Génesis 49 - Yura porciones de la biblia

Jacobpa awẽ wakewu atu tsai shara yuidi

¹ Jacobpa awẽ wakewu kedata atu yuidi: “Iki wekawe ẽ batu yuinu na ma inupukuwai.

² Iki wekawe ewẽ wakewawe. Matu epa Israel dikakawe.

³ Rubén mi ewẽ wake iyua. Ẽ bitsisipadu mi kaĩ taedi. Naatiiwixu miũ duiyawu. Mi bitsisipa.

⁴ Ea mia sidanabadi ewẽ awĩ wetsawe mi idi. Naskake ana mi bitsisipaba. Mewẽ extuwu ana mi winuaba. Na mi edewai keskara ana bia tsuã kayakawiwatiruba.

⁵ Simeónwe awẽ udiwetsa Leví atũ espadapa atu retepaiyaiwu.

⁶ Ẽ atuwe ichanapaitiruba naa rawetamai sidakakĩ yurawu retekata baitsikui vacawu uxtediwu.

⁷ Ma sidabis. Ma chakakuiwu. Ma tsua ubisbabisba. Naskake ẽ batu paxkanawai Israelpa awẽ bai aduxu.

⁸ Judá bia idimaxuxikadi mewẽ udiwetsawawe. Bia duikaspabiswu mi atu winupakedaka. Naskatari mewẽ udiwetsawawe mewẽ werutaiwi bia baikiri wepexupakewuwaxikadi.

⁹ Ewẽ wake Judá leónpa awẽ wake keskara. Ma dabi pita rakake tsuã wekaxtiwatiruba keskara.

¹⁰ Judá diaiwuadu tsuãkai awẽ bitsisipa wiãdakaba diaiwu datukui yurawawe ikũira wanupukukadi uyuabadu.

¹¹ Uva wadaki awẽ burro nadu dexata uvapa awẽ ene awẽ saweti patsatiru.

¹² Awẽ weru rawe wisukui na vino keskara. Awẽ xeta uxukui daiweru keskara.

¹³ Zabulón enewa ketukunu inupukui. Nadu xaxuwawu inupukukadi. Nadua Sidón adu dukutiru inupukui.

¹⁴ Isacar na mi burro bitsisipakui keskara awẽ chabiupu raweki nexpakaya waax aki raka.

¹⁵ Bai shara uĩta tedetirupinishara mi uĩdi. Naduxu uibatiwawe atũ yudu mi yudunupukui mi katĩta awarawu wuuxikĩ.

¹⁶ Danpa awẽ kaiwuu atũ diaiwu iwaidaka. Jacob Israelpa atũ wakewawe atu ixuwai keskai.

¹⁷ Dan rudu keskara wai keseme badixu yura caballopa kaidu awẽ taxuki chachiadu ana aũ katiruba. Naskara mi inupukui.

¹⁸ Diaiwu Dios ẽ bia badai ẽ udua mi rawanainu.

¹⁹ Gad yura ichapawawe retepakedakawu. Naskawaiwawe espadayaxu atu retepakedaka.

²⁰ Aser piti ichapaya inupukui. Diaiwuwawe piti sharakui pipaitiruwu atu inanupukui.

²¹ Neftalí na chaxu keskara na kapaiyaidu katiru. Wake sharaya.

²² José uva iwi ede ketukunu dia keskara. Awẽ uva wibi ichapaya shara itiru keskara. Awẽ puñawawe pexe weputiru keskara.

²³ Piayawawe José duikaspakata piakata wekaxtiwakadi.

²⁴ José bia tsuã aweskawatiruba. Yura chakawawe bia aweskawatiruba. Aichu Epa Dios bitsisipakui na mi oveja kexebis keskara mia duku kexea. Jacobpa awẽ Dios.

²⁵ Aichu mewẽ epa awẽ Dios naatu bia axunupukui. Dios bitsisipa naatu awara atirutu sharakui bia inanupukui. Dios ikaduxu sharawata bai aduxuri bia sharawata mewẽ wakewu atũ awã wake kãibanupukui atu awẽ xuba abanupukui.

²⁶ Mewẽ epã bia awara sharawu ina winubata. Ewẽ epawawe ea askawadiwuba. Naa awara sharawu Josépa awẽ bapu adu ipadaka. Mewẽ udiwetsawu adua Epa Dios bia kañawadi.

²⁷ Ewẽ wake Benjamín lobo keskara na awara retexu wenamari pita ñatapake na texea atu akĩtiru”, awẽ wakewu Jacobpa atu wadi.

²⁸ Nawu Jacobpa wakewu docewu. Nawu apa Israelpa tsai shara inapakekĩ atu yuidi.

Jacob dadi

²⁹ Peda wetsa Jacobpa awẽ wakewu yuidi: “Ẽ awetiãra dai. Ewẽ xidiwu baiyawu nadu ea baiwayaxakawe hititawawe na dukuwede awẽ ade Efrón bai kidi mera.

³⁰ Naa bai kidi Canaán adu awẽ ade Macpelá na pexe ichapa chaiba awẽ ade Mamré. Ewẽ chata Abrahampa dukuwede awẽ ade Efrón peiuxũ wiãdi. Efrón hitita adua idi. Nadu awẽ yurawu baipakenuwu. Naduri ea baiwaaxikawe.

³¹ Na ewẽ chata Abrahamnu Saranu ewẽ epa Isaacnu ewẽ ewa Rebecari nadu baiyawu. Ewẽ awĩ wetsa Lía naduri baiya.

³² Ewẽ chata Abrahampa hitita atũ bai kidi atu peiuxũ wiãdi. Naduri ea baiwayaxakawe”.

³³ Jacobpa awẽ wakewu ma atu yuita awẽ rakati adu rakapakekawãta dadi. Awẽ xidiwu adu kadi.