Génesis 50 - Yura porciones de la biblia

¹ Ma apa Jacob daadu pishkuxu Josépa siaiyana apa tsu adi.

² Naskata awẽ yudubiswu atu chachibiswu atu yuidi apa ma daadu putei wenuwu awẽ xakĩ tsekai wunuwu pisiyabanu. Josépa atu yuiya keskawadiwu.

³ Putexikakĩ betu wanu cuarenta peda badayudiwu. Naatii peda ikaidu itipinidiwu. Setenta peda Egipto adu ikawawe Jacob shinadiwu ma daitake.

⁴ Apa shinabakita faraónwe yudubiswu Josépa atu yuidi: “Ẽ batu idibababismaiki ea faraón yuixutakawe:

⁵ ‘Ea yuikuiwe’, ewẽ epa ea wayabea Canaán bai kidi adu ẽ baiwanupukunu. Awikui bai kidi itipiniwadi nadu ẽ baiwanupukunu. Baiwata ẽ awiana ẽ uikai”, Josépa faraón wadi.

⁶ Naskata faraónpa yuidi: “Mewẽ epa baiwatawe. Na bia yuibis keskawatawe”.

⁷ Josépa apa baiwai kaidu faraónpa awẽ pexe adu diaiwu wetsawu Egipto aduax Joséwe wudiwu.

⁸ Jacobpa awẽ kaiwuu Josépa awẽ kaiwuu bai Gosen adu ichanadiwu atũ pexe adu atũ wakewu nichiwaĩdiwu atũ yuinawu kexenuwu.

⁹ Naskata caballo carroyatu yura ichapa Joséwe wudiwu.

¹⁰ Naskata katudiwu nadu awẽ ade Goren-ha-atad adu dukukata ede Jordán chaiba siete peda José shinabetsadi. Naatiiwi yurawu shinabetsakuidiwu.

¹¹ Canaán adu ikawawe siaikaiwawe uĩkakĩ yuidiwu: “Egipciowu shinabetsakadi siaikadi”. Naskake nadu adediwu Abel-misraim wadiwu. Naskaxu na bai adekakĩ Egipcio bai siaibis, wadiwu. Ede Jordán chaiba.

¹² Apa Jacobpa atu yuibis keskawadiwu awẽ wakewawe.

¹³ Abrahampa bai kidi Canaán adu hitita ika awẽ ade Efrónna Abrahampa peiuxũ bai kidi wiãdiadu na kidi awẽ ade Macpelá nadu Jacob baiwadiwu. Nadu Mamré chaiba idi.

¹⁴ Ma apa baiwakata José udiwetsawuwe na awe wuitawu Egipto adu dasudiwu.

Josépa awẽ udiwetsawawe shinadiwu

¹⁵ Apa ma daitadu Josépa udiwetsawawe shinadiwu: “Joséparaka duku duikaspaiki na nu chakawadiuxũ”, idiwu.

¹⁶ Naskata José tsai wubadiwu: “Dayuxuba nuku epa duku yuibis

¹⁷ nu bia yuinu: ‘Mewẽ udiwetsawawe bia chakawadiwu. Atũ chakawuki raewe’. Ikũ nu bia chakawadi. Naskake dukuki raewe. Nuku epa awẽ Dios nu awẽ uibati”. Naa tsai dikai José siaidi.

¹⁸ Naskata Josépa awẽ udiwetsawu dukukata baikiri wepepakewuwakata yuidiwu: “Ma nu ua. Nu mewẽ uibatiwu”, wadiwu.

¹⁹ Naa dikakĩ atu kebadi: “Beseyabakawe. Ẽ Diosba”, Josépa atu wadi.

²⁰ “Matu shinama ma ea chakawapaidi. Naskaweke Epa Diospa naa chakawu sharawadi yurawu uduax ẽ rawanainu.

²¹ Naskata beseyabakawe. Ẽ batu piti inata matu wakewuri inai”, atu wadi. Naskaxu Josépa awẽ udiwetsawu atu shinabasharadi.

José dadi

²² José awẽ kaiwuu apã awẽ kaiwuu Egipto adu ipaudiwu. José ciento diez wari ma aka idi.

²³ Josépa awẽ wake Efraín. Efraínpa awẽ xutawu Josépa dayuxuba uĩdi. Manasés Josépa awẽ wake wetsa naatu awẽ xutawuri awẽ wawa awẽ wake Maquirna Josépa uĩdi. Awẽ ratuku adu atu tsaũdi.

²⁴ Peda wetsa Josépa awẽ udiwetsawu atu yuidi: “Ẽ awetiãra ẽ dai. Naskatari da bai aduxu Epa Diospa batu nichinupukui rewu Abraham Isaac Jacob atu yuiyudi adu”, Josépa atu wadi.

²⁵ Naskata awẽ wakewawe José yuikuinuwu atu yuidi: “Ea yuikuikawe”, atu wadi. “Ẽ batu yuikui. Epa Dios batu axunupukui. Naskake ẽ dake ewẽ xaka ma wutiru”, Josépa atu wadi.

²⁶ José Egipto aduax dai ciento diez ma wari akax dadi. Naskata awẽ xakĩ tsekadiwu na daadu watiruwu adu dadediwu.