Génesis 48 - Yura porciones de la biblia

Josépa awẽ wake rawe Jacobpa atu tsai shara yuidi

¹ Apa isinikaitu ma awetiira peda ikadu José yuidiwu. Naskata Josépa uĩ kai kadi. Awẽ wake rawe iyudi Manasésya Efraín.

² Awẽ wake José yuiyawudu ma uwaidu Jacob rakawiax widinakawata tsaudi.

³ Jacobpa José yuidi: “Bai Canaán pexe ichapa Betel awẽ ade wetsa Luz nadu iki Epa Dios bitsisipakui dukudi. Naduxu ea tsai shara ea yuidi.

⁴ Iskara tsaima ea yuidi: ‘Mi wake ichapaya ita mewẽ kaiwuu uduax ichapanawã kaĩpakedakawuya mi inupukui. Naskatari nawu uduax xuku ichapa wetsa keskarawu. Da bai batunawu ipadaka’.

⁵ Ẽ biki dukuabadu daa bai adu mewẽ wake rawe Efraínwe Manasés Egipto aduax kaĩdiwu. Naa rawe na ẽ Rubén Simeón atu ẽ aka keskara.

⁶ Na mi chipu wake akawu naawu mewena iixikadi. Nawuwaweri awarawu wixikadi atũ uchiwuuxũ.

⁷ Padán-aram aduax ẽ dasuwaidu mewẽ ewa dadi bai Canaán adu pexe ichapa awẽ ade Efrata chaibakiduax. Naskatari Canaán bai adu ẽ baiwadi Efrata awẽ wai tapiadu awẽ ade wetsa Belén”, Jacobpa wadi.

⁸ Josépa awẽ wake rawe uĩkĩ Israelpa José ñukadi: “Da wake rawe tsuame”, wadi.

⁹ “Da wake rawe Egipto aduxu ẽ atu aka”, Josépa apa wadi. Jacobpa awẽ xuta rawe atu duiyana: “Dirishara wekawe ẽ batu tsai shara inanu”, atu wadi.

¹⁰ Israel adiwushta idi ana uĩtiru idiba. José awẽ wake rawe eweadu apa Jacobpa pishkuwai atu tsu adi.

¹¹ Naskata apã José yuidi: “ ‘Ana ẽ uĩdakaba’, ẽ bia waidu Epa Dios ea uĩbada mewẽ wake raweya”, Jacobpa wadi.

¹² Naskata José apã ratuku adua awẽ wake rawe iwita baikiri wepepakekawã Dios idibaxudi.

¹³ Naskata awẽ wake rawe metsudi Efraín awẽ bibiyauri Manasés awẽ bibibauri. Naskata apa aduax kadi. Apa Israelpa awẽ bibiyauri Manasés wadi awẽ bibibauri Efraín wadi.

¹⁴ Israelpa awẽ puña rawe kuyaxu awẽ xuta rawe mamadi. Awẽ biwi bibiyauri awẽ xuta chipuke Efraín awẽ bapu mamadi awẽ biwi bibibauxuri awẽ xuta iyua awẽ bapu Manasés mamadi. Naskaweke Manasés iyua.

¹⁵ Naskata José tsai iskaratu yuidi: “Ewẽ xuta Abrahamnu ewẽ epa Isaacnu ikũira wapaudiwu Epa Dios. Naatu ẽ kaĩyadu ea kexekĩ taewadi.

¹⁶ Na ángelpa ewẽ chaka sharawaxua da pexku rawe atu sharawaxinu. Ewẽ ade shinapakexanuwu atuuxũ ewẽ epa Abrahamuxũ Isaacuxũri. Nawu uduax ichapakexanuwu na baitiixu ipaxanuwu”, wadi.

¹⁷ Jacobpa Efraín mamayaitu uĩkĩ Josépa duidiba. Naskaxu apã biwi wiyata Efraín bapu adua wita Manasés mamabapaidi.

¹⁸ Naskata yuidi: “Epashtã aaba. Da iyua mamawe”, Josépa apa wadi.

¹⁹ Apã kebadi: “Ma ẽ tapia. Ma ẽ tapia. Dariwi atũ diaiwukui idaka. Naskaweke awẽ chipuketu iyua winuxiwi. Awẽ kaiwuunuax ichapanawã kaĩpakedakawu ichapa inupukukadi”, Jacobpa José wadi.

²⁰ Naa pedata tsai shara atu yuikĩ iskawadi: “Israel ikawawe matu adeuxũ atu iskawapadakawu. ‘Efraínwe Manasés Epa Dios atu sharawadi keskawakĩ batu wapainu’, wapadakawu”.

²¹ Ma atu yuita Israelpa José iskawadi: “Ẽ sababa dai. Naskaweke Dios batuwe inupukui. Naatu matu xidiwu atũ bai adu batu dasubanupukui.

²² Ẽ bia awara inai mewẽ uchiwu ẽ atu inabisba. Bai Siquem aduxu ẽ amorreowu ẽ retexu wiãdi naa ẽ bia inai mimai atu winuke”, Jacobpa awẽ wake José wadi.