Juan 13 - Yura porciones de la biblia

Jesúspa auxũ tapibiswu atũ tae chukaxudi

¹ Fiesta awẽ ade Pascua ma iwaidakadu Jesúspa ma tapia idi na bai aduax apa adu kayaxakĩ. Auxũ tapibiswu na bai adu ikawu atu duipaudi. Dawiakĩ atu duikuidi.

² Yabeta piyuwawubadu Satanás Judas Iscariotepa awẽ uĩti mera ikixu ma shinaba idi. Na Jesús duikaspabiswu atu achibanu. Judas Iscariotepa awẽ apa Simón idi.

³ Jesúspa ma tapia idi Apã awẽ bitsisipa inadi. Apa aduri kayaxakĩ ma tapia idi. Apãri nichidi ma tapia idi.

⁴ Naskata piyaiwudu Jesús widinakawata awẽ saweti pekata toallapa chedexebedi.

⁵ Naskata kiti ewapaki ede badexu auxũ tapibiswu atũ tae chukaxudi. Ma atu chukaxu toallapa atu tere adi.

⁶ Ma Jesúspa Simón Pedro awẽ tae chukaxuwaidu yuidi: “Diaiwũ, ¿mia ewẽ tae chukaxuime?” wadi.

⁷ Jesúspa kebadi: “Datiã ẽ akai mi tapiaba. Naskawixu mi chipu tapixiwi”, wadi.

⁸ Pedropa yuidi: “Wanikai mia tae chukaxudakaba”, wadi. Jesúspa Pedro yuidi: “Mewẽ tae ẽ bia chukaxuyabaitu euxũ tapibis mi itiruba”, wadi.

⁹ Simón Pedropa kebadi: “Askake Diaiwũ ewẽ tae rawe ea chukaxukiba. Ewẽ mekeriwi ea chukaxuwe. Ewẽ bapuri”, wadi.

¹⁰ Jesúspa kebadi: “Na raba dashiax ana dashirawetiruba. Awẽ tae rawe chukitiru mamai awẽ yura sharake. Maawu ma shara. Atiiwikai ma sharaba”, atu wadi.

¹¹ Jesúspa ma tapia idi watutura atu achibawaidaka. Naskake: “Atiiwikai ma sharaba”, atu wadi.

¹² Ma atũ tae chukaxuta Jesúspa awiana awẽ saweti saweta mesa adu tsaupakekawãta atu yuidi: “Ẽ batu yuinu aweskakĩ matu tae ẽ batu chukaxuamaiki”, Jesúspa atu wadi.

¹³ “Maawawe: ‘Diaiwu Maestro’, ea ma watiru. Ea ma yuikuibis eemai matu Diaiwuke.

¹⁴ Ẽ matu Diaiwu matu Maestropa. Matu tae ẽ batu chukaxua. Naskari akawe. Matu taewu chukananakawe”, Jesúspa atu wadi.

¹⁵ “Ma ẽ batu uĩbada na ẽ aka keskarari ma anu.

¹⁶ Ẽ batu yuikuinu. Uimati awẽ diaiwu winutiruba. Na tsai wubistu awẽ diaiwu winutiruba”.

¹⁷ “Na ẽ batu yuiyai keskara dikaxu ma naskaitu sharakui ma itiru”, Jesúspa atu wadi.

Jesúspa yuidi Judaspa atu achibawaidaka

¹⁸ Jesúspa awiana atu yuidi: “Atiwi ẽ batu yuiba. Ma ẽ atu tapia na ẽ kañawabiswu. Naawu ẽ yui. Na Dios tsai kedea keskawaidaka: ‘Na eweta piyaitu ea duikaspabis’ ”, Jesúspa atu wadi.

¹⁹ “Ea naskawayuawubadu datiã ẽ batu yui awara aweskaraidu maawawe ea ikũira wanu tsua udiyabadu ma ẽ udia idi”, Jesúspa atu wadi.

²⁰ “Ẽ batu yuikui. Na ẽ nichia ma iwikĩ eari ma iwitiru. Ea ma iwikĩ na ea nichidi ma iwitiru”, Jesús idi.

²¹ Naduri atu yuita Jesúspa shinachakakuikĩ: “Ẽ batu yuikuinu. Watura wetsã ma ea atu achibawaidaka”, Jesúspa atu yuidi.

²² Auxũ tapibiswawe tapidiwuba watu udua yuimaiki. Naskake awirasi uĩnanadiwu.

²³ Auxũ tapibis wetsa na Jesúspa duikuipaudi awẽ ade Juan piyaiwudu Jesúswe chaiba tsauwa idi judíowawe rakaxu pipaudiwu. Naskax ma weabiswu idi.

²⁴ Simón Pedropa awẽ kexama betutadi: “Ñukawe tsua yuimaiki”, Simón Pedropa wadi na Jesúswe chaiba tsauwa idi.

²⁵ Jesús chaibawata ñukadi: “Diaiwũ, ¿tsuã bia achibawaidakame?” wadi.

²⁶ Jesúspa kebadi: “Na ẽ pan bechawaxu inayai naa”, wadi. Naskata pan kaxke bechawaxu Judas inadi. Judas Iscariotepa awẽ apa Simón idi.

²⁷ Jesúspa Judas pan inatadaidu Judas awẽ uĩti mera Satanás ikidi. “Na mi apaiyai kushi awe”, Jesúspa Judas wadi.

²⁸ Na mesa adu Jesúswe tsauwawawe shinadiwu: “¿Aweskakĩ Jesúspa Judas aduri yuime?” wadiwu.

²⁹ Judaspa atũ pei kexexubis ipaudi. Naa Jesúspa nichiyaitu atiriwawe shinadiwu: “Fiesta iwaidaka. Awara wii kai. Askayabai na awayabawu atu pei inai kai”, idiwu.

³⁰ Ma pan wita Judas tsekekaĩdaidu. Ma yabea idi.

Duinanakawe Jesús idi

³¹ Ma Judas kaidu Jesúspa a udua tapibiswu atu yuidi: “Iskaratiã ma yurawawe Dukuwene Wake awẽ bitsisipa ma uĩyawu euxũ Epa Diospa awẽ bitsisipa ma uĩyawu.

³² Naskake Epa Dios awẽ bitsisipa uĩwaidakawu Dukuwene awẽ Wake. Epa Dios atu sababashta awẽ bitsisipa uĩbawaidaka”, Jesúspa atu wadi.

³³ “Ewẽ wakewawe ẽ batuwe iki chaiba. Ma ẽ kaadu ea ma wedawaidaka. Ẽ judíowu naduri atu yuibis datiã naduri ẽ batu yui. Na ẽ kai adu ma katiruba”, Jesús idi.

³⁴ “Tsai weda bitsisipa ẽ batu yui: Duinanakawe. Na ẽ batu duibis keskakawe ma naskatiru bawirasi duinanakawe.

³⁵ Bawirasi ma duinanaitu. Naatiiwixu uĩkata tapinuwu maawu ẽ udua tapibiswu”, Jesúspa auxũ tapibiswu atu wadi.

Jesúspa yuidi Pedropa tapiaba wawaidaka

³⁶ Simón Pedropa Jesús ñukadi: “Diaiwũ waki mi kaime”, wadi. Jesúspa kebadi: “Datiã ewe mi katiruba. Chipu mi kanupukui”, wadi.

³⁷ Pedropa yuidi: “Diaiwũ aweskai ẽ bewe katirubame. Ẽ mi uduax datiru”, Pedropa Jesús wadi.

³⁸ Jesúspa kebadi: “Ikũme. Ẽ uduax mi datirume. Ẽ bia yuikuinu. Takarane peda akabadu tres veces bia ñukayaiwawe: ‘Ẽ Jesús tapiaba’, mi atu wawaidaka”, Jesúspa Pedro wadi.