Génesis 7 - Yura porciones de la biblia

Waipawã

¹ Epa Diospa Noé yuidi: “Naatiiwi yurawu adua berewisti mi dukuwede shara ibis. Xaxuwã mera ikiwe mewẽ kaiwuuwe.

² Yuina sharakuiwuri nu pitiru atu ikibawe siete dukuwede siete awĩwu. Na nu pitiruba wede wisti ikibata awĩ wisti ikibawe.

³ Naskatari siete peiya wedewu ikibata siete peiyawawe atũ awĩ ikibawe naa yuyabiswu naawu bai adu ipaxanuwu.

⁴ Siete peda ikadu ẽ ui ibaxiwi taewakĩ cuarenta peda ui inu cuarenta yabetari ui inu. Naskaxu ẽ naatiiwi adaitikuixiwi naa ẽ udiwadiwu”, Epa Diospa Noé wadi.

⁵ Epa Diospa Noé yuiya keskakuidi.

⁶ Enewane naatiiwi wepuadu Noé seiscientos wari ma aka idi.

⁷ Noé awẽ awĩnu awẽ wawawati ikikata awẽ wakewuri xaxuwã mera ikidiwu asayabaxikakĩ.

⁸ Naskatari yuina sharakuiwu ikikata na nu pitiruwubawuri ikidiwu. Yuina nu pitiruwuri ikidiwu yuyabiswu xaratiruwuri.

⁹ Epa Dios yuiya keskakuidiwu. Awĩwe wede ikidiwu Noéwe.

¹⁰ Siete peda ma ikadu ui wei taedi na baitiixu.

¹¹ Noé seiscientos wari ata uxe rawe ma akadu diecisiete pedari ma ikadu bai meraduax enewawu tushainiwuwawuwaĩdi. Naskatari dai meraduax uiwa ichapa wei taedi.

¹² Cuarenta peda ui ichapa ita yabetari ui ichapa cuarenta peda idi.

¹³ Na pedata Noé awẽ wakewuya xaxuwã mera ikidiwu. Awẽ wakewawe atũ ade Sem Cam Jafet atũ awĩwuya xaxuwã mera ikidiwu.

¹⁴ Yuina wetsa keskarawu xaxuwã mera atuwe ikidiwu. Yuina dii mera ikawu yuina idawanabetiruwu na xaratiruwuri peiyawuri ikidiwu.

¹⁵ Naskakadax xaxuwã mera yuina wetsa keskarawu rawe rasi Noéwe ikidiwu.

¹⁶ Epa Dios Noé yuiya keskakuikadi wede wisti awĩ wisti ikidiwu. Diaiwu Dios xaxuwã wepudi.

¹⁷ Cuarenta peda ui ichapa idi. Ma waipawane bai wepuadu xaxuwã dududi.

¹⁸ Enewa yusiyaidu xaxuwari dudui dadi.

¹⁹ Yusidakĩ machiwawu waipawane wepudi.

²⁰ Machiwa keyakui ede waipawane winuta siete metros enewa awiana yusidi.

²¹ Yurawuri dadiwu naa bai adu ikawuri naskax peiyawu asaiwudu. Yuina idawanabetiruwu asaidu yuina dii mera ikawu asaiwudu bai adu xaraiwuri naatiiwi asadiwu.

²² Naskax na bai adu ikawu xakaitiruwu naatiiwi asai bitukubediwu.

²³ Naskaidu Noéwe awẽ xaxuwã mera ikiawu wistikai tsua dadiba naatiiwi wetsawu asaiyaiwudu. Naatiiwi yurawu yuina idawanabetiruwu yuina dii mera ikawunu peiyawunu bai adu xaraiwu naatiiwi dai adaitidiwu. Na xaxuwã mera Noé awẽ kaiwuuwe netedi.

²⁴ Naskadu na baitiixu waipawane wepuadu ciento cincuenta peda wenakai daxadiba.