Génesis 6 - Yura porciones de la biblia

Dukuwedewawe atũ chakawu

¹ Dukuwedewu awĩwuuri ichakaxu wakewu apãdiwu xutukuwake taewadiwu.

² Epa Dios awẽ wakewawe awĩwu sharakui uĩkata wianapaudiwu.

³ Naskaxu Epa Diospa yuidi: “Ẽ yurawu atu ibapakedakaba. Atuki ciento veinte wari wisti ipadaka”.

⁴ Dukuwedewu keyabasuawu bitsisipakui nawu setenabiswu ipaudiwu. Epa Dios awẽ wakewawe yura chakawuwe wianakaxu wakewu apaudiwu. Yurawu baitiixu ikawawe atũ ade tapikuiyawu ipaudiwu.

⁵ Epa Diospa uĩya bai adua yurawu chakawu iwupaudiwu. Naskake na pedatiiwi chaka wisti shinapaudiwu.

⁶ Epa Dios shinabetsata awẽ uĩti meraxu shinadi na yurawu udiwadixakĩ bai adu ikawu.

⁷ Naskaxu Diospa yuidi: “Ẽ yurawu baitiixu udiwadi ẽ atu adaiti. Dukuwedewu awĩwuuya yuina wetsa keskarawu. Na xaratiruwuri peiyawuri ẽ atu adaiti. Ẽ shinabetsai atu udiwadixakĩ”, Epa Dios idi.

⁸ Naskawiax Epa Diospa Noé uĩdi dukuwede sharakui ipaudi.

Noépa awẽ xaxuwã

⁹ Noé dukuwede sharakui ipaudi. Epa Dios dikakuipaudi. Yurawu nadu askayaidu tsua shara ipaudiba. Epa Dios dikakaspapaudiwu. Tsua Noé keskara ipaudiba.

¹⁰ Noé tres wakeya idi. Awẽ wakewawe atũ ade wetsa Sem wetsari Cam wetsari Jafet idi.

¹¹ Epa Dios yurawu uĩya chakakuiwu idiwu. Setenakata retenakata chaka wisti shinabiswu ipaudiwu.

¹² Naatiiwi yurawu ma chakakuiyawu idi. Diospa bai adu yurawu uĩya chakakuiwu idiwu

¹³ Diospa Noé iskawadi: “Naatiiwi bai adu yurawu ikawutii ẽ atu adaiti atũ chakawu uduax setenakata retenabiswuke.

¹⁴ Iwi awẽ ade ada wepũya xaxuwã wawe. Xaxuwã kede ichapaya wata uke mera wuĩ wuyata xawakawiri wuyawe ede ikiyabanu.

¹⁵ Awẽ chai ciento treinta y cinco metros wawe. Awẽ petari veintidós metros y medio wata awẽ keya trece metros y medio wawe.

¹⁶ Tres pisos wawe. Xaxu mamakaya weputi medio metrori wawe. Awẽ patutana kaĩti wistiri wawe.

¹⁷ Ui ẽ webaxiwi naatiiwi bai adu ikawu enewane atu adaitikuinu. Naatiiwi dai bitukubexikadi.

¹⁸ Naskaweke dukuraweta nu shinaxiwi. Xaxuwã mera ikixikadi mewẽ wakewawe atũ awĩ ita mewẽ awĩri bewe ikĩxiwi.

¹⁹ Naskatari yuina wede yawi atũ awĩ yawi atu ikibata yuina idawanabetiruwu yuina dii mera ikawuri atu mi ikibaxiwi.

²⁰ Peiyawuri nama xaratiruwuri yuina wetsa keskara rawe naawu xaxuwã mera bewe ikinuwu naawu asayabanuwu.

²¹ Naskata yuinawawe atũ piti wetsa keskarawu xaxuwã mera ikibawe batunawuri nawu piixikakĩ”, Diospa Noé wadi.

²² Epa Dios yuiya keskakuidi Noé.