Juan 19 - Yura porciones de la biblia

Jesús retediwu

¹ Naskata Pilatopa atu yuidi Jesús nishi kushanuwu.

² Soldadowawe buxa baiti wakaxu Jesúspa awẽ bapu adu sawebadiwu. Naskata saweti ushi a chai dukuari sawebadiwu.

³ Soldadowawe Jesús yuidiwu: “Judíowawe atũ diaiwu mi ipaxanu”, wadiwu. Naskawakata soldadowawe awẽ wemanaki wepasriwadiwu.

⁴ Naskata awiana Pilato tsekekaĩxu atu yuidi: “Ẽ Jesús xawakawi iwitanu ma tapinu da yura chakaba ẽ uĩ”, Pilatopa atu wadi.

⁵ Buxa baiti sawebawu awẽ bapu adu saweta saweti chaidipa ushikui sawea Jesús tsekedi. “Da dukuwede uĩkawe”, Pilatopa atu wadi.

⁶ Naskaitu sacerdotewu atũ diaiwuunu pexe kexebiswu nawuwawe tsai ewapatu yuidiwu: “Bastawe. Bastawe”, ikaiwawe. Pilatopa atu yuidi: “Bawi iyukaxu bastatakawe. Da yura chakaba ẽ uĩ”, atu wadi.

⁷ Judíowawe kebadiwu: “Nu tsai bitsisipakui nu aya. Nuku tsai bitsisipakui yuiya da dukuwede datiru. Jesús awi yuita ẽ Diospa Wakera ikita”, judíowawe wadiwu.

⁸ Naa dikai Pilato besekuidi.

⁹ Awiana ikikerãta Jesús ñukadi: “Mi waniame”, wawiyaitu Jesúspa awa kebadiba.

¹⁰ Pilatopa Jesús yuidi: “Aweskakĩ mia kebaibame. Mi tapiabame ẽ diaiwu. Ẽ atu yuitiru bia bastanuwu. Naskari wakĩ ẽ bia yuitiru mi katanu”, wadi.

¹¹ Naskawaitu Jesúspa kebadi: “Diospa bia axuyabaitu mia aweskarawakeradaba. Ma mia chakawaa. Naskake na ea atu achibada naaturi ea chakawakuida”, Jesúspa Pilato wadi.

¹² Naskaitu dikai Pilatopa Jesús aweskawapaidiba. Naskaidu judíowawe tsai ewapatu: “Da dukuwede mi aweskawayaba ana diaiwu César awe rawebis mi itiruba. Watura diaiwu wetsa ipaikĩ ma diaiwu César awe sidananabis itiru”, wadiwu.

¹³ Naa dikakĩ Pilatopa Jesús tsekadi. Naskata awẽ tsauti adu tsaudi Bakex Wai kede wawudiwu adu. Hebreo tsaima yuipai Gabatá.

¹⁴ Judíowawe fiesta wapaudiwu awẽ ade Pascua wenamari ikaidu mananawari Pilatopa judíowu atu yuidi: “Da matu diaiwu”, atu wadi.

¹⁵ Naskaidu tsai ewapatu tsainiwuwadiwu: “Bastawe. Bastawe”, waiwawe Pilatopa atu ñukadi: “Ẽ aweskawakĩ matu diaiwu ẽ bastatirume”. Ikaitu sacerdote atũ diaiwuwawe tsai ewapatu tsainiwuwadiwu: “Nu diaiwu wetsayaba. Nuku diaiwu wisti César”, Pilato wadiwu.

¹⁶ Naskawaiwudu Pilatopa atu Jesús inadi iyukaxu bastatanuwu. Naskadu soldadowawe iyudiwu.

Jesús bastadiwu

¹⁷ Awẽ ade wetsa Bapu Xaka nadu Jesúspa awẽ cruz iaxu wudi. Hebreo tsaima judíowawe yuitiru Gólgota adu.

¹⁸ Naduxu cruzki Jesús bastadiwu dukuwede raweya. Wetsa awẽ bibiyauri bastakata awẽ bibibauri wetsa bastadiwu.

¹⁹ Pilatopa tablaki kededi: “Da Judíowawe atũ Diaiwukui Jesús Nazaret adua”, kededi. Na kede kedea wetsã cruzki bastadi.

²⁰ Ciudad chaibakixu Jesús bastadiwu. Na tablaki kedea hebreowawe tsai kedeta latínwawe tsairi kedea griegowawe atũ tsaimari kedea idi. Naskake na tablaki kedea judío ichapawaĩ adediwu.

²¹ Naskake sacerdote atũ diaiwukuiwawe Pilato yuidiwu: “Da ‘Judíowawe atũ Diaiwu’, aduri kedeyabawe. ‘Datu yuiya: “Ẽ judíowawe atũ Diaiwu”, ikaki’, naduri kedewe”, wadiwu.

²² Naskayaiwawe Pilatopa atu kebadi: “Na ẽ kedea keskara iki”, atu wadi.

²³ Soldadowawe Jesús ma bastakaxu awẽ saweti cuatro wuruwapãdiwu na soldadotii. Awẽ saweti a chai dukua widiwu naatiixu ekexebeaba idi.

²⁴ Soldadowu idiwu: “Nu waxteyabanu. Tsuã wiimaiki nu sorteawanu”, idiwu. “Ewẽ saweti paxkanakata sorteawaawu ewẽ saweti tsuarana inu”. Epa Diospa awẽ tsai naduri kedea idi. Na profetapa kededi keskara soldadowawe adiwu.

²⁵ Jesús cruzki bastawudu nadu awa María idi. Awa wetsari nadu idi María. Naatu awẽ wede Cleofás ipaudi. María Magdalenari nadu idi.

²⁶ Awa ikaidu na Jesúspa duipaudi na auxũ tapibis nadu chaiba idi. Uĩta Jesúspa yuidi awa: “Awĩwu da mewẽ wake iki”, wadi.

²⁷ Naskawata na auxũ tapibis Juan yuidi: “Da mewẽ ewa”, wadi. Na auxũ tapibistu awa María iwidi awẽ pexe adu.

Jesús dadi

²⁸ Naskata Jesúspa ma tapia idi na udua kedediwu ma ike. Epa Diospa tsai kedea keskarakui inu yuidi: “Ẽ dubi”, idi.

²⁹ Nadu bai kiti tekaya idi. Naa bai kitiki vino wukax wuspia idi. Na vino wukax bechanawakata iwi baxuki bisku biskuwakata Jesúspa awẽ kexa chaiba wudiwu ayabapaidiwu.

³⁰ Naskawaiwudu na vino wukax Jesúspa ayadi. Naskata: “Naatiiwi ma ika”, ita baikiri wepepakekawata Jesús dakaĩdi.

Soldadopa Jesús chachidi

³¹ Naa xawata sábado iwaidaka idi. Nawa adea fiesta Pascua iwaidaka idi. Na pedata viernes judíowu itipinidiwu. Judíowawe ñukadiwu Pilato: “Na cruzki bastawutii cruz adu ana deeyabanuwu”, wadi. Ikaxu Pilato ñukadiwu na cruzki bastawu atũ kishi chukĩ akaxu cruz adua atu wutubanuwu.

³² Soldadowu wekata na cruz adua rawe atũ kishi chukĩ adiwu.

³³ Jesús uĩdiwu ma daa idi. Naskake awẽ kishi chukĩ adiwuba.

³⁴ Soldado wistichi Jesús paca wuaki tichia keskaratu awẽ pishiki chachiadu ibiya ede xawapakedi.

³⁵ Ẽ uĩdi keskara ẽ batu yuiyaitu ma ikũira wanu ẽ yuikui.

³⁶ Epa Diospa tsai wetsã kededi keskara inu naskara idi: “Awẽ xau tsuã chukĩ anupukuiba”, naskara ma kedea idi.

³⁷ Kede wetsadu kedeari idi: “Uĩnupukukadi na chachiawu”, naduri Epa Dios tsai ma kedea idi.

Jesús bakexewa kiniwã mera wadiwu

³⁸ Naskadu Arimatea ika awẽ ade José naatu Pilato Jesúspa awẽ kaya ñukadi wutubata wuuxikĩ. José Jesús auxũ tapibiswiax judíowuki besekĩ tsua yuipaudiba. Pilatopa yuiadu Josépa awẽ kaya wudi.

³⁹ Joséweta Nicodemopa Jesúspa awẽ kaya wutubai wudiwu. Nicodemo Jesúswe yabeta tsaiki wistitadi idi. Naatu treinta kilos álueya mirra nadu wisti usixu wedi.

⁴⁰ Joséweta Nicodemopa na tela chaidipa ini sharakuichi. Chipu Jesúspa awẽ kaya aũ rakudiwu. Naskara judíowu weyabis idiwu.

⁴¹ Na Jesús bastadiwu adu nadu jardín idi. Naa jardín adu bakexewa kiniwã weda idi. Adu tsuã yura daa wayubiswubadu.

⁴² Nadu Jesús wadiwu nadumai ciudad chaibake. Ma sábado iwaidakadu judíowuna.