Juan 8 - Yura porciones de la biblia

Awĩwu awẽ wedebawe diaiwuwawe retepaidiwu

¹ Jesús bachi awẽ ade Olivos adu kadi.

² Peda wetsa oración pexe adu dasudi. Naskaidu yura ichapa aki wediwu dikai wekadi. Naskata tsauxu atu tapibadi.

³ Atu yuiyaidu Moiséspa Epa Dios tsai kededi tapibabiswu fariseowuwe wediwu. Awĩwu wedebawe ikaitu wichikaxu Jesúski ewediwu. Yura ichapa nexpakaya awĩwu nichidiwu naatiiwixu uĩnuwu.

⁴ Naskata Jesús yuidiwu: “Maestrõ da awĩwu chaka. Awẽ wedebawe ikaitu nu wichia.

⁵ Moiséspa tsai kededi awĩwu awẽ wedebawe ikaitu uĩkĩ nu ruwẽ tsakakĩ retetiru. Duku mia awa akime”, fariseowawe Jesús wadiwu.

⁶ Chakawabapaikakĩ Jesús ñukadiwu naskata ñuapaixikakĩ. Naskawawe Jesús baikiri wepepakekawã awẽ mekema bai kededi.

⁷ Ñukariwaiwawe widinakawã Jesúspa atu yuidi: “Watu ma chakabisbame da awĩwu ma ruwẽ tsakakĩ taewai”, Jesúspa atu wadi.

⁸ Naskata atu yuita awẽ biwĩ bai kededi.

⁹ Na dikakadi naatiiwi wudiwu reke adiwuu wisti rasi tsekewaĩwawaĩdiwu. Naskaiwudu na awĩwu duikaspawu naawe Jesús netedi.

¹⁰ Naskata Jesús widinakawata awĩwu ñukadi: “Bia tsuã aweskawaabame”, Jesúspa wadi.

¹¹ “Diaiwũ tsuã ea aweskawaaba”, waitu Jesúspa yuidi: “Ẽriwi ẽ bia aweskawaiba katawe. Ana chakayabawe”, Jesúspa wadi.

Jesús peda keskara

¹² Naskata ma awĩwu kaadu Jesúspa yurawu atu yuidi: “Ẽ peda keskara naatiiwi yurawu da bai adu ikawu ẽ atu chaxai ea ikũira wakawe ana wakish keskara adu iyabaxikakĩ. Naskax na chaxayai keskaraya ma itiru naatu batu ibapaketiru”, Jesúspa atu wadi.

¹³ Naa dikakakĩ fariseowawe kebadiwu: “Biwi mi yuinabei. Aakai awaba”, waiwawe.

¹⁴ Jesúspa atu kebadi: “Ewi ẽ yuiyai ikũkui. Ẽ tapia wakiax ẽ udimaiki. Ẽ tapia na ẽ kai ari. Maawawe tapiaba.

¹⁵ Yura wetsa uĩkĩ ma atu chakawabis. Ẽ tsua chakawabisba.

¹⁶ Atu chakawapaikĩ ẽ atu chakawatiru. Ewẽ Epa naa ea nichidiweta na shina ikũkui.

¹⁷ Matu tsai adu kedea yura raweta naduri wisti yuiyaiwawe naa ma ikũira wabis.

¹⁸ Ewi ẽ yuikuinabei. Ewẽ Epã ea nichidi naatu ẽ udua yuikuitiru”, Jesúspa atu wadi.

¹⁹ “Wani mewẽ epame”, waiwawe. Jesúspa atu kebadi: “Ea ma tapiaba. Ewẽ Epari ma tapiaba. Ea ma tapixu ewẽ Epariwi ma tapikerada”.

²⁰ Oración pexe aduxu atu tapibakĩ Jesúspa atu yuidi na pei ofrenda inatiruwu aduxu. Awẽ peda iyuabadu Jesús achipaidiwuba.

Jesúspa yurawu yuidi: “Ẽ kai ari ma katiruba”, atu wadi

²¹ Awiana Jesúspa atu yuidi: “Me kawaidaka. Ma ẽ kaadu ea ma wedaxiwi. Naskaweke matu chakawawe ma danupukui. Na ẽ kai ari ma dukutiruba”.

²² “Awiraka retepai: ‘Na ẽ kai ari ma katiruba’, duku wai”, judío diaiwuwawe Jesús wadiwu.

²³ Naskaiwawe Jesúspa atu yuidi: “Ma da bai aduawu. Ẽ da bai aduaba. Ẽ dai aria.

²⁴ Naskake ẽ batu yuiya matu chakawawe ma danupukui ea ma ikũira wayabax. Matu chakawawe ma danupukui”, Jesúspa atu wadi.

²⁵ Naskaitu ñukadiwu: “Mi tsuame”, wadiwu. Naskawaiwawe Jesúspa atu kebadi: “Aweskakĩ ẽ batu kebatirume.

²⁶ Ẽ batu ichapa yuikerada na ma chakabiswu. Na ea nichiditu naatu yuikuitiru. Na ẽ yurawu atu yuiyai Ewẽ Epã yuiyaitu dikaxu naskara ẽ yurawu yuikuitiru”.

²⁷ Apa Dios udua yuiwiyaitu tsuã tapidiba.

²⁸ Naskake Jesúspa atu yuidi: “Maawawe cruzki bastaxu widibakata Dukuwene awẽ Wake ma tapixiwi tsuamaiki. Ewẽ Epa awẽ bitsisipaya ẽ. Ewẽ shinama awa ẽ atiruba. Ewẽ Epa ea yuiya ẽ atiru.

²⁹ Na ea nichidi naa ewe ika. Ewẽ Epã ea wani putabisba. Na duiyai keskara ẽ axubis”, Jesúspa atu wadi.

³⁰ Jesúspa naduri atu yuiyaitu yurawawe ikũira wadiwu.

Epa Dios awẽ wakewuwe chakawawe awẽ uibatiwuri

³¹ Jesúspa na judíowawe ikũira waawu atu yuidi: “Ewẽ tsai ma ea ikũira waxu ẽ udua tapibis ma itiru.

³² Naskaxu ikũkui kayakawi ma tapitiru. Ikũkui ma tapiax naatu batu ibasharapaketiru”, Jesúspa atu wadi.

³³ Naa dikakakĩ Jesús kebadiwu: “Nuuwu Abrahampa awẽ kaiwuu uduax ichapanawã kaĩpakedakawu. Tsuã duku uibati wabisba. Naa mi yuiyai aweskax nu isharatirume”, wadiwu.

³⁴ Jesúspa atu yuidi: “Ẽ batu yuikuinu. Na chakabiswu naawawe chaka duikadi na uibati awẽ diaiwawe duikĩ atiru keskawakakĩ.

³⁵ Uibati awẽ diaiwawe awẽ pexe mera ipatiruba. Askataba wake awẽ kaiwu atũ pexe mera ipatiru.

³⁶ Ẽ Diospa Wake ẽ batu sharawanu ma duiyaitu naskas ikũkui ma sharakatiru.

³⁷ Ma ẽ tapia maawu Abrahampa awẽ kaiwuu uduax ichapanawã kaĩpakedakawu. Naskaweke ea ma retepai maawawe ewẽ tsai ikũira waaba”, Jesúspa atu wadi.

³⁸ “Na ewẽ Epã ea tapibabis ẽ batu yui. Naskariwiyai maawawe Dios udua ma dika naskakawe”, Jesúspa atu wadi.

³⁹ “Nuku xidi Abraham”, ikaiwawe. Jesúspa atu kebadi: “Ma Abrahampa awẽ wakexu awara shara na apaudi keskara ma akerada.

⁴⁰ Askataba na ewẽ Epa Diospa ea tapiba ikũkui ẽ batu yuikuiwiyaitu ea ma retepai. Abrahampa awara askara apaudiba.

⁴¹ Na matu epã atiru keskara ma aki”, Jesúspa atu wadi. Naskake Judíowawe kebadiwu: “Apa wetsaya keskara duku wabayabawe. Nuku Epa wisti Dios”, Judíowu idiwu.

Satanás awẽ wakewu

⁴² Jesúspa atu kebadi: “Epa Dios matu Epake ea ma duikerada Epa Dios ikaduax ẽ udi. Ewẽ shinama ẽ udiba. Naatu ea nichidi.

⁴³ Aweskai ewẽ tsai ẽ batu yuiyai ma dikaibame. Na ẽ batu yuiyai ma dikakaspai.

⁴⁴ Matu epa Satanás. Maawu awena. Naatu duiyai ma axutiru. Naatu yura retebis ipaudi iskaratiari naskara. Naskatari naatu awara ikũkui yuitiruba. Na chanikui chani wisti shinabis. Naatu yurawu chani tapiba.

⁴⁵ Naskaweke Ẽ batu yuikuiwiyaitu ea ma ikũira waiba.

⁴⁶ Watura wetsã ea uĩbakawe ẽ chakamaiki. Ẽ batu yuikuiwiyaitu ea ma ikũira waiba.

⁴⁷ Epa Dios awẽ wakewawe awẽ tsai dikatiruwu. Maawu Epa Dioswe ikaba. Naskake awẽ tsai ma dikakaspai”, Jesúspa atu wadi.

Abraham udiyabadu Jesús ipaudi

⁴⁸ Naskata judíowawe yuidiwu: “Ikũ nu bia yuikui mi Samaria adua. Mi wakaya”, judíowawe Jesús wadiwu.

⁴⁹ Jesúspa atu kebadi: “Ẽ wakayaba. Ewẽ Epa ẽ dui. Askataba maawawe ea duiba.

⁵⁰ Yurawawe ẽ udua yuikĩ sharawanuwu ẽ duiba. Naskara Diospa dui. Naatu yura sharawu tapita yura chakawu tapia.

⁵¹ Ẽ yuikui. Na ewẽ tsai ikũira waa na ewẽ Epa Dioswe ipadaka”,

⁵² Judíowawe kebadiwu: “Ma nu tapia mi wakaya. Abrahamwe na Epa Dios tsai yuipaudiwu ma dadiwu: ‘Ewẽ tsai ikũira waa naa dadakaba’, mia duku wai”, judíowawe wadiwu.

⁵³ “Nuku epa Abraham mi winuame. Naa ma dadi. Epa Dios tsai yuipaudiwu naawu ma dadiwu: ‘Ẽẽkai tsua keskaraba’, mi iki”, judíowawe Jesús wadiwu.

⁵⁴ Jesúspa atu kebadi: “Ewi ẽ duinabea aakai awaba. Naskaweke na ea duiyai naa ewẽ Epa, ‘Naa nuku Dios’, ma wabis”, Jesúspa atu wadi.

⁵⁵ “Maawawe Epa Dios tapiaba. Ẽ tapia: ‘Ẽ tapiaba’, ẽ batu waitu ẽ chani ikerada batu keskara. Ikũikui ẽ tapia. Naskake awẽ tsai ẽ ikũira waa.

⁵⁶ Matu xidi Abraham idibadi na ẽ unupukuwai dikai. Uĩdi. Naskake idibakuidi”, Jesúspa atu wadi.

⁵⁷ “Mi cincuenta wari mi iyuaba”, judíowawe wakata: “ ‘Abraham ma ẽ uĩdi’, mi iki”, Jesús wadiwu.

⁵⁸ Naskaiwawe Jesúspa atu kebadi: “Ẽ batu yuikuinu. Abraham udiyabadu ma ẽ udia idi”, Jesúspa wadi.

⁵⁹ Naskata Jesús yurawawe ruwẽ tsakapaiyaiwudu udeta oración pexe aduax tsekekaĩdi kadi.