupukukadi awara aweskaraxiwaitu.

¹² Askayuataiba na batu duikaspabiswawe batu achikaxu batu chakawaaxikadi. Sinagoga pexewu adu batu iyuxikadi batu ñuaxikakĩ. Naskakata cárcelwu adu batu iyuxikadi. Euxũ yurawawe atiriwi batu diaiwu datukuiwu adu iyukata atiriwi diaiwu wetsawu adu iyuxikadi batu ñuaxikakĩ.

¹³ Naskawuadu ẽ udua na diaiwuu ma atu yuitiru iixikadi.

¹⁴ Yurawawe diaiwuu adu batu iyuwawubadu shinayabakawe na ma yuiyai diaiwawe werutaiwi euxũ batu ñuaiwawe

¹⁵ eemai batu tapibaxiwi kayakawi ma atu yuinu ma na tapiwaĩkatu kebatiru keskawanu. Na ma yuixiwai na batu duikaspabiswawe batu winubatiruwu iixiwiba. Naskatariwi tsuã batu ‘Maawawe yuikuiba’, batu watiru iixiwiba.

¹⁶ Matu epa, matu ewa, matu dadeawu, matu kaiwu wetsawu, na batuwe rawebiswu naawawe na batu duikaspayaiwu batu achibaxikadi. Naskawuadu atiriwi batu retexikadi.

¹⁷ Euxũ naatiiwixu batu duikaspaxikadi.

¹⁸ Naskawia matu bapu aduax wuu wisti weduxiwiba.

¹⁹ Euxũ batu chakawaiwudu matu uĩti bitsiswainiwuwakawe ea ikũira wapaxikakĩ. Naskax ma Dioswe ipadaka.

²⁰ Soldadowawe pexe ichapa Jerusalén dakiwaiwawe uĩkĩ nadu ma tapinupukui ma sababashta Jerusalén pau aaxikadi.

²¹ Soldadowawe Jerusalén dakiwaiwawe uĩ na Judea bai adu ikawu machiwãwu ari ichutanupukunuwu. Na Jerusalén adu ikawu Jerusalén aduax ichuta tsekewaĩnupukunuwu. Na baewu adu ikawu Jerusalén adu weyabanupukunuwu.

²² Naatiã Diospa na Jerusalén adu ikawu atu ubiskuibanupukui. Na inupukuwai udua profetawawe kedediwu Diospa na Jerusalén adu ikawu ubiskuibanupukuwaitiã naatiiwi naskakuinupukui.

²³ Naatiã na awĩwawe wake dadea inupukuwaiwuwe na awĩwawe wake xuba abanupukuwaiwu naawu ubiskui widanupukukadi Judea bai aduamai judíowu Dios atuki sidakĩ atu ubiskuibanupukui. Ubiskuikuinupukukadi.

²⁴ Na batu duikaspabiswawe atiri batu retekata atiriwi batu achinupukukadi bai wetsawu ari batu iyuxikakĩ. Jerusalén aduxu judíowubawawe naatiiwi pau akata na Jerusalén adu ikawu atu chakawanupukukadi. Diospa na judíobawu atu axuwaidu naawu na Jerusalén adu ikawawe atũ diaiwuu iyunupukukadi. Na wariwutiis judíobawawe na judíowu atu chakawanupukukadi”, atu wadi Jesúspa.

Jesús ma uuxikĩ ikaidu yurawawe na uĩbisba keskarawu uĩnupukukadi

²⁵ Jesúspa auxũ tapipaudiwu atu yuidi: “Wari adua, uxe adua, exteweruwu aduariwi yurawawe na tsuã uĩbisba keskara uĩnupukukadi. Naawu uĩkakĩ tapinupukukadi awara aweskaraxiwaitu. Bai adu enewã wechumawã ikaitu dikakadax naatiiwi yura xuku wetsawu ratekuinupukukadi. ‘¿Nu awa atirume?’ inupukukadi.

²⁶ Exteweruwu daya dayainupukukadi. Naskaitu uĩkakĩ yurawawe duduri shinanupukukadi: ‘¿Baiwutii aweskakadime?’ inupukukadi. Atũ ratepa nisunupukukadi.

²⁷ Dukuwene Wake udua yuikĩ ẽ udua ẽ batu yuinu. Na ẽ batu yuiyawu ma naskadu dai ariax Dukuwene Wake nishu mera unupukui. Ẽ bitsisipakui inupukui. Ewẽ yurã chaxai inupukui warĩ chaxai keskai. Naskaitu ea naatiiwixu uĩnupukukadi.

²⁸ Na ma uĩbisba dai mera ikaitu uĩkadi awaki besetiruba ita iki chipu diakawe ẽ batu sababashta comprawayuwaidakaki ma ewena inu”, Jesúspa atu wadi.

²⁹ Naskawata tsai wetsawaxu atu yuidi: “Iwi higuera udua shinayabakĩ watura iwi wetsa udua shinakawe tapixikĩ.

³⁰ Atũ pei chukuwaiwawe uĩkĩ bawikui ma tapitiru ma wariya uwaidu.

³¹ Naskari wakĩ na ma uĩbisba keskara uĩkĩ maawawe tapinupukui sababashta Dios naatiiwitu atũ diaiwu iwaidaka.

³² Ẽ batu yuikuinu. Na ikawu dayuawubadu naatiiwi ẽ batu yuiyawu keskawaidaka.

³³ Daiwe bai yabarakanupukui. Naduri ma ikũira watiru. Naskaweke duduri ma ikũira wakuitiru: na ẽ yuiya naskakuinupukuiki.

³⁴ Uĩwaĩ ikadi ubiskuiyabaxikakĩ iskarawawe: Matu yura chakanayabanuwu chakapaikĩ shinakawe askayabaxikĩ. Paeyabakawe. Wetsa shinachakata wetsa shinachakata wayabakawe. Askayabakawe na ẽ batu yuiyawu atiru iixikakĩ. Ea ma shinayabaidu ẽ utiruki. Iriyauikui ẽ unupukui.

³⁵ Ẽ uadu naatiiwi yurawawe baitii aduxu trampabakidua waki ichutiruba keskara beenupukukadi.

³⁶ Naskake dikakatasawawaĩkawe Dios kiwĩkĩ naatiiwi na ẽ batu yuiyawu ikaitu tedetiru iyaxakakĩ ẽ wewu Dukuwene Wake wewu ma rawĩtaba ditiru inupukuxikakĩ”, Jesúspa atu wadi.

³⁷ Pedatiiwi oración pexe aduxu atu tapibapaudi. Naduax tsekekaĩdax yabetiiwi bachi awẽ ade Olivo nadu ipaudi.

³⁸ Wenamarikui naatiiwi yurawu widiniwuwakata aki wepaudiwu oración pexe aduxu Jesúspa atu tapibayaitu dikaxikakĩ.