Lucas 14 - Yura porciones de la biblia

Sábadowaidu Jesúspa dukuwede kayawadi

¹ Peda wetsa sábadowaidu fariseowawe atũ diaiwu wetsã awẽ pexe adu Jesúspa pii kai kadi. Nadu fariseowu idiwu. Jesús ñuapaixikakĩ aas uĩkadi idiwu “Nu uĩ wunukawe chakaikaimaiki. Nu Jesús diaiwuu ubiskuibabatirumaiki”, raikadax.

² Naduriwi Jesús wewu dukuwene awẽ yuratiixu edeya idi. Naskake awẽ yura yadi keyua idi.

³ Jesúspa na dukuwedewawe na Diospa Moisés kedebadi yurawu tapibapaudiwuya fariseowu atu yuidi: “Ea yuikapu awa Moiséspa kededimaiki duduri udua sábadowaidu tsuaratu yurawu kayawatirumaiki”, atu wadi.

⁴ Naskawaitu awakai tsaidiwuba. Naskadu Jesúspa na isinikakaĩda awẽ puña meeta kayawadi. Naskata awẽ xanene nichidi.

⁵ Naskata Jesúspa naduawu ñukadi: “Sábadowaidu matu wake iyabai matu vaca pozo mera pakeke ¿ma kushi tsekatirubame?” atu waitu

⁶ awa kebatiru idiwuba.

Jesúspa yurawu tapibadi “Ẽ keskara tsuaba”, raiyabanuwu

⁷ Fariseopa pexe adu na atu yuiyatiixu “Ea ‘Diaiwura’, ea wanuwu”, raikadax na diaiwuwawe rakapaudiwu adu kañawadiwu nadu rakakaxu piixikakĩ. Naskaiwawe uĩxu Jesúspa tsai wetsawaxu atu yuidi:

⁸ “Dukuwedewe awĩwu wianakaxuba na dukuwene batu wetsa yuitiru ma wianawuadu awẽ pexe aduxu pii unu. Pii kaax diaiwuu rakatiruwu adu rakayabawe. Diaiwu bitsisipaxu bia winua uwaitu

⁹ uĩyax na dukuwene batu rawe yuitatu mi bitsisipakuiba raixu bi adu uta bia duduri yuixiwi: ‘Wetsa adu rakawe da dukuwede nadu rakanu’, bia waaxiwi. Naskake na yura awaba rakatiru adu mi rakai kai mi rawĩpaixiwi.

¹⁰ Tsuãra bia yuiyadu ari kaax na awaba rakatirubadu rakawe na bia yuiyatu bi adu uxũ bia ‘Diaiwuu rakatiruwu adu rakawe’, bia wanu. Bia na diaiwuu rakatiruwu adu rakabayaitu na biaya yuitawawe uĩxikadi. ‘Da yura bitsisipa’, bia waaxikadi.

¹¹ Watura wetsã ‘Ẽ bitsisipa’, raixu wetsawu naduri atu shinabapaiyai naa Diospa bitsisipabawaaxiwi. Watura wetsã ‘Ẽ bitsisipaba’, raixu wetsawu naduri shinabapaiyai naa Diospa bitsisipawaaxiwi”, Jesúspa atu wadi.

¹² Naskawata na atu pibaiyai Jesúspa yuidi: “Piti ichapa tsuarawu akĩpaikĩ bewe rawebiswu, mewẽ dadeawu, mewẽ kaiwuu, na chaiba ikawu awa yupaibawu, naawu atu kedayabawe nawawemai bia akĩtiruwu ‘Piyuwe’, bia wakata bia nasukakĩ.

¹³ Nawu kedataba piti ichapa akĩpaikĩ na yura awayabawu, na dipaikĩ duibiswu, na kasharatiruwuba, wexuwuri atu kedawe atu piti akĩxikĩ.

¹⁴ Naawu awa ichapayawuba. Bia inapana. Naskaweke Diospa bia sharawanupukui. Diospa bia nasunupukui na yurawawe na Diospa duiyai axikakĩ shinawaĩ atiruwu na dabiswu widiawudu”, Jesúspa fariseowawe atũ diaiwu wadi.

Diospa yura ichapa atu yuixiwi atu piti akĩxikĩ

¹⁵ “Mi yura awayabawu piti akĩyaitu uĩbixakĩ Diospa bia sharawanupukui”, Jesúspa waitu dikata naweta piyai wetsã Jesús yuidi: “Na Dios diaiwu ipadaka aduxu piixiwaiwu naawu idibatiruwu”, wadi.

¹⁶ Naskawaitu dikata Jesúspa atu yuidi: “Dukuwene piti ichapa yura ichapa akĩyaxakĩ atu yuidi aweta piixinuwu.

¹⁷ Ma piti ikadu awẽ uibati nichidi na yuitawu yuixunu: ‘Ea atu yuixutawe: “Ma piti ikaki. Wekawe”, atu watawe’, wadi.

¹⁸ Naskawadu kaxu atu yuiyaitu ‘Ẽ katiru beeiba’, wakĩ wetsadiwu. Wetsã yuidi: ‘Ewẽ bai raba ẽ wixu ẽ uĩ kai. Mewẽ diaiwawe awẽ pexe aduxu ẽ pii katiru beeiba’, wadi.

¹⁹ Naskadu wetsã yuidi: ‘Diez vaca wede pei sapawuuxũ ẽ wiita. Nawawe wusharatirumaiki ẽ uĩ kai. Mewẽ diaiwawe awẽ pexe aduxu ẽ pii katiru beeiba’, wadi.

²⁰ Naskadu wetsã yuidi: ‘Ẽ raba ewẽ awĩwe ẽ wiana. Naskake mewẽ diaiwawe awẽ pexe aduxu ẽ pii katiru beeiba’, wadi.

²¹ Naskadu uibati pexe iwu adu dasuta na wekaspawu udua yuidi. Pexe iwawe na wekaspawuki sidakĩ awẽ uibati yuidi: ‘Watura wai ewapatu kushi kata watura wai kawashara tadawaĩ na yura awayabawu, na dipaikĩ duibiswu, wexuwu, na kasharatirubawuriwi naawu atu ewetawe ẽ atu pibanu’, wadi.

²² Naskawadu kaxu na pexe iwawe yuiya keskadi. Chipu pexe iwu adu uxũ yuidi: ‘Diaiwũ, na mia yuiya me aka. Me atu iwitadawia mesawu adu axakawu’, wadi.

²³ Naskawaitu pexe iwawe yuidi: ‘Na waitapiawukiri kata waiwu merari katawe. Yurawu wichixu atu kexunawatawe ewẽ pexe adu wenuwu mesawu adu axaka iyabanu.

²⁴ Na rewu ẽ atu yuita wekaspawawe ewẽ piti awa beekadibaki’, pexe iwawe wadi”, Jesúspa atu yuidi.

Watura wetsã Jesúsuxũ tapibis ipaikĩ rewu shinayutiru Jesús udua ubiskuitirumaiki

²⁵ Yura ichapa Jesúswe wuwaiwawe wesuakekawata atu yuidi:

²⁶ “Watura wetsa euxũ tapipaiyuxũ awẽ apa, awẽ awa, awẽ awĩ, awẽ wakewu, awẽ dadeawu nawu atu duikuita ea ichapaba duiyai naa euxũ tapibis itiruba. Watura wetsa ẽ udua dakaspayai na euxũ tapibis itiruba.

²⁷ Watura wetsã awẽ tabla rawe kuña ika iataba ea chiruyabai askarakai euxũ tapibis itiruba.

²⁸ Ma watura wistichi pexe chai basua wapaikĩ rewu tsauta shinatiru awetii pei sapa ikimaiki. Na tapixu tanawatiru awẽ pei sapawu daaimaiki.

²⁹ Askayabaxu nama wisti ata adaitiyabake na uĩyaiwutii aki kaxepaixikadi:

³⁰ ‘Uĩkapu. Dukuwene pexe apaiwitaxakĩ adaititiruba ikita’, waaxikadi”, Jesúspa atu wadi.

³¹ Naskatariwi Jesúspa atu yuidi: “Diaiwu datukuichi awẽ soldadowuweta diaiwu datukui wetsã awẽ soldadowuya atu retei wukaxuba reke tsauta shinatiru: ‘Ẽ diez mil soldadowu ẽ aya. Na diaiwu datukui wetsa veinte mil awẽ soldadowu aya. ¿Ẽ atuwe ikinatirumeti?’ shinatiru.

³² Atiruba beekĩ na diaiwu datukuichi yurawu nichitiru na diaiwu datukui wetsa chaikiduax uwaidu. ‘Atu ñukatakawe: “¿Nu aweskatirume ma dukuwe retenayabanu?” atu watakawe’, atu watiru.

³³ Naskake watura wetsã awenawutii uĩwaĩkaspayai naskarakai euxũ tapibis itiruba.

³⁴ Sau shara. Aka sau paispadax ana diis itiruba.

³⁵ Ma sau ana diisbake yurawawe wai adu saa atiruwuba. Sau paispa na yuina idawanabetiruwawe atũ puiya yurawawe usitiruwuba. Sau paispa yurawawe putatiruwu. Na pachuyatiixu ea dikakawe”, Jesúspa atu wadi.