Génesis 45 - Yura porciones de la biblia

Josépa udiwetsawu unabadi

¹ Josépa ana tedetiruba beekĩ awẽ uibatiwu atu yuidi: “Naduax tsekeyunuwu”. Awẽ udiwetsawu tapibaidu awẽ yudubiswu adu tsua idiba.

² Naskata José siaikaitu Egipto ikawawe dikadiwu. Diaiwu faraónpari dikadi.

³ Josépa awẽ udiwetsawu atu yuidi: “Ẽ José. Ewẽ epa dayuabame”, atu waitu ratekuiyana kebadiwuba.

⁴ Naskata Josépa atu ubisbayana: “Dirishara wekawe”, atu wata. Ma aki weawudu atu yuidi: “Ẽ José matu udiwetsa peiuxũ Egipto ikawu ma ea atu inadi.

⁵ Naskake bawirasi ‘Mi idi’, ma watanaki peiuxũ ea ma atu inadi. Dios ea rewu nichidi yura ichapa uduax ẽ rawanainu.

⁶ Ma wari rawe dudua yurawu wudiawu. Cinco wari iyuaba ma trigo wadawiawu tsua awa wixiwiba.

⁷ Ma uyuabadu Epa Dios ea rewu nichidi batu uduax ẽ rawanainu. Ma wudiyabanu matu kaiwuunuax ichapanawã kaĩpakedakawu dayabanuwu.

⁸ Ea ma nichidiba. Epa Dios ea dudu nichidi. Naatu ea axuwaidu ẽ faraónpa awẽ tapibabis. Naatu ea yuiyadu Egipto bai adu ẽ atũ yudua.

⁹ Wukata duduri ewẽ epa yuitakawe: ‘Mewẽ wake José iskaratiã Epa Dios Egipto adu diaiwuwaa ewẽ epa ea waxutakawe kushi ea uĩyunu sabarakayabanu.

¹⁰ Naskax na bai Gosen adu ma itiru mewẽ wakewuri mewẽ wawawuri mewẽ yuinawuri mewẽ awarawuya ma utiru. Naskaxu ẽ ika chaiba ma itiru.

¹¹ Ẽ duduxu batu piti inaxiwi bia inata mewẽ kaiwuuri na mewẽ ikawuriwi awa ma yupayabanu. Cinco wari yurawu wudixikadi’ ”, Josépa awẽ udiwetsawu atu wadi.

¹² Josépa awiana atu yuidi: “Ewẽ extu Benjamínweta maawawe uĩyaidu ẽ yui.

¹³ Ẽ udua ewẽ epa yuitakawe Egipto adua ẽ diaiwu. Naskatari na ma uĩyawu yuitakawe. Ewẽ epa kushi unu”, Josépa atu wadi.

¹⁴ Josépa Benjamín pishkuxu siaikidi. Benjamínri siaidi.

¹⁵ Naskata José awẽ uchiwu atũ tabuki tsu adi. Atu pishkuxu siaikidi. Udiwetsawawe ana besekataba tsai adiwu.

¹⁶ Josépa awẽ uchiwu Egipto adu dukuawu dikai faraón awẽ yudubiswuwe idibadiwu.

¹⁷ Faraónpa José yuidi: “Atũ yuina mamakaya awarawu wakata bai Canaán adu wutanuwu. Dadekata awẽ udiwetsawu Canaán adu dasunuwu.

¹⁸ Naskatari matu epa ea ewexukawe awẽ kaiwuuriwi. Da bai Egipto adua bai sharakui ẽ atu inanu. Naskatari na bai Egipto yudu udia piixinuwu.

¹⁹ Egipto adua caballo carroya wukata atũ wakewu iwikata atũ awĩ iwitanuwu. Naskatari matu epa ewenuwu atu yuiwe.

²⁰ Atũ awarawu wawerãdaiwu shinachakayabanuwu da bai Egipto adua awara shara atuna iixiwi”, Faraónpa José wadi.

²¹ Naa faraónpa atu yuiya keskawadiwu Israel wakewawe. Josépa atu caballo carroyawu inata atu piti inadi wukakĩ piwaĩtanuwu.

²² Saweti weda atu inadi sawenuwu wisti rasi. Naskatari Benjamín trescientos pei sapa cinco saweti inadi.

²³ Diez asno awẽ padu mamakaya trigo piti wetsawuriwi pan ukĩ piwunuwu atu inadi. Diez asno wede mamakaya Egipto adua piti sharawu apa wubadi.

²⁴ Josépa nichiyana atu yuidi: “Wukadi ma chakanawatanawukiki”.

²⁵ Egipto aduax Canaán adu wudiwu. Atũ apã awẽ ade Jacob ikadu dukudiwu.

²⁶ Ma dukukata yuidiwu: “José daaba. Egipto bai adua atũ diaiwu”, Jacob waiwawe awe itaba atu ikũira wadiba.

²⁷ Josépa atu yuita apa yuidiwu. Naskata Josépa caballo carroya keskara wubaita uĩ Jacob idibakuidi.

²⁸ Naskata Jacob iskadi: “Ea yuiyawu ewẽ wake José dayuaba. Dayuxuba ewẽ wake ẽ uĩkai”, Jacob idi.