Génesis 42 - Yura porciones de la biblia

Josépa awẽ uchiwu Egipto wudiwu

¹ Jacobpa Egipto adu trigo dikakĩ awẽ wakewu yuidi: “Aweskai awara wetsa ma apaibame.

² Egipto adu trigo ẽ dika Trigo witakawe Egipto adua wuni nu dayabanu”, atu wadi.

³ Josépa awẽ udiwetsawu diez idi. Nawawe Egipto adua peiuxũ trigo wii wudiwu.

⁴ Jacobpa Benjamín nichikaspadi: “Josépa udiwetsa aweskaraikatiru”, raixu.

⁵ Jacobpa awẽ ade wetsa Israel. Canaán ikawawe trigo wii wukadi wudiwu. Israelpa awẽ wakewaweri piti wii wudiwu. Canaán aduax wudiaiwudu.

⁶ José bai Egipto adua diaiwu idi. Bai wetsaria weawu peiuxũ atu trigo inapaudi. Naskaiwudu udiwetsawu Canaán aduax Egipto adu dukukata Josépa awẽ werutaiwi baikiri wepepakewuwãdiwu.

⁷ Josépa awẽ udiwetsawu atu unawiki atu uĩbisba keskara atu wadi. Sidayana atu ñukadi: “Ma wakiax uime”, Josépa atu waitu udiwetsawawe kebadiwu: “Nu Canaán aduax ui trigo peiuxũ wiixikĩ”, wadiwu.

⁸ Josépa awẽ udiwetsawu ma atu unaweke udiwetsawawe unadiwuba.

⁹ Naskaiwudu Josépa na dabadi shinadi udiwetsawu udua. Josépa atu yuidi: “Ma duku uĩyua wakiri tsuã kexeyabamaikixu”, Josépa atu wadi.

¹⁰ Naskata kebadiwu: “Ewẽ diaiwu askaraba. Nuwu mewẽ uibatiwu nu trigo peiuxũ wiyua.

¹¹ Nuku epa wistichi duku aka. Nu yura parabisba. Nu yura unatiwabisba”, José wadiwu.

¹² “Ẽ batu ikũira waiba. Wakiri tsuã kexeyabamaikixu ma uĩyua”, Josépa atu wariawadi.

¹³ Naskata udiwetsawawe kebadiwu: “Nu mewẽ uibatiwu nu doce nuku epa wistichi duku aka. Nu Canaán adu ika. Nuku chipuke nuku epawe netea. Wetsa ana duweba”, wadiwu.

¹⁴ Naskaweke Josépa ana atu yuidi: “Na ẽ batu yuiyai ma unatiwabis.

¹⁵ Ẽ batu uĩnu ma unatiwabismaiki. Faraónuxũ ẽ batu yuikui. Ma duduax kaiba matu extu uabadu.

¹⁶ Watura wisti nichikawe matu extu iwitanu atiriwi cárcel mera neteyaiwudu. Nu tapinu na ma yuiya ikũmaiki. Ma chaniyabake ma duku unatiwabis. Ẽ faraónuxũ batu yuikui”, Josépa atu wadi.

¹⁷ Josépa udiwetsawu cárcel mera atu adi. Tres peda cárcel mera idiwu.

¹⁸ Ma tres peda ikadu Josépa atu yuidi: “Ẽ Dioski besei. Na ẽ batu yuiyai keskaitu ma ipadaka.

¹⁹ Ikũmaiki ma tsua parabisba watura wetsa ma dudu netei cárcel mera. Atiri wutakawe. Matu kaiwuu trigo wuxutakawe”, Josépa atu wadi.

²⁰ Naskaweke matu extu ea iwixutakawe na ma yuiyai ikũmaiki. Naskax ma datiruba atu wadi.

²¹ Awirasi yuinadiwu: “Ikũkui nu ubiskui nuku extu nu chakawadi uduax nu iskai. Ea iskawayabakawe ubiskuita siaiwiyaitu nu ubisbadiba”, ixu shinadiwu.

²² Naskata Rubén tsaidi: “Ma ẽ batu yuiwiyaitu: ‘Nuku extu chakawayabakawe’, ẽ batu wawiyaitu ma dikadiba. Ikũkui nu ubiskui nuku extu nu chakawadixakĩ”, Rubénpa atu wadi.

²³ Josépa atũ tsai dikawiyaitu awẽ udiwetsawawe tapidiwuba. Naa atũ tsai akai wetsã yuixuwudi.

²⁴ Naskata atubakiduax kata José siaidi. Naskata atu adu dasuta atu yuidi: “Simeón bedexkawe cárcel mera akawe uĩyaiwudu”.

²⁵ Naskata Josépa atu yuidi trigo chabiupuki atu wuspiwaxunuwu. Trigo peiuxũ wiãwu atũ pei atu nasudiwu. Atũ chabiupuki atu dadexupakediwu. Naskatari piwaĩtanuwu atu piti inadi.

²⁶ Naskata trigo atũ asno mamakaya wakata naduax wudiwu.

²⁷ Na uxaiwu aduxu da yabeta wistichi awẽ chabiupu wepeta awẽ asno pibapaikĩ awẽ pei wichidi.

²⁸ Naskata awẽ udiwetsawu atu yuidi: “Ewẽ pei ma ea ana waxuawu”, atu wadi. Naa uĩkadi ratediwu awirasi yuinadiwu: “Duku Diospa duku aweskawaime”, idiwu.

²⁹ Canaán adu dukukata atũ apa na ikitawu apa Jacob yuidiwu:

³⁰ “Diaiwu Egipto adu ikatu sidakuiyana duku iskawaita: ‘Ma duku unatiwai ua’, duku waita.

³¹ Naskake nu kebaita: ‘Nu chaniba. Nu yura wadi unatiwabisba.

³² Nuku epa wistichi duku aka nu doce. Ana wetsa duweba. Nuku chipuke Canaán adu neteita nuku epawe’, nu waita.

³³ Naskata naa diaiwawe duku iskawaita: ‘Ikũmaiki ma chanibamaiki ẽ uĩnu’, duku waita. ‘Matu udiwetsa wisti cárcel mera netei. Naskayaidu trigo matu kaiwuu atu wuxutakawe.

³⁴ Matu udiwetsa chipuke ea iwixutakawe. Naskaxu chaniba ẽ batu wanu duku unatiwabisba ẽ batu ẽ wanu. Naskaxu matu udiwetsa cárcel meradua ẽ batu tsekaxutiru. Naskatari da bai adua ma sharata itiru’, duku waita”, apa wadiwu.

³⁵ Josépa udiwetsawawe trigo napapaikakĩ atũ pei wichikadax apawe ratediwu.

³⁶ Naskata Jacobpa atu yuidi: “Maawawe ea ma wakeubawai. José ana duweba Simeónriwi. Benjamínri ea ma iyunapai. Ea ma ubiskuibabis”, atu wadi.

³⁷ Naskata Rubénpa apa yuidi: “Benjamín eaya nichiwe. Ẽ kexesharaikai. Ẽ eweikai. Ẽ bia ewexuyabaitu ewẽ wake rawe mi retetiru”, apa wadi.

³⁸ Naskata Jacobpa kebadi: “Ewẽ wake batuwe kaiba. Awẽ udiwetsa José ma dadi. Benjamín wisti ewe ika. Ma kaidu aweskarake. Ẽ shinabetsai datiru”, Jacob idi.