Lucas 15 - Yura porciones de la biblia

Tsai wetsawaxu Jesúspa ovejawu kexebisya oveja wedua udua yurawu atu yuidi

¹ Peda wetsa nawawe na naatiiwuna atũ diaiwu ipaudi pei sapawu wixupaudiwu naatiiwi atuwe yurawu chakapaudi ichapawu Jesúski wediwu awẽ tsai dikai wekadi.

² Naskaiwawe uĩkaxu fariseowawe na dukuwedewawe na Diospa Moisés kedebadi yurawu atu tapibapaudiwaweriwi Jesús yuitiwadiwu: “Daatu yurawu chakabiswu iwitiru. Atuweta pitiru”, wadiwu.

³ Naskawaiwawe dikakĩ tsai wetsawaxu atu yuidi:

⁴ “Watura wetsa ma cien ovejayaadu wisti weduadu noventa y nueve oveja wasi adu atu uĩwerãta naa wedua mi wedai kai katiru. Mi wedawuwasawatiru. Wichixuba mi wedakĩ xatetiruba.

^5-6 Wichixu idibayana mi pewewerãtiru mewẽ pexe adu ukĩ. Mewẽ pexe adu dukuta na bewe rawebiswuya na mewẽ chaiba ikawuriwi atu mi kedatiru: ‘Ewe idibakawe. Ewẽ oveja wedua me wichiaki’, mi atu watiru.

⁷ Naskariyai yura chakabis wistichi ana chakayabaxikĩ shinaidu aki na dai mera ikawu idibakuixikadiki. Aka noventa y nueve yurawawe na Diospa duiyai axikakĩ shinawaĩ atiruwu atuki na dai mera ikawu idibakuixikadibaki naawu raba chakakaxuba chakayabaxikakĩ shinatiruwubawia”, Jesúspa atu wadi.

Tsai wetsawaxu Jesúspa awĩwuya awẽ pei sapa wedua udua yurawu atu yuidi

⁸ Jesúspa dukuwede chakawuweta piyaitu uĩkaxu yuitiwaawu naawu Jesúspa tsai wetsawaxu atu yuidi: “Awĩwu diez pei sapayadu wisti weduadu lamparín utata awẽ pexe mera matsukĩ uĩsharata wedatiru. Wichixuba wedakĩ xatetiruba.

⁹ Wichixu na awe rawebiswuya awẽ chaiba ikawuriwi atu kedata atu yuitiru: ‘Ewe idibakawe. Ewẽ pei sapa wedua me wichiaki’, atu watiru.

¹⁰ Naskariai yura wisti chakabistu ana chakayabaxikĩ shinaidu aki na dai arixu Diospa tsai webiswu idibatiruwuki”, Jesúspa atu wadi.

Tsai wetsawaxu Jesúspa apaya awẽ wake wedua keskara ipaudi udua yurawu atu yuidi

¹¹ Jesúspa dukuwede chakawuweta piyaitu uĩkaxu yuitiwaawu naawu Jesúspa tsai wetsawaxu atu yuidi: “Dukuwede wake raweya idi.

¹² Chipuketu apa yuidi: ‘Epã, na mi daadu mewenawu uchiwe ẽ paxkananupukutiru datiã mi dayuxuba duku paxkaxuwe’, wadi. Naskawaitu apã awenawu paxkadi awẽ wake rawe atu inaxikĩ.

¹³ Naskaitadu awẽ wake chipuketu naatiiwi awenawu ichawata naawuya bai wetsa ari chaikui kadi. Nariax na pedatiiwi awẽ pei sapawuũ chakapaudi. Naskawaxu awẽ pei sapawu keyudi.

¹⁴ Naatiiwi awẽ pei sapawu ma keyuadu naa bai aduax ma piti keyuikai idi. Pitiyaxba wudi taedi.

¹⁵ Dukuwede na bai adu ipaudi aki kaxu yuidi: ‘Ẽ bia yuduxupai’, wadi. Naskawaitu wasiwu adu nichidi awẽ chanchowu kexexunu.

¹⁶ Naskadu chanchowu wibi xakawu pibai wudikuikĩ xakawu pipaidi. Naskawiyaitu tsuãkai a pibadiba.

¹⁷ Nadu shinatadi: ‘Na ewẽ epa yuduxubiswawe pisharatiruwu. Na pikaxu texewawu nadu itiru duduax ẽ wuni daidu.

¹⁸ Ewẽ epa ikadu ẽ kai. Dukuta ewẽ epa ẽ yuitushikai: “Epã, ẽ Dioski chakabis. Bikiri ẽ chakabis.

¹⁹ Naskake mia yuitiru: ‘Mi ana ewẽ wakeba’, mia watiru. Na bia yuduxubiswu wetsa keskara ea wawe”, ewẽ epa ẽ waikai’, idi.

²⁰ Naskata apa shinawaĩdi kadi. Kaitu chaikidua apã awẽ wake wichidi. Ubisbadi. Aki ichudi. Pishkuwaĩ tsu adi.

²¹ Naskaitu apa yuidi: ‘Epã, ẽ Dioski chakabis. Bikiriwi ẽ chakabis. Naskake mia yuitiru: “Mi ana ewẽ wakeba”, mia watiru’, wadi. Naskawawiyaidu

²² apã awẽ uibatiwu yuidi: ‘Kushi na saweti sharakui wekawe sawebaxikakĩ. Anillo sawebakata sandaliariwi sawebakawe.

²³ Vacapa awẽ wake xua wekawe retexikakĩ. Nu fiesta wanu ewẽ wakeki idibaxikĩ

²⁴ da ewẽ wake ma dabismai ma ana dia. Ewẽ wake wedubis ma nu wichia’, apã atu waadu fiesta wadiwu.

²⁵ Naskaidu awẽ wake iyua awẽ wai ari katadiyudi. Pexe chaibaxu dikadi músicapa buduwaiwawe.

²⁶ Uibati kedaxu ñukadi: ‘¿Ewẽ epã pexe aduxu awa wakadime?’ waitu

²⁷ ‘Ma mewẽ extu aweskaxba dukua. Naskake mewẽ epa aki idibakui. Vacapa wake xua mewẽ epã duku retebada fiesta waaxikĩ’, wadi.

²⁸ Naskawaitu dikai iyua sidadi. Pexe mera ikikaspadi. Naskake apa awẽ pexe aduax kaĩta apã awẽ wake iyua kexunawadi awẽ pexe adu ikinu.

²⁹ Naskaitu apa yuidi: ‘Wari ichapa me bia yuduxubis. Ua dikayabatadi kaisai ẽ bia wabisba. Naskaweke mia cabrapa wake inabisba idibayana ewe rawebiswuweta ẽ pinu.

³⁰ Aka mewẽ wake chipuketu na mi inabis naatiiwi ma keyuyabea awĩwu ikabiswuki. Naskaweke biki dasuadu aki nikisi idibanuwu mi vacapa wake xua mewẽ uibatiwu mi atu retebada’, wadi.

³¹ Apã yuidi: ‘Epã, mi ewe ibis. Da ewenawutii mewenawu.

³² Mewẽ extu uĩkĩ nu yuiya: “Nu idibai. Nu fiesta wanu”, nu waa mewẽ extu dabismai ma dia mewẽ extu wedubis ma nu wichia’, apã awẽ wake iyua wadi”, Jesúspa atu wadi.