Juan 16 - Yura porciones de la biblia

Na Espíritu Santo duku mera ikiyui utiru

¹ “Ẽ batu yui ea ma ikũira wakĩ xateyabanu.

² Ichanati pexe aduxu batu putakata watura wetsã batu retenupukukadi awi shinawu Nu Dios yuduxui raikaxu.

³ Ewẽ Epa tapiawuba eari tapiawuba. Naskakaxu batu chakawaaxikadi.

⁴ Na ẽ batu yui awara aweskaraitu. Na batu ẽ yuikĩ taewabis ma shinanu”.

⁵ Ana Jesúspa atu yuidi: “Ewẽ Epã ea nichidi datiã ẽ nadu kai maawawe waki mi kaime ea ma waiba.

⁶ Askataba ma shinabetsai naduri ẽ batu yuike.

⁷ Naskake ẽ batu yuikui ẽ kayabake Espíritu Santo batuki utiruba. Ẽ kaxu batuki Espíritu Santo nichinupukui.

⁸ Espíritu Santouxũ naatu da bai adua yurawu tapibanupukui yura chakabiswu ita yura chakabisba watura wetsawu Epa Diospa atu ubiskuibaxiwi”.

⁹ “Naskatari na ea ikũira waaba naa chakabis.

¹⁰ Ẽ awa chakawaaba. Ewẽ Epa adu ẽ kai. Maawawe ea ana uĩwaidakaba.

¹¹ Epa Diospa yura chakawawe atũ diaiwu Satanás na bai adua ma ubiskuibada. Naskatari yurawu ubiskuipakedakawu”.

¹² “Ichapa ẽ batu yuipana. Datiã atiiwi ma dikatiruba.

¹³ Espíritu Santo ikũkui uxũ naatu batu yuikuinupukui ikũkuina. Naskatari kayakawikui ma ipaxanu batu yuiyunupukui. Awẽ shina batu yuinupukuiba. Epa Diospa awẽ shina batu yuinupukui. Na awara inupukuwai.

¹⁴ Naatu ewẽ bitsisipa batu uĩbanupukui. Naskake na ẽ udua ewẽ tsai batu yuiyaitu ma tapinupukui.

¹⁵ Epa Diospa awẽ awarawu naawuri ewena. Naskake: ‘Espíritu Santo euxũ batu tapibai unupukui’, ẽ batu waa”.

¹⁶ “Ana ea ma uĩyuwaidakaba. Naskaweke awiana ẽ chipu dasuadu ea ma uĩxiwi”, Jesúspa atu wadi.

Na shinabetsai wetsaxiwi idibakui

¹⁷ Atu askawaitu dikakadi atiriwi a udua tapibiswu awirasi yuinadiwu: “Awe ipai ikime: ‘Ewẽ Epa ari ẽ kaitu ana ea ma uĩyuiba’, duku waime. ‘Awiana chipu ẽ uadu ma ea uĩnupukui’, duku wai”, a udua tapibiswu idiwu.

¹⁸ “Awe ipai duduri ikime: ‘awetiira peda wisti’. Na duku yuiyai keskarakai nu tapiba”, ikadax yuinariadiwu.

¹⁹ Naskake Jesúspa atu tapidi ñukapaiyaiwawe. Naskaxu atu yuidi: “Ẽ batu yuiya ana ea ma uĩyuiba. Chipu ma ea uĩwaidaka ẽ batu wanu. Naa ma yuinaime.

²⁰ Ẽ batu yuikuinu. Ma siaiwaidaka. Naskata ma shinabetsawaidaka yura chakawu idibaiwudu. Naskaweke ma shinabetsawiax ma idibaxiwi”.

²¹ “Ma awĩwu wake kaĩkĩ shinachakatiru. Ma wake kaĩyax ana pae beetiruba mamai kaĩsharax werunawake. Naskax idibakuitiru.

²² Datiã maariwi naskai shinachakakĩ. Naskawiax ẽ ana chipu batuki uadu matu uĩti mera ma idibaxiwi. Tsuã batu xatebatiruba na ma idibaiyai”.

²³ “Naskaidu da pedata. Ana ea ma awa ñukawaidakaba. Ẽ batu yuikuinu ewẽ adeuxũ. Ewẽ Epa awara ma ñukaitu batu inaxiwi.

²⁴ Datiã ewẽ adeuxũ awa ma ñukakabeaba. Ñukakabekawe ewẽ Epa batu inanu idibakuixikakĩ”.

²⁵ “Tsai wetsawaxu ẽ batu yuiya. Awara aweskaraidu ana ẽ tsai wetsawaxu batu yuixiba. Kayakawikui ewẽ Epa udua batu yuixiwi.

²⁶ Naa pedata ewẽ adeuxũ awara ma Epa Dios ñukaxiwi. Ẽ batu kiwĩxuxiba. Bawirasi ma Epa Dios kiwĩxiwi.

²⁷ Epa Dios batu dui. Eari ma duita ma ea ikũira wabiske. Ewẽ Epa Dios aduax ẽ udike.

²⁸ Ewẽ Epa Dios aduax bai adu ẽ udi. Awiana da bai aduax ewẽ Epa ikadu ẽ dasui”, Jesúspa atu wadi.

²⁹ A uduax tapibiswawe yuidiwu: “Tsai wetsawaxu ana yuiba. Xawakawikui yui”, wadiwu.

³⁰ “Ma nu ui naatiiwi mi tapia. Tsuãkai ana bia ñukatiruba. Naskake nu bia ikũira wai mi Epa Dios aduax mi udi”, auxũ tapibiswawe Jesús wadiwu.

³¹ Jesúspa atu kebadi: “¿Datiã ma ea ikũira waame?

³² Datiã ma ika awara aweskaraidu na ma kai adu kakĩ ea wisti ma nichiwaĩxiwi. Naskaweke erewisti ẽ iixiwiba. Epa Dios ewe nadu iixiwi.

³³ Da tsai ẽ batu yuiya. Euxũ sharakui ma shinanu. Da bai aduax ma ubiskuiwaidaka. Naskawiax ma shinasharatiru. Ẽ yura chakawu winukĩ abis keskawakĩ”, Jesúspa auxũ tapibiswu atu wadi.