Génesis 9 - Yura porciones de la biblia

Diosweta Noépa shinadiwu

¹ Diospa tsai shara Noé yuidi awẽ wakewuya. Tsai iskara atu yuidi: “Wake ichapa akawe baitiixu adu inuwu.

² Yuina wetsa keskarawu bai aduawu biki besexikadi. Peiyawu wumakaya ikawu bai adu ikawu enewa mera ikawu nawuna mi atũ bitsisipa ipadaka.

³ Naatiiwi yuinawu ma pitiru piti wadanabeawu ma pitiru. Nawu batu inai.

⁴ Naskaweke dabi ibiya ma pitiruba. Na ibi uduax nu ika.

⁵ Naskatari dukuwede ẽ ñukaxiwi awa chakawabismaiki yuinawuri. Yuinatu yura reteke naa yuina ma retetiru.

⁶ Yurã wetsa reteke naari wetsã retepakedaka Epa Diospa dukuwede na keskaramai udiwadike.

⁷ Naskake wake ichapa akawe baitiixu adu inuwu”, Diospa Noé yuidi.

⁸ Diospa Noé awiana yuidi awẽ wakewuya:

⁹ “Batuweta ẽ shinakuiyai matu kaiwuu uduax ichapanawã kaĩpakedakawuwetari.

¹⁰ Naatiiwi peiyawu yuina idawanabetiruwu yuina dii mera ikawu batuwe xaxuwã mera ikiyabeawu na ẽ batu yui naatiiwi na yuinawu bai adu ikawu.

¹¹ Ana ẽ awiana waipawane bai wepudakaba naatiiwi yurawu yuinawu ẽ ana aweskawadakaba. Batuweta naa ẽ shinakuiyai ana wetsadakaba.

¹² Batuweta naa ẽ shinakuiyai yuinawuwetari naskapakedaka.

¹³ Ewẽ nawawai nishu mera ẽ waa. Na bai adu ikawawe naatiiwixu uĩpakedakawu na nu shinakuiyai.

¹⁴ Bai adu nishu ẽ ubayaidu nadu ewẽ nawawai ipadaka.

¹⁵ Waipawane yurawu yuinawuriwi ẽ ana atu adaitidakaba. Batuweta yuinawuwetari na ẽ shinakuibis ẽ shinaxiwi.

¹⁶ Naskake nawawai nishu mera ẽ uĩkĩ ẽ shinaxiwi. Na yurawuweta yuinawuwetari ẽ shinakuipakedaka ẽ shinabis.

¹⁷ Na ẽ batuweta shinakuiyai yuinawuwetari da bai aduxu”, Epa Diospa Noé naduri yuidi.

Noé awẽ wakewuwe

¹⁸ Noé awẽ wakewuwe xaxuwã meraduax tsekediwu. Awẽ ade Sem Cam Jafet. Cam wake wistiya awẽ ade Canaán.

¹⁹ Naa tres Noépa wake idi. Naawuweta awiana na baitiixu wake ichapa kaĩwadiwu.

²⁰ Noépa bae yuduki taewadi. Naskaxu wibi wadadi awẽ ade uva.

²¹ Peda wetsa Noépa uva ede ayax paedi. Awẽ yuina wichi tapas meradua ñewa rakadi.

²² Naskaitu Cam awẽ apa ñewa uĩkĩ awẽ uchi rawe yui kai kadi Campa awẽ rewuduwu Canaánĩtawu idi.

²³ Naskaidu dikawerãkaxu Semweta Jafet awẽ rakuti wekaxu apa chituria uĩkakĩ wepudiwu. Chitekiri wukaxu apa rakudiwu chituria uĩnuwuba.

²⁴ Naskax Noé paei buinakawa tapidi awẽ wake chipuketu Canaánpa chituria uĩke

²⁵ yuikĩ iskawadi: “Canaán awẽ kaiwuunuax ichapanawãwu kaĩpakedakawu chaka iixikadi. Canaán kaiwuunuax ichapanawãwu kaĩpakedakawu mewẽ uchĩ raweta atũ yudubatiwu iixikadi”, Noépa Cam wadi.

²⁶ Awiana yuidi: “Mi Sempa awẽ Dios sharakui. Canaánitawu atũ uibatiwu inuwu.

²⁷ Naskata Epa Diospa Jafet bai ewapa waxunu awẽ udiwetsa Sempa awẽ pexe mera awe inu. Naskax Canaán awẽ kaiwuunuax ichapanawã kaĩpakedakawuri Semweta Jafet atũ uibati inupukuwi”, Noépa yuidi.

²⁸ Naska na waipawã daxayaidu chipu Noé trescientos cincuenta wari iyupaudi.

²⁹ Naatiã Noé awẽ wari novecientos cincuenta wari idi. Naatii wari akax dadi.