Juan 10 - Yura porciones de la biblia

Oveja kexebistu awẽ ovejawu

¹ Naskake Jesúspa fariseowuya atiriwi atu yuidi: “Ẽ batu yuikuinu na ovejawawe atũ kede kaĩti aduax ikiaba wumakayaduax ikitiru na yubetsu chakakui.

² Askataba na ovejawu kexebis naa ovejawawe kaĩti aduax ikikaĩtiru.

³ Naa kaĩti adu dukuadu na dukuwede kaĩti kexebistu weputi wepexudadu oveja kexebistu awẽ ovejawu kedatiru. Awẽ ovejawawe awẽ ui tapinaatiruwu. Naskaxu awẽ ovejawu atũ ane atu kedaitu awẽ ovejawawe beewaĩtiruwu.

⁴ Na ovejawu kexebis reke kaidu awẽ ovejawu awẽ kede meraduax naatiiwi kaĩwerãtiruwu. Ma awẽ tsai tapikaxu naskaxu beewaĩtiruwu.

⁵ Askataba iwuba ovejawawe chiruwaĩtiruba na dikawaĩkadi ichutiruwu atsi awẽ tsai tapikaxu”, Jesúspa atu wadi.

⁶ Oveja keskara udua Jesúspa atu yuiwiyaitu yurawawe tapidiwuba na atu yuipaiyai.

Jesús ovejawu kexebis sharakui keskara

⁷ Naskake awiana Jesúspa atu yuidi: “Ẽ batu yuikuinu. Ẽ ovejawawe atũ kaĩti keskara.

⁸ Ẽ uabadu na wetsawu wei taediwu. Naawu yubetsuwu chakakui idiwu. Ovejawawe atu ikũira wadiwuba.

⁹ Na ẽ kaĩti keskara. Ẽ wisti uduax ma ikitiru naskake ma aweskatiruba. Na ovejawu keskara ikikaita tsekekerã wasi wichitiruwu.

¹⁰ Na yubetsu ui awara uneta yura retetiru chakakuiwata. Naa wisti shinatiru. Ẽ yubetsu keskaraba. Yurawu isharapakexanuwu ẽ udi”, Jesúspa atu wadi.

¹¹ “Ẽ ovejawu kexebis shara keskara. Naa oveja kexebis sharakui yurawu uduax danupukui.

¹² Na pei wistiuxũ yudubis ovejawu awenaba. Ovejawu kexebis keskaraba. Na basharu keskara puwẽ uwaitu uĩkĩ ichui kakĩ atu putawaĩtiru. Na basharu keskara puwẽ ovejawu atu chakawaitu. Naskake ovejawu paxkanai wetsetiruwu.

¹³ Na dukuwede ichutiru pei wisti duibixakĩ oveja keskarawu duibixakĩba.

¹⁴ Ẽ oveja kexebis shara keskara. Ewẽ ovejawu ẽ tapia nawaweri ea tapiawu.

¹⁵ Ewẽ Epa ea tapia. Ẽriwi ewẽ Epa tapia. Naskatari ewẽ oveja keskarawu ẽ tapia. Atu uduax ẽ daaxiwi.

¹⁶ Naskatari ẽ oveja wetsawuya. Awu na kede aduwuba. Naawu ẽ atu iwinupukui. Naawu ẽ atu yuiyai keskanupukukadi. Nadu wistiri ichanupukukadi. Naawu oveja kexebis keskara wistiya inupukukadi.

¹⁷ Ewẽ Epã ea dui eemai daax awiana ẽ widixiwaitu.

¹⁸ Tsuã ea retexiwiba iwikui ẽ atu retebaxiwi. Ẽ bitsisipaya dawiax ẽ ana widixiwi. Naduri ewẽ Epa tsai kedea”, Jesúspa atu wadi.

¹⁹ Naa dikakadi judíowu atũ shina wetsa shinata wetsa shinata wadiwu.

²⁰ Atiriwi yura ichapawu iskadiwu: “Aweskawakĩ ma dikaime. Da wakaya awari shinaiba”, wadiwu.

²¹ Wetsawawe yuidiwu: “Da dukuwedekai wakayaba. Wakayaxu wexu kayawakeradaba”, idiwu.

Judío diaiwuwawe Jesús ikũira wadiwuba

²² Na bechakatiã judíowawe Jerusalén aduxu oración pexe fiesta wapaudiwu oración pexe wakakĩ keyudiwu naa peda iwaidakadu.

²³ Oración pexe mera Salomónpa Pórtico adu Jesús idi. Nadu Jesús uke mera kawa kawakakaĩdi.

²⁴ Naskaidu judíowawe Jesús dakiwakaxu ñukadiwu: “Mi udua duku mia yuikuiba. Epa Diospa bia nichidime datiã duku yuikuiwe”, wadiwu.

²⁵ Jesúspa atu kebadi: “Ma ẽ batu yuiwiyaitu ma ea ikũira waiba. Na awara tsuã atiruba keskara ẽ aki. Ewẽ Epã awẽ bitsisipa batu uĩbakuiwiaitu.

²⁶ Naskaweke ma ea ikũira waiba. Naskake maawu ewẽ oveja keskarawuba.

²⁷ Na ewẽ oveja keskarawawe ewẽ tsai ea tapinaawu. Naawu ẽri ma ẽ atu tapibis. Nawawe ea chiruwaĩtiruwu.

²⁸ Naskake ẽ atu ibapakedaka ana dadakawuba. Naawu ea tsuã wiãdakaba.

²⁹ Ewẽ Epa awẽ bitsisipa ewapakui ea inadi. Tsuã ea wiãtiruba naskatari ea tsuã winuawuba.

³⁰ Ewẽ Epawe ẽ nu naa wisti”, Jesúspa atu wadi.

³¹ Naskaitu dikakakĩ judíowawe awiana ruwẽ Jesús tsakapaidiwu.

³² Naskake Jesúspa atu yuidi: “Ewẽ Epã awẽ bitsisipauxũ ẽ awara shara tsuã atiruba keskara aka. Nauxũ ea ma ruwe tsakapaime”, Jesúspa atu wadi.

³³ Judíowawe Jesús kebadiwu: “Na tsuã atiruba keskarauxũ nu bia ruwẽ tsakaiba. Mi Epa Dios tsaiki mi chanikui. Biwikui: ‘Ẽ Diosra’, mi iki”, wadiwu.

³⁴ Jesúspa atu kebadi: “Epa Diospa awẽ tsai aduxu yuiya: ‘Batu yui maawu na awara awi udiwakaxu ikũira waawu keskarawu’ ”, Jesúspa atu wadi.

³⁵ “Ma nu tapia Epa Dios tsai kedea nu chanitiruba. Naskake Epa Diospa yurawu atu awẽ tsai yuiyai dioses atu wadi.

³⁶ Epa Diospa ea kañawadi: ‘Ẽ Dios awẽ Wake’, ẽ batu waadu aweskakĩ: ‘Awẽ tsai chaka waa’, ma ea waime. Ewẽ Epã ea bai adu nichidi”, Jesúspa atu wadi.

³⁷ “Ewẽ Epã awara atiru keskara ẽ ayabaitu ea ikũira wayabakawe.

³⁸ Ea ma ikũira waiba na tsuã atiruba keskara ẽ akaitu ea ikũira wakawe tapixikakĩ ewẽ Epa ewe. Ẽriwi ewẽ Epawe”, Jesúspa atu wadi.

³⁹ Naa dikakata ana Jesús achipaidiwu. Atubakiduax kaitu tsuã tapidiba. Naskake tsuã achidiba.

⁴⁰ Naduax kai ede Jordán ari kadi na Juanpa yurawu bautizawapaudi adu. Nadu chaibashta Jesús netedi ede keseme.

⁴¹ Naskake nadu yurawu aki wediwu. Yuidiwu iskawakakĩ: “Jesúspa Diosuxũ awarawu akĩ duku uĩbai. Juanpa askawapaudiba. Naskaweke na Juanpa Jesús udua duku yuidi ikũkui”, ikadax yuinadiwu.

⁴² “Ikũ Jesús Diospa Wake”, ikaxu yurawawe Jesús ikũira wadiwu.