Juan 17 - Yura porciones de la biblia

Jesúspa awena kiwĩdi

¹ Naskata Jesúspa dai mera uĩta kiwĩdi: “Epã datiã ma ika. Mewẽ Wake bitsisipa uĩbawe na mewẽ Wakẽ bitsisipa uĩbada keskawakĩ.

² Bai adu ea mia nichidi ẽ atũ diaiwu inu na ea ikũira waawu ẽ atu udua rawanainu naawu ipaxanuwu.

³ Bia tapikata ikũira waawu eariwi tapikata na ea ikũira waawu naawu ipadakawu. Mi Epa Dios wisti ikũkui. Jesucristo bai adu mi nichidi.

⁴ Ẽ da bai aduxu awarawu ẽ atu uĩba mewẽ bitsisipa. Na mi duiyai keskara me aka.

⁵ Epa bitsisipakui ea inawe. Bai udiyabadu na mewẽ bitsisipa ipaudi keskaraya ẽ inu”, Jesúspa apa wadi.

A udua tapibiswu Jesúspa Epa Dios atu kiwĩxudi

⁶ “Ẽ udua tapibiswu ea mia inadi mi awe keskaramaiki ẽ atu uĩbanu. Dawu mewenawu ipaudi. Nawuwawe bia ikũira waawu.

⁷ Mia yuiya keskara naatiiwi ẽ atu yuibis. Nawu ma tapiawu.

⁸ Mi ea yuiya keskara ẽ atu tapibaitu ma tapiawu. Ikũkui bi aduax ẽ udi ma tapiawu. Na mia nichidi ikũira waawu.

⁹ Ẽ atu kiwĩxui na ea mia inadiwu. Naawu mewenawu. Yura chakawu ẽ atu kiwĩxuiba.

¹⁰ Ewenawu mewena. Mewenawu ewena. Naawuxũ mewẽ bitsisipa ea mia inadi.

¹¹ Da bai adu ana ẽ ikiba. Ẽ udua tapibiswu netekadi. Na mi ikadu ẽ kaidu Epã mewẽ ade bitsisipayaxu atu kexesharawe na wisti keskara inuwu. Miiwe ẽ ika keskai na bitsisipa ea mia inadi keskawakĩ.

¹² Da bai adu iyuxu ẽ atu kexesharabis mewẽ ade bitsisipauxũ na ea mia inadi. Wistikai wedubisba. Askataba ma wisti wedua. Naskara Epa Dios awẽ tsai kedea”, Jesús idi.

¹³ “Na mi ikadu ẽ kai. Bai aduax kayuxuba ẽ yui ẽ udua tapibiswu idibakuinuwu na ẽ keskara.

¹⁴ Mewẽ tsai ẽ atu yuibis. Naawu ana yura chakawu keskaraba ẽriwi atu keskaraba. Naskake yura chakawawe atu duikaspakadi.

¹⁵ Ẽ bia ñukaiba yura chakawu adua mi atu iwinu. Askataba ẽ bia ñukai yura chakawu adua mi atu kexesharanu Satanáspa atu aweskawayabanu.

¹⁶ Ẽ yura chakawu keskaraba. Naawuri ana yura chakawu keskaraba.

¹⁷ Mewẽ tsai ikũkui shinakata inuwu naskata bia ikũirakui wanuwu.

¹⁸ Yura chakawu adu ea mia nichidi. Ẽriwi yura chakawu adu ẽ atu nichi.

¹⁹ Mewẽ tsai ikũkui shinakuita ẽ ibis. Naskariwiyai naawu mewẽ tsai ikũkui shinata inuwu”, Jesúspa apa kiwĩdi.

Jesúspa na ikũirawaawu atu kiwĩxudi

²⁰ “Ẽ udua tapibiswu wisti ẽ atu kiwĩxuiba. Wetsawaweri ewẽ tsai ẽ udua dikakakĩ ea ikũira waaxikadi naawu ẽ atu kiwĩxui.

²¹ Naskake ẽ bia atu kiwĩxui na nu shinai keskara wisti shinanuwu na bia ikũirawaawawe. Naskake yura chakawawe ikũira wanuwu ea mia nichidi.

²² Na bitsisipa ea mia inadi ẽ naariwi atu inabis na wisti inuwu na nu ikai keskai miiwe ẽ nu naa wisti.

²³ Mi ewe ika keskara ẽri atuwe ika. Na mi shinai keskarawu nuri shinatiru yura chakawawe tapinuwu mi ea nichidi. Na mi ea duiyai keskarariwi wakĩ mi atu duikui.

²⁴ Epã ẽ udua tapibiswu ea mia inadi. Na mi ikadu ẽ atuwe nadu inu ewẽ bitsisipa uĩnuwu na bitsisipa ea mia inadi bai udiyabadu.

²⁵ Epã mi sharakui. Yura chakawawe bia tapiawuba. Ẽ bia tapia. Ẽ udua tapibiswaweriwi bia tapiawu mi ea nichidi.

²⁶ Bia ẽ atu tapibabis na mi ea duiyai keskari wakĩ nawaweri wetsawu duikuinuwu ẽ atuwe iyuadu. Naskatari ẽ atu uĩbabis”, Jesúspa Apa kiwĩkĩ naskawadi.