Génesis 40 - Yura porciones de la biblia

Panadero copero atũ daba Josépa atu yuidi

¹ Naskata Coperoweta panaderopa atũ diaiwu Egipto adua sidabadiwu.

² Diaiwu faraón atuki sidadi naa raweki. Vino yudubiswu atũ diaiwu copero idi. Pan yudubiswu atũ diaiwu panadero idi.

³ Naskake dukuwene diaiwu faraón kexebistu awẽ pexe adu atu nichidi na cárcel mera ikawu adu. Nadu José ika idi.

⁴ Na cárcel meradua atũ diaiwawe José kexebadi na faraónna yuduxubis rawe. Nadu ipaudiwu.

⁵ Coperoweta panaderopa na yabe wisti dabadiwu wetsa dabayaidu wetsari dabadi. Atũ daba tapikuipaidiwu.

⁶ Wenamari Joséuxũ shinachakayaiwawe atu wichidi.

⁷ Naskata atu ñukadi: “Aweskai matu wesu wetsa keskarame”, atu wadi.

⁸ Naskata: “Na nu dabawaa duku tsuã yuitiruba”, wadiwu. Josépa atu yuidi: “Dios wistichi batu yuitiru. Ea yuikawe”, atu wadi.

⁹ Naskata na diaiwu coperopa José yuidi: “Ewẽ dabapa ẽ uĩya na ẽ wesuakiri iwi wibiya awẽ ade uva ẽ uĩya

¹⁰ texpaya tres ika. Naskata charuta naskatari wibiyawu uva ika.

¹¹ Faraónpa awẽ kechu ẽ tsuba ika. Awẽ kechuki ẽ uvawu tsidia faraónpa ayanu”, wadi.

¹² Josépa yuidi: “Naa texpaya tres naa tres peda.

¹³ Ma tres peda ikadu faraónpa bia yudubaxiwi na mi yudupaudi adu. Awiana mi coperowawe mi atũ diaiwu iwaidaka.

¹⁴ Na ẽ bia yuiya ma sharadu diaiwu faraón ea yuixuxiwe ea ubisbanu ea tsekanu.

¹⁵ Hebreo bai adua ea udediwu. Ẽ cárcel mera itiruba etsi awa chakawaax”, Josépa atu wadi.

¹⁶ Panadero diaiwawe Josépa yuisharayaitu dikaxu naaturi awẽ daba yuidi: “Ewẽ dabapa ẽ uĩya ewẽ bapu mamakaya tres shiwati pan wuspia ika.

¹⁷ Shiwati reketada pan wetsa keskarawu shara ika diaiwu faraónna. Naskata shiwati reke adua ewẽ bapu adua peiyawawe pan piawu. Piyaiwawe ẽ uĩya”, panaderopa wadi.

¹⁸ Josépa kebadi: “Naa tres shiwati naa tres peda.

¹⁹ Ma tres peda ikadu faraón iwiki bia atu tedexbaxiwi. Bia xetewawe piixikadi”, Josépa wadi.

²⁰ Ma tres peda ikadu na kaĩdi awẽ wari ikaidu faraónpa awẽ yudubiswu kedabadi fiesta waaxikĩ. Yura ichapawawe uĩyaiwudu panadero atũ diaiwuya copero atũ diaiwu cárcel meradua faraónpa atu tsekadi.

²¹ Copero awiana yudubadi na yudupaudi adu awiana yudunu faraónpa awẽ copa inanu.

²² Naskaweke panadero atũ diaiwu faraónpa atu retebadi. Na Josépa yuita keskawadiwu.

²³ Naskax copero atũ diaiwu José shinabakidi.