Juan 6 - Yura porciones de la biblia

Jesúspa cinco mil dukuwedewu atu pibadi

¹ Naskata iãmawa Galilea ukiri awẽ ade wetsa Tiberias adu Jesús kadi.

² Isinikaiwu kayawaa uĩkaxu yura ichapawawe chiruwaĩdiwu tsuã atiruba keskara akaitu uĩkakĩ.

³ Naskake bachi ari mapeta a udua tapibiswuwe atuwe Jesús tsaudi.

⁴ Judíowawe fiesta awẽ ade Pascua wabiswu ma chaiba ikaidu.

⁵ Jesúspa yura ichapawu awe wuwaiwawe uĩkĩ Felipe ñukadi: “Wania pan da yurawuna peiuxũ nu wiime”, wadi.

⁶ Jesúspa ares wisti na akai tapia idi. Naskake Felipe ñukadi uĩpaikĩ awe ikimaikixu.

⁷ Felipene kebadi: “Ocho uxe yuduwixu naa peĩ nu pan ichapa witiruba atu kaxke inapakexikĩ”, wadi.

⁸ A udua tapibis wetsa awẽ ade Andrés naatu yuidi. Simón Pedropa awẽ extu:

⁹ “Da wake cinco pan cebadana ita shima kawashara raweya. Naskaweke datii yurawu dukutiruba”, wadi.

¹⁰ “Naatiiwi atu tsaũkawe”, Jesúspa atu wadi. Nadu wasi ichapa idi. Cinco mil dukuwede idiwu.

¹¹ Jesúspa awẽ mekema pan tsubaxu Dios aki idibadi. Na tsauwawu atu inadi. Shimari naskari wadiwu na pipaiyai keskawanuwu.

¹² Ma pikata idibadiwu. Jesúspa atu yuidi a udua tapibiswu: “Dikũnayabanu wikawe na texeawu”, atu wadi.

¹³ Cinco pan cebada iwiyax doce shiwati na texea wikata wuspiwadiwu.

¹⁴ Tsuã atiruba keskara Jesúspa akaitu uĩkakĩ: “Ikũkui datu Dios tsai yuibis: ‘Bai adu unupukui’, wadiwu naa ma dukua”, idiwu.

¹⁵ Diaiwuwaaxikakĩ iyupaiyaiwawe Jesúspa atu tapidi. Naskake Jesús bachi ari ares iixikĩ kadi.

Jesús ede manaũ kadi

¹⁶ Ma ñatapakeaidu iãmawadu wutudiwu Jesús a udua tapibiswu.

¹⁷ Xaxu dadeiniwuwadiwu ukiri iãmawa pukei wukadi. Cafarnaúm dukui wukadi ma yabeadu Jesús uyuaba idi.

¹⁸ Naskaiwudu atuki newewã wedi iãmawa wechumawã wadi.

¹⁹ Cinco seis kilómetros ma wuawudu ede manaũ Jesús xaxuwadu uwaitu uĩkadi besediwu.

²⁰ “Eeki. Rateyabakawe”, Jesúspa atu wadi.

²¹ Idibayana: “Xaxu adu dadeyuwe”, wadiwu. Naskaidu iãmawa keseme kushikui dukui wuwaiwudu dukudiwu.

Yurawawe Jesús wedadiwu

²² Wetsatiã iãmawa ukiri yura ikawawe tapidiwu na Jesús udua tapibiswu xaxuwã wistiũ wuitawu. Naskaidu Jesús atuwe kaitaba idi.

²³ Naskaiwudu pexe ichapa Tiberias aduax xaxuwã wetsawu wediwu Jesúspa atu pibaita chaiba naduax Jesús Dioski idibaitadu.

²⁴ Naskata Jesúswe a udua tapibiswu adua uĩkakĩba yurawu xaxuwãũ dadewaĩdiwu. Pexe ichapa Cafarnaúm wudiwu Jesús wedai wukadi.

Jesús na nu piyai keskara nu awe ipasharatiru

²⁵ Iãmawa ukiri ma dukukaxu Jesús wichikaxu ñukadiwu: “Maestrõ awetiã dudu mi uitame”, wadiwu.

²⁶ Naskaiwawe Jesúspa atu kebadi: “Ẽ batu yuikuinu. Na tsuã atiruba keskara ẽ akaitu uĩtaxakĩ ma ea wedaiba. Pikata mañaitaxakĩ naskaxu ea ma wedai”, Jesúspa atu wadi.

²⁷ Jesúspa awiana atu yuidi: “Piti keyutiruuxũ yuduyabakawe. Askataba na piti ipadakauxũ yudukawe. Naa piti ipadaka ẽ batu inanupukui. Ẽ Dukuwene Wake. Diospa awẽ bitsisipa ea inadi”.

²⁸ Naskaitu ñukadiwu: “Awe keskara Epa Diospa duime na duiyai keskara nu anu”, wadiwu.

²⁹ Jesúspa atu kebadi: “Epa Diospa ea nichidi ea ikũira wakawe. Naskara Diospa dui”, Jesúspa atu wadi.

³⁰ Naskaitu ñukadiwu: “Awa na tsuã atiruba keskara mia duku uĩbaime naa uĩxu nu bia ikũira wanu. Watu mewẽ yudume”, wadiwu.

³¹ “Nuku xidiwawe dai meradua piti awẽ ade maná pipaudiwu tsua ikabarixu. Naduri Epa Dios awẽ tsaima yuiya: ‘Epa Diospa dai meradua pan atu pibapaudi’ ”.

³² Jesúspa atu kebadi: “Ẽ batu yuikuinu. Moiséspa dai meradua piti batu inadiba. Naskawiax ewẽ Epa naatu piti datukui dai meraxu batu inatiru.

³³ Epa Diospa awẽ piti batu inatiru. Dai meraduax na udi. Yura naatiiwi na uduax ipatiruwu”, Jesúspa atu wadi.

³⁴ “Diaiwũ, na pedatiiwi duku piti inawe”, wadiwu.

³⁵ Jesúspa atu yuidi: “Ẽ piti datukui. Na pikadax ipatiruwu. Iki uax ana tsua wudidakaba. Naa ea ikũira waawu ana dubidakaba.

³⁶ Ẽ batu yuiwiyaitu ea ma ikũira waiba ea uĩwikakĩ.

³⁷ Ewẽ Epã ea nawu ina e adu weawu. Naskatari iki weaiwawe ẽ atu putadakaba.

³⁸ Ewẽ shinama na ẽ apaiyai aaxikĩ dai ariax ẽ udiba. Ewẽ Epã ea nichidi. Naskake ewẽ Epa awẽ shinama aaxikĩ ẽ bai adu udi.

³⁹ Na ea nichidi awẽ shinama ẽ tsua weduyabanu na ea inawu. Ẽ yurawu naatiiwi ana udiwaaxiwi na baitiixu adaitiadu.

⁴⁰ Ewẽ Epã awẽ shinama apaiyai yurawawe Diospa Wake uĩkadax na ea ikũira waawu ipadakawu. Ẽ awiana bai adu uwaitiã dabiswu ẽ atu udiwaaxiwi”, Jesúspa atu wadi.

⁴¹ Judíowawe Jesús udua tsai chakawadiwu: “Ẽ dai meraduax udi na ma piyai keskara yurawawe pikadax ipatiruwu”, Jesúspa atu yuike.

⁴² Naskata yuidiwu: “Na Jesús Josépa awẽ wake. Ma nu tapia apa awariwi. Aweskai: ‘Dai meraduax ẽ udi’, raika”, wadiwu.

⁴³ Jesúspa atu yuidi: “Askayabakawe.

⁴⁴ Ewẽ Epã na ea nichiditu axuyabaidu tsua ẽ udua tapibis itiruba. Ewẽ Epã na baitiu ma adaitiyaidu na ẽ udua tapibiswu awiana ẽ widinupukui Epa Dioswe ipaxanuwu.

⁴⁵ Epa Dios tsai yuibistu awẽ tsai naskara yuidi: ‘Naatiiwi Diospa tapibadi’. Epa Dios awẽ tsai dikakata tapiawu ẽ adu weexikadi.

⁴⁶ Tsuã Epa Dios uĩbisba. Eres wisti ẽ Epa Dios uĩbis. Naatu ea nichidi.

⁴⁷ Ikũkui ẽ batu yui. Na ea ikũira wai ipatiru”, Jesúspa atu wadi.

⁴⁸ “Ẽ na piti keskara. Na ea ikũira waawutii ẽ atu ibapakedaka.

⁴⁹ Matu xidiwawe tsua ikabadu ipaudiwu. Na piti awẽ ade maná pipauwidixakakĩ dadiwu.

⁵⁰ Ẽ dai meraduax ewẽ Epa Dios ikaduax udi. Ẽ na ma piyai keskara. Na ea ikũira wai naa ewe ipadaka.

⁵¹ Ẽ batu piti inaxiwi na ewẽ dabi keskara dai meraduax udi. Naa piti piax ipadakawu ẽ baitiixu yurawu atu naxuxiwi isharapakexanuwu”, Jesúspa atu wadi.

⁵² Naskaitu dikakadi judíowu askawatanadiwu: “Aweskaxume da dukuwene awẽ dabi duku inatirume nu pinu”, idiwu.

⁵³ Jesúspa atu yuidi: “Ikũkui ẽ batu yuinu. Ẽ Dukuwene Wakekui. Ma ewẽ dabi pitaba ewẽ ibi ayayabax ma ipatiruba.

⁵⁴ Watura wetsã ewẽ dabi pikata ewẽ ibi ayakadax ewe ipadakawu. Na baitiu adaitiyaidu ẽ atu widibaxiwi Epa Dios ikadu ipaxanuwu.

⁵⁵ Ewẽ dabi pitikui. Ewẽ ibi ayatikui.

⁵⁶ Watura wetsã ewẽ dabi pikata ewẽ ibi ayakadax naa ea ikũirawaawu ewe ipadakawu. Ẽriwi atuwe ipadaka.

⁵⁷ Ewẽ Epa ipadakatu naatu ea nichidi. Naskai ẽri a uduax ipadaka. Naskariwiyai ea ikũira wakadax ẽ uduax ipadakawu.

⁵⁸ Nuku xidiwawe pipaudiwu awẽ ade maná. Na pikadax ma dadiwu naatiiwi. Dai meraduax ẽ batuki udi. Ẽ piti keskara. Ea pikadax ẽ uduax ipadakawu”, Jesúspa atu wadi.

⁵⁹ Judíowawe atũ ichanati pexe meraxu Cafarnaúm aduxu awẽ tsai Jesúspa atu yuidi.

Jesús uduax yura ipatiru

⁶⁰ Jesúspa tsai dikakadi a udua tapibiswu wetsawawe yuidiwu: “Da yuiyai wekaxkui. Tsuãkai ikũira watiruba. Nuukai iskara tsai ikũira watiruba”, idiwu.

⁶¹ Yurawawe yuitiwaiwawe Jesúspa atu tapidi. Naskaiwawe atu ñukadi: “Na ẽ batu yuiyaitu ma sidaime.

⁶² Ma aweskatirume uĩkĩ Dukuwene awẽ Wake awiana dai mera kaidu na udiadu.

⁶³ Espíritu duku ibapaketiru. Yurã tsua ibapaketiruba. Na tsai ẽ batu yuiyai Espíritu naatu batu ibapaketiru.

⁶⁴ Naskaweke wetsawawe ea ikũira wayuaba”. Rekekui Jesúspa ma tapia idi waturawawe ikũira wakadiba wetsãri achibawaidaka.

⁶⁵ Awiana atu yuidi: “Naskake ẽ batu yui ewẽ Epa tsua nichiyabake iki tsua utiruba”, Jesúspa atu wadi.

⁶⁶ Naskaidu yura ichapawu Jesúswe wubiswu ana awe wudiwuba.

⁶⁷ A udua tapibiswu doce idi. Naawu atu ñukadi: “Maariwi eaduax kapaime”, Jesúspa atu wadi.

⁶⁸ Simón Pedropa kebadi: “Diaiwũ nu watu wetsakai diaiwuwatiruba. Mi wisti mewẽ tsai duku yuitiru aweskax nu isharapakexatirumaiki.

⁶⁹ Mi Dios ariax dukuki udi. Mi sharakui Cristo. Dios na ipadakatu naatu awẽ Wakekui mi. Naa bia nu ikũira wai”, Jesús wadiwu.

⁷⁰ “Ma doce ẽ batu iwidi. Ẽ batu iwiwidike batumeradua yura wisti mera Satanás ikidi”, Jesúspa atu wadi.

⁷¹ Simón Iscariotepa awẽ wake Judas idi. Naa Judas udua Jesúspa atu yuidi. Jesúspa na Judasri iwiwidike naatu Jesús atu achibaxiwi wetsawawe retenuwu.