Génesis 44 - Yura porciones de la biblia

Josépa kechu sharakui

¹ Naskata Josépa awẽ pexe adua awarawu kexebis yuidi: “Na dukuwedewawe atũ chabiupu mera trigo wuspiwaxuwe. Naskatari atũ pei chabiupu mera wisti rasi dadexupakewe.

² Naskatari ewẽ kechu sharakui atũ chipuke Benjamín awẽ chabiupu mera dadexuwe awẽ peiri nauxũ piti wia”. Awẽ pexe adua awarawu kexebistu na Josépa yuiya keskawadi.

³ Peda wetsa wenamarikui Josépa awẽ udiwetsawu atũ asnowuya wutanuwu yuidi atũ bai adu.

⁴ Pexe ichapaduax chaiba kaĩyaiwudu Josépa awẽ pexe adua awarawu kexebis yuidi: “Na dukuwedewu wuwaiwu atu beewaĩta duduri atu yuitawe: ‘Nu batu sharawawiake ma duku chakawaa.

⁵ Aweskai ma kechu sharakui ma uneame. Ewẽ diaiwũ naa kechũ ayata unabis. Naa ma iskaita chakakui’, atu watawe”, awẽ pexe adua awarawu kexebis wadi.

⁶ Naskata atuki dukuta atu yuidi. Na Josépa yuiyadurikui yuidi.

⁷ Nawawe kebadiwu: “Diaiwũ aweskakĩ duduri mia duku yuime”, wadiwu. “Nu askabisba.

⁸ Canaán aduax nu dasuita. Duku chabiupu meradua nuku pei nu wichita. Nu bia dasuiyui. Aweskawaxikĩtsi nu mewẽ diaiwu pei oro nu unenatiruba.

⁹ Watura wetsa awẽ chabiupu meradua mi kechu wichixu naa mi retetiru. Nuwu mewẽ diaiwũ awẽ uibati ipadaka”, Josépa awẽ udiwetsawawe wadiwu.

¹⁰ Naskata Josépa awẽ pexe adua awarawu kexebistu atu yuidi: “Na ma yuiyai keskara inu. Naskake na kechu ewẽ diaiwu wẽa naa ewẽ uibati iki. Atiriwi aweskawuba nawu wukadi”, Josépa awẽ pexe adu kexebistu atu wadi.

¹¹ Nawuwawe atũ chabiupuwu wutubakata wepediwu.

¹² Pexe adua awarawu kexebis atũ chabiupu atu wepenapakedi. Atũ iyua wepenakĩ taewadi chipukui atũ chipuke wepenadi. Benjamín awẽ chabiupu meradua Josépa kechu wichidi.

¹³ Naskata awẽ udiwetsawu rateyana atũ saweti waxtediwu. Nu ubiskui raikaxu shinadiwu. Atũ asno mamakaya chabiupu wakata pexe ichapa adu dasudiwu.

¹⁴ Judá awẽ udiwetsawuwe Josépa awẽ pexe adu dukuwaiwudu José nadu idi. Baikiri wepexudiwu atũ wemanane.

¹⁵ Josépa atu yuidi: “Ma awa aweskawaame. Ma tapiabame na dukuwede ea keskara unakĩ tapia”, atu wadi.

¹⁶ Judápa kebadi: “Diaiwũ awa nu bia kebatirume. Aweskawaxu nu bia tapibatiruba nu awara chakawabisba. Diospa nuku chaka duduxu duku wichia. Datiã mewẽ uibatiwu nu iki na mewẽ kechu bia uneawe”, Judápa José wadi.

¹⁷ Naskaiwawe Josépa atu yuidi: “Aweskaxkai ẽ askatiruba. Ewẽ kechu shara ea unewaĩda da wisti ewẽ uibati iki. Ewẽ uibati ẽ batu wadakaba. Atiriwi matu apã pexe adu wutiruwu. Tsuã batu wekaxtiwaaba”, atu Josépa wadi.

“Diaiwũ ewẽ extu apa ari dasubawe”, Judápa José ñukadi

¹⁸ Naskata Judá José adu kaxu yuidi: “Ewẽ diaiwũ mi diaiwukui mi faraón keskarakui. Naskaxu ea dikawe ẽ bewe tsaipai tsuã dikayabaidu. Iki sidayabawe.

¹⁹ ‘Ma epayame’, mia duku waitu nu bia yuita. Naskatari: ‘Ma extu wetsayame’, mia duku waita.

²⁰ Diaiwũ nu bia kebaita: ‘Nuku epa adiwu. Nuku extu chipuke pexku. Nuku epa adiwuxu nuku chipuke adi’. Naskatari nu bia yuita: ‘Nuku epã nuku extu duikuibis’, nu bia waita. ‘Awa wistichi aka awẽ wake rawe. Naskake nuku epã duikui ma wetsa ma dadiadu’.

²¹ Naskatari nuku extu mi tapipaixikĩ: ‘Iwitakawe’, mia duku waita.

²² Nu bia yuiyabea: ‘Apã a wake nichitiruba. Awẽ wake nichiax datiru’, nu bia wayabea.

²³ Naskake: ‘Matu extu ma eweyabaitu ana ma ea uĩtiruba’, mia duku waita.

²⁴ Na mia duku yuitaduri nuku epa nu yuita.

²⁵ Ma sabarakadu nuku epa duku yuita: ‘Awiana peiuxũ trigo witakawe duku wayabea’.

²⁶ Nuku epa nu kebayabea: ‘Nuku extu chipuke dukuwe kayabaitu nu kaiba. Nu kawiyax diaiwu ikadu nu uĩtiruba’.

²⁷ Nuku epa duku yuiyabea: ‘Ma ma tapia ewẽ awĩweta wake rawe nu adi’, nuku epã duku wayabea.

²⁸ ‘Ewẽ wake rawe adi. Wisti ebakiduax ma kaa. Ana uĩbisba. Iskaraba ẽ uĩkĩ xatedi. Yuina dii mera ikatu ma pidi.

²⁹ Dariwi ea ma iyuadu aweskarake na uduax ẽ shinabetsai ẽ datiru’.

³⁰ Nuku extu duwe dasuyabaitu nuku epa shinabetsai ubiskuitiru naamai duikuikĩ.

³¹ Duku uduax awẽ wake nu iyuyabaitu nuku epa adiwushta awẽ shinabetsai datiru awẽ wake Benjamín uĩyabai.

³² Duduri ewẽ epa ẽ yuita: ‘Da wake ẽ kexesharakuikai’, ẽ waita. ‘Na ẽ yuiyai ẽ askaikai’. Naskatari: ‘Ewe dasuyabaitu na awara aweskarawu naa ewena iki’.

³³ Naskake ẽ bia yui ewẽ extu ataba ẽ mewẽ uibati inu. Udiwetsawuwe katanu nichiwe.

³⁴ Benjamínbais ewẽ epaki ẽ dasutiruba da wake ewe kayabaitu. Naskatari ewẽ epa ubiskuiyaitu ẽ uĩpaiba”, Judápa José wadi.