Génesis 47 - Yura porciones de la biblia

¹ Josépa faraón yui kai kadi. Canaán aduax awẽ apawe udiwetsawu Gosen adu dukuawuadu duduri yuidi: “Ewẽ epawe ewẽ udiwetsawawe atũ vacawu wekata atũ ovejawuya atũ awarawu ma weawu”, Josépa faraón wadi.

² Josépa faraón adu awẽ udiwetsa cinco atu iyudi atu tapinu.

³ Ma weawudu faraónpa atu ñukadi: “Awa ma yudubisme”, atu waitu kebadiwu: “Nuku diaiwũ nuuwawe oveja nu kexebis nuku xidiwawe apaudiwu keskawakĩ.

⁴ Da bai adu nu ikiyua Canaán adu ana pitiyabake. Naskatari ana ari wasiba ovejawawe pipana. Nuku diaiwũ bai Gosen adu duku ibawe”, wadiwu.

⁵ Naskata faraónpa José yuidi: “Mewẽ epa ikaidu mewẽ udiwetsawu bewe iki weawu.

⁶ Da bai Egipto adu atu ibawe na bai awẽ ade Gosen. Bai shara atiri askaraba. Nadu sharakui. Naskatari dukuwede nadua vaca kexekĩ tapia wetsã ea kexemaxuwe”, faraónpa José wadi.

⁷ Josépa apa Jacob faraón adu iyudi. Naskata Jacobpa diaiwũ ma ẽ dukua duiyana faraón wadi.

⁸ Faraónpa Jacob ñukadi: “Awetii mewẽ warime”, wadi.

⁹ Faraónpa awẽ wari ñukaitu Jacobpa kebadi: “Ewẽ wari ciento treinta. Na baitiixu ẽ kawa kawakakaĩtiadi. Ewẽ xidiwawe atũ wari ichapa ipaudiwu. Naskaweke na wari ichapabawiax ẽ ubiskuipaudi”, Jacob idi.

¹⁰ Naskata Jacob faraónpa awẽ pexe aduax tsekekaita kadi.

¹¹ Egipto bai adu Josépa bai sharakui atu inadi nadu inuwu. Diaiwu faraónpa yuita keskadi. Naskakadax bai Ramsés nadu idiwu.

¹² Naskatari Josépa awẽ kaiwuutii piti ñukaiwawe atu inata na wake ichapayatii piti ichapa inapaudi. Na wake ichapabaya ichapaba inapaudi.

Josépa naatiiwi atu piti inadi ma wudikuiyaiwudu pexe adu wabixakĩ

¹³ Egipto bai adu piti keyuta Canaán adu ana piti idiba. Naskayaidu na pedatiiwi yurawawe awa pipaudiwuba. Yurawu wuni dapaudiwu.

¹⁴ Egipto adu ikawawe trigo peiuxũ wipaudiwu. Canaán ikawaweri peiuxũ wipaudiwu. Na peiwu diaiwu faraónpa pexe adu Josépa wadi.

¹⁵ Egipto ikawuwe bai Canaán ikawawe ana peiyakadaxba José yui wukadi wudiwu: “Ana nu peiyaba. Duku piti inawe. Wuni daa sharaba”, wadiwu.

¹⁶ Naskata Josépa atu kebadi: “Ana ma peiyabaki ea matu yuinawu ea wexutakawe nawuxũ ẽ batu trigo inanu”, atu wadi.

¹⁷ Egipto bai adu ikawawe caballowu ovejawu vacawu asnowu nawu José wuxukata Josépa wari wisti atu trigo inapaudi.

¹⁸ Ma wari wisti ikadu wari wetsa José yui wukadi wudiwu: “Nu bia paraiba ana nu peiyaba. Naskatari ana nu awayaba. Nu bia inapana. Nuku bai wisti ita nuku kaya wisti.

¹⁹ Duku peiuxũ wiwe nuku bairiwi nauxũ trigo duku inaxikĩ. Faraónpa awẽ uibati nu inu. Naskatari awẽ bai adu nu yuduxunu na mia duku exe inayai. Aweskake duku mia wuni dabatirume nuku kaiwuuya”, wadiwu.

²⁰ Naskaxu Josépa faraón bai peiuxũ wixudi Egipto adu ikawuna. Wudikuikakĩ José atũ bai inadiwu. Naskata naa baiwu faraónna idi.

²¹ Na yurawu Egipto adu ikawu faraónpa awẽ uibatiwu idiwu.

²² Sacerdotewawe atũ bai Josépa peiuxũ wĩadiba faraónpamai atu piti ichapa inayaitu. Naskake sacerdotewawe atũ bai peiuxũ inadiwuba.

²³ Naskata Josépa yurawu atu yuidi: “Datiã ma ikadu naa bai faraónna. Ẽ bai peiuxũ wixua. Da trigo exe matu wai adu wadakawe.

²⁴ Naskaweke faraón naamai iwuke ma trigo cinco chabiupu wikata wisti diaiwu faraón ma inanupukui. Naskatari cuatro chabiupu batuna iixiwi. Atiriwi wai adu ma wadaxiwi. Nari matu piti ita matu wakena iixiwi”, Josépa atu wadi.

²⁵ Nawawe kebadiwu: “Mi dukuki shara. Nu wuni dayabanu mi duku uduax rawanaika. Naskake nuwu faraón awẽ uibatiwu nu iki”, José wadiwu.

²⁶ Faraónpa awẽ tsai bitsisipa Egipto bai adua naskanuwu Josépa atu yuidi Iskaratiãri naskara: Chabiupu wakaxu wisti faraón inakawe. Sacerdotewawe faraón peiuxũ inadiwuba. Naskake sacerdotewawe atũ bai faraónna idiba.

Jacobpa ana atu tsai yuixakĩba atu tsai yuikĩ wisti wadi

²⁷ Israelitawu bai kawashara Gosen adu idiwu bai Egipto adu. Naduax baiyakata ichadiwu.

²⁸ Egipto adu Jacob diecisiete wari idi. Ma aki ciento cuarenta y siete wari ma aki ika idi.

²⁹ Israelpa awẽ yura beekĩ ma dayaxakĩ naskaxu awẽ wake José kedabaxu yuidi: “Mi ea duikuimaiki mewẽ biwi ewẽ kishi nunamari wawe ea yuikuiwe na ẽ bia yuiyai ea axuyaxawe. Da bai Egipto adu ea baiwayabawe.

³⁰ Ma ẽ daadu Egipto aduxu ewẽ xidiwadu adu ea iyuyaxawe atuya ea baiwayaxakĩ”, Israelpa José wadi. “Na mia yuiyai keska ẽ bia waaxiwi”, Josépa wadi.

³¹ “Ea yuikuiwe”, apã wariawaitu Josépa yuikuidi. Naskax Israel rakapakekawãta awẽ uxatiru aduax baikiri wepepakekawãdi. Naduxu Dios idibaxudi.