Lucas 12 - Yura porciones de la biblia

Jesúspa auxũ tapipaudiwu atu yuidi chakayabakata Dioski chipu dianuwu

¹ Jesús fariseopa awẽ pexe aduax kaidu yura ichapanawã Jesús adu ichanadiwu. Aweskawaxu winutiruxakakĩba awirasi peabanadiwu. Naskaiwudu na yura ichapanawã yuiyuxuba Jesúspa auxũ tapipaudiwu atu yuidi: “Na levadura fariseowawe kawawabiswu kawawayabakawe. Tsai wetsawaxu ẽ batu ‘Fariseowu keskara iyabakawe’, ẽ batu wai. Fariseowu yura shara keskara tsaitiruwuwiax sharawuba.

² Naawu keskara iyabakawe awarawu yurawawe atuna wisti udeawumai naawu tapinabea inupukui.

³ Na ma yabeta yuiya pedata dikanupukukadi. Na ma udexu pachu namaxu ma yuiyari xawakawixu wetsã yura wetsawu atu tsai ewapatu yuinupukui dikanuwu”, Jesúspa atu wadi.

⁴ Naskatariwi Jesúspa auxũ tapipaudiwu atu yuidi: “Ewe rawebiswawe ẽ batu kekẽi. Na matu kaya retekaxu ana batu aweskawatirubawu atuki beseyabakawe.

⁵ Ẽ batu tapibanu watuki ma besetirumaiki. Dioski besekawe. Diaiwu datukuimaxu batu reteta batu chii ere mera putatiruki. Ẽ ana batu kekẽi. Dioski besekawe.

⁶ Cinco peiya wasiwu pei sapa raweuxũ ma witiru. Na wasiwu pei sapa ichapabaweke Diospa atu shinabakitiruba. Wisti rasi atu shinatiru.

⁷ Diospa tapia matu wuu awetiimaiki. Naskake yurawuki beseyabakawe. Peiya wasiwu bitsisipakuiwuba. Maawu bitsisipakuiwu. Diospa batu duikui.

⁸ Dukuwene Wake udua yuikĩ ẽ udua ẽ batu yuinu. Yurawawe uĩyaiwudu watura wetsã ‘Jesús ewẽ Diaiwu’, atu wakẽ na dai arixu Diospa tsai webiswu Diosna nawawe uĩyaiwudu naa udua Dukuwene Wakẽ yuixiwi: ‘Da ewẽ yura’, ẽ waaxiwiki.

⁹ Yurawawe uĩyaiwudu watura wetsã ‘Jesús ewẽ Diaiwuba’, yurawu atu wabiske naa yura udua ‘Da ewẽ yuraba’, ẽ waaxiwi. Na dai arixu Diospa tsai webiswawe uĩyaiwudu naa udua ẽ yuixiwi: ‘Da ewẽ yuraba’, ẽ waaxiwi.

¹⁰ Watura wetsã Dukuwene Wake udua yuikĩ chakawabixakĩ ana chakayabaxikĩ shinaidu naa yuikĩ chakawabis ana aduri Diospa shinaxiwiba. Watura wetsã Espíritu Santo ruãbixakĩ naa ruãkĩ chakawabis aduri Diospa shinabakixiwiba.

¹¹ Na Dios ikũirawaawubawawe batu sinagoga pexewu adu batu iyuxikadi batu radubaxikakĩ. Diaiwuu adu batu iyuwaiwudu shinachakayabakawe awa ma kebaikaimaiki batu radubaiwawe.

¹² Batu ñukayaiwudu Espíritu Santopa batu tapibaxiwi ma atu kebasharanu”, Jesúspa atu wadi.

Watura yurã Dios shinataba awenawus shinabistu awa tapiaba

¹³ Na yura ichapanawã Jesús chaiba ichanawu adua wetsã Jesús yuidi: “Diaiwũ, ma ewẽ epa daitaki. Ewẽ uchi yuiwe ewe paxkananu na nuku epana ibiswu”, wadi.

¹⁴ Naskawaitu Jesúspa yuidi: “Dikapu. Ea tsuã yuduaba diaiwawe naatu yuitiru yura ñuawu ubiskuibaimaiki keskara ẽ inu. Ea tsuã yuduaba batu paxkanawanu”, Jesúspa wadi.

¹⁵ Naskawata na yura ichapanawã atu yuidi: “Batuna wisti icha ichawapaiyabakawe. Awara ichapayawikadax yurawu isharata itiruwubaki”, Jesúspa atu wadi.

¹⁶ Tsai wetsawaxu Jesúspa atu yuidi: “Dukuwede awa yupaiba ipauditu awẽ wai babaki yudu ichapaya idi.

¹⁷ Naskake duduri shinadi: ‘¿Ẽ aweskatirume? Ewẽ yudu ichapa. Ẽ ana wani watiruba.

¹⁸ Na ẽ akai me shina. Na pexe ewapawu mera ewẽ yuduwu ẽ wabis pekaxu ẽ wetsa ewapakuiwu ẽ abai nawu mera naatiiwi ewẽ yuduwu na ewenawuya waaxikĩ.

¹⁹ Chipu ẽ duduri shinaxiwi: “Na ewenawu ichapa wanabeawu. Ma iki wari ichapa iwiyaitu na ewenawu ichapa weda keyunupukukadiba. Na pedatiiwi yudutaba ẽ ayata pita buduta ẽ idibasharanu”, ẽ shinaxiwi’, idi na awa yupaiba ipaudi.

²⁰ Naskawiyaitu Diospa yuidi: ‘¡Mi tatiba! Da yabeta mi dai. Ma mi daitadu na mi bekebiswu wetsã wiwaidakaki’, Diospa wadi.

²¹ Watura wetsã na Diospa duiyai atishinai bau sharawu icha ichawatiadi na dukuwede udua ẽ batu yuiya na ibis keskai naariwi naskaxiwi”, Jesúspa atu wadi.

Shinachakataba beseyabakawe

²² Jesúspa auxũ tapipaudiwu atu yuidi: “Ẽ batu kekẽi. Duduri shinayabakawe: ‘¿Nu awa piime dayabaxikĩ? ¿Nu awa saweime ñewa iyabaxikĩ?’ iyabakawe.

²³ Diospa batu ibatiru. Naskakeri piti batu inai. Diospa batu udiwadi. Naskakeri saweti batu inai.

²⁴ Shinakawe. Peiyawawe awa wadatiruba. Yudu witiruwuba. Wani atũ piti watiruwuba. Naskaweke Diospa atu pibatiru. Peiyawukai bitsisipakuiwuba. Maawu bitsisipakui.

²⁵ Watu pedata ma daimaiki ma Diospa shina. Ma shinachakax na pedata ma ipatiruba.

²⁶ Shinachakaxu na atirupini ma atiruba. Naskake awa shinachakayabakawe.

²⁷ Na charuwuuxũ tapikawe. Shinakapu charuwawe yudutaba turu watabari yusitiruwu charuta sharashta iixikakĩ. Diaiwu datukui Salomón bau ichapaya ipaudi. Naa bau ichapa wikĩ pei sapa ichapauxũ widi. Awẽ sawetiwu sharashta ipaudiwu. Naskawikadax charuwu ikai keskai awẽ sawetiwu sharashta ipaudiwubaki.

²⁸ Wasiwuya charu sharashtawu Diospa udiwadi. Nawu peda wisti iyabakadi peda rawe iyutiruwu. Ma tsasiawuadu yurawawe kuwatiruwu horno mera. Sharashtakuiwuweke nawu Diospa ichapaba dui. Batu Diospa duikui. Naskake batu saweti inaxiwi. Maawawe shinai: ‘Awa nu sawetiruba’, ma iki Dioski ma chipu diasharaba.

²⁹ ‘¿Ẽ awa piime? ¿Ẽ awa ayaime?’ iyabakawe. Shinachakayabakawe.

³⁰ Na Dios tapiabawu naskatiruwu. Naskaweke shinachakayabakawe. Matu Epa Diospa naa ma yupayaiwu ma tapiaki.

³¹ Na ma yupayaiwu shinawawaĩkataba duduri shinawawaĩkawe: ‘Dios ewẽ diaiwu. Naa ẽ ikũira wai’, ikawe. Ma naskakĩ na ma yupayai ma naya iixiwi”, Jesúspa atu wadi.

Jesúspa auxũ tapipaudiwu atu yuidi aweskawaxu bau sharakuiwu dai aria wixitiruwumaiki

³² Jesúspa auxũ tapipaudiwu atu awi yui idi. “Maawu ewẽ ovejawu. Ma ichapaba. Beseyabakawe. Epa Diospa ma shina batuwu kañawata matu diaiwu iixikĩ. Naduri shinai Dios idibai.

³³ Batunawu pei sapauxũ inabetsakawe awayabawu matu pei sapa atu inaxikĩ. Ma naskaxu na aki pei sapa watiwu chaputiruwuba ma wii keskarawu ma iixiwi. Dai ari na keyutiruba sharakuiwu Epa Diospa batuwu waxutiru. Dai ari yubetsuwu ikitiruwuba. Dai arixu awatu awara sharawu masawatiruba.

³⁴ Na ẽ batu yuiya akawe bau sharakuiwu Diospa batu waxunu awarawu uduamai maawawe ‘Sharakuiwura’, wabis naawu udua maawawe shinaxiwi”, Jesúspa atu wadi.

Jesúspa auxũ tapipaudiwu atu yuidi: “Itipinikawe ma tapiabaki ẽ awetiã uuxiwimaiki”, atu wadi

^35-36 Jesúspa auxũ tapipaudiwu atu yuidi: “Ea dikakatasakawe ea awara axuxikĩ. Uibatiwawe atũ diaiwu dikakatasatiruwu keskara ikawe. Sawetinĩ atu atibawatiruba sawetiruwu yuduxikakĩ. Atũ lamparínwu kexetiruwu dukayabanuwu. Itipinikaxu atũ diaiwu badatiruwu. Dukuwede awĩwuwe wiana naatu awẽ piti ichapa diaiwawe pii itiru weawuweta. Atũ diaiwu ma dasuxu atu kedaitu kushikui awẽ uibatiwawe weputi wepexutiruwu.

³⁷ Dikakatasaiwawe atũ diaiwawe atu wichike awẽ uibatiwu idibatiruwu. Ẽ batu yuikui. Diaiwawe ma uibati saweti saweta atu rakabata atu pibaxiwi.

³⁸ Uxe mananawari ikadu utiru. Pedayaidu utiru. Naskata dikakatasaiwawe atũ diaiwawe atu wichike awẽ uibatiwu idibatiruwu.

³⁹ Na ẽ yuiyairi dikatapitikawe. Pexe iwawe awetiã yubetsu awẽ pexe adu uimaiki tapixu weputi chakanawabatibawakerada nawenawu wuãyabanu.

⁴⁰ Na pexe iwu keskara iyabakawe. Itipinikawe ma tapiabaki ẽ awetiã uuxiwimaiki. Dukuwene Wake udua yuikĩ ẽ udua ẽ batu yuinu. Niriyauikui Dukuwene Wake uuxiwi”, Jesúspa atu wadi.

Uibatiwu udua Jesúspa auxũ tapipaudiwu atu yuidi

⁴¹ Pedropa Jesús ñukadi: “Diaiwũ, ¿na mi duku yuiya uibatiwu udua pexe iwu udua duku wisti mi yuiyame? ¿Naatiiwi mi yuiyame?” wadi.

⁴² Naskawaitu Diaiwu Jesúspa yuidi: “Dukuwede awẽ diaiwawe diaiwuwatiru awẽ uibati wetsawu kekẽxunu. Naa tapiwaĩka itiru. Naaturiwi awẽ diaiwawe kekẽa keskawatiru. Naa keskara ikawe. Awẽ diaiwawe naa kekẽwaĩxiwi pedatiiwi awẽ uibati wetsawu pibaxunu.

⁴³ Na yuita keskaitu awẽ diaiwawe uĩtushike naa uibati idibatiru.

⁴⁴ Ẽ batu yuikuinu. Awẽ diaiwawe naatiiwi awenawu kexebaxiwi.

⁴⁵ Diaiwawe naatiiwi awenawu kexebawaĩdadu naa uibatĩ na yudua axutishinai duduri shinakĩ: ‘Ewẽ diaiwu weda dasuiba’, raixu uibatiwu dukuwedewuya uibatiwu awĩwuuriwi atu chakawata ichapa pita ichapa ma ayatari paeaidu

⁴⁶ awẽ diaiwu iriyaui dukuxiwi. Ubiskuibakuixiwi. Naskawaxu awẽ diaiwawe ubiskuibaxiwi naa atũ diaiwawe atu kekẽa keskabiswuba ubiskuitiruwu keskanu.

⁴⁷ Watura uibati wetsã na awẽ diaiwawe duiya keskara tapiwixu itipiniyabai na awẽ diaiwawe duiya keskara ayabake awẽ diaiwawe ichapa kushaxiwi.

⁴⁸ Watura uibati wetsã na awẽ diaiwawe duiya keskara tapitaba awarauxũ awẽ diaiwawe ubiskuibatiruwu naa ake awẽ diaiwawe ichapabashta kushaxiwi. Watura wetsa Diospa ichapa inabis naa yura Diospa kekẽxiwi ichapa yuduxunu. Watura wetsa tsuãra ichapa kexebabis awẽ diaiwawe na kexebabistiiya wetsawu ichapa ñukaxiwi”, Jesúspa atu wadi.

Jesúspa auxũ tapipaudiwu yuidi: “Ẽ udi shina wisti yurawawe shinayabanuwu”, atu wadi

⁴⁹ Jesúspa auxũ tapipaudiwu atu yuidi: “Ẽ udi bai adu chii putaxikĩ. Iskaidu xuisapainu.

⁵⁰ Ẽ bautizaidu ẽ nikisi ewẽ kaya ede mera ikia idi. Ẽ awiana bautizanupukui. Naskawia ede meraduax ẽ bautizanupukuiba. Nikisi ewẽ kaya ubiskuinupukui. Naa shinai ẽ shinabetsakuiyana ewẽ yurariwi chakakui beei ẽ ubiskui. Naskai bautizax ẽ ubiskuinupukuiba.

⁵¹ Ma shinai ẽ yurawu na baitiu aduawu isharakata inuwu raikax ẽ udi. Askanuwu raikax ẽ udibaki. Shina wisti shinanuwuba raikax ẽ udi.

⁵² Datiã duduri iskara ipadaka. Pexe wisti adu cinco yura aduri wisti shinakadaxba askawatanawaidakawu. Treswaĩ rawe askawaiwudu na raweta na tres askawawaidakawu.

⁵³ Apã awẽ wake werunawake askawawaidaka. Awẽ wake werunawakẽ apa askawawaidaka. Awã awĩwake askawawaidaka. Awĩwakẽ awa askawawaidaka. Awĩwu awẽ wawawawe askawatanawaidakawu”, auxũ tapipaudiwu Jesúspa atu wadi.

Yura ichapawawe na Diospa aki idi tapidiwuba

⁵⁴ Jesúspa naatiiwi yurawu atu yuidi: “Ma dai uĩkĩ ma tapitiru awa aweskaimaiki. Wari kabis ariax nishu keyupakeaitu uĩkĩ ‘Ui weexikĩ iskai’, ma watiru. Chipu ui itiru.

⁵⁵ Surkiriduax dewe weaitu beekĩ ‘Wari isixikĩ iskai’, ma watiru. Chipu wari isitiru.

⁵⁶ Yura sharawu keskara maawu tsaitiruwiax ma sharaba. Daiya bai maawawe tapitiru. ¿Aweskakĩ ma tapiabame na Diospa akairiwi?” Jesúspa atu wadi.

Batu yurã denunciawapaiyaitu aweta tsai sharawakawe

⁵⁷ Jesúspa yura ichapa yuidi: “¿Aweskakĩ bawi na Diospa duiyai aaxikĩ ma shinawaĩ atirubame?

⁵⁸ Wetsã bia ñuaxu diaiwawe naa yurawu yuitirutu yura ñuawu ubiskuibaimaiki adu bia iyuwaitu dukuxuba na bia ñuaweta tsai sharawawe. Mi aweta tsai sharawayabake diaiwawe naa yurawu yuitirutu yura ñuawu ubiskuibaimaiki adu bia xarawuxiwi. Chipu na diaiwawe policía bia achibaxiwi. Policiapa bia cárcel mera ikibaxiwi.

⁵⁹ Na mi debeawu atii inayabax naduax mi tseketiruba. Pei sapa wistiruku mi netewaax mi tseketirubaki”, Jesúspa atu wadi.