Génesis 4 - Yura porciones de la biblia

Caínwe Abel

¹ Dukuwede Adán awĩ Evawe idi. Evapa ma wake dadea idi. Naskata werunawake kaĩdi. Awẽ ade Caín idi. “Ea Epa Diospa wake ina”, Eva idi.

² Chipu Abel kaĩdi. Caínpa udiwetsa Abel oveja kexebis ipaudi. Caínri wai yudubis ipaudi.

³ Peda wetsa Caínpa awẽ wai adua yudu wudi Epa Dios inaxikĩ.

⁴ Abelpari oveja wake na kaĩ taeyabea xuakuiya wudi Dios inaxikĩ. Abel Diospa idibaxudi.

⁵ Abel akai keskawadiba Epa Diospa Caín awẽ yuduwuki idibaxudiba. Naskake Caín sidakui wechupidi.

⁶ Epa Diospa Caín ñukadi: “Aweskai mi sidai mi wechupime.

⁷ Mi shara akaitu ẽ bia axusharatiru. Mi chakaitu chakapa bia winui. Askataba mi chaka winutiru”, Epa Diospa wadi.

⁸ Wetsatiã udu nu uĩkanuwe Caínpa udiwetsa wadi. Narixu kushata udiwetsa retedi.

⁹ Epa Diospa Caín ñukadi: “Wani mewẽ extu Abelme”, Diospa Caín wadi. Caínpa kebadi: “Ẽ tapiaba. Ẽ kexeaba”, Caínpa wadi.

¹⁰ Diospa yuidi: “Aweskawakĩ mi iskawaame. Ma ẽ tapia mewẽ extu mi retea. Bai aduxu mewẽ extu awẽ imi ea ñuka awa chakawaba. Naskake ẽ axui.

¹¹ Naskake mi chakakui iki ana da bai adu mi ikiba. Mewẽ extu mi retea ẽ bia bai wetsadu putai.

¹² Ma mi wai wawiadu yuduwu bia kaĩxudakaba. Naskax kawa kawakakaĩkĩ mi tedepakedakaba”, Epa Diospa Caín wadi.

¹³ Naskake Caínpa Dios kebadi: “Mia ea chakawai keskara ẽ tedetiruba.

¹⁴ Datiã ma mia putai da bai aduxu. Ẽ biki udekawakakaĩdi ẽ kawasapakedaka. Watura wetsa ea wichixu ea retexiwi”, Caínpa Dios wadi.

¹⁵ Epa Diospa kebadi: “Wetsã bia reteke siete veces ẽ ubiskuibatiru”, Epa Diospa Caín wadi. Naskata Epa Diospa Caín tutuwadi naatiiwiwai tapikaxu reteyabanuwu.

¹⁶ Naskata Epa Dioswe tsaita Caín bai wetsari kadi nari iki kai awẽ ade Nod na wari uwaikiri Edén adu.

Caínpa awẽ rewuduwu

¹⁷ Caín awĩwe idi. Ma wake dadeyabexakĩ werunawake kaĩdi. Awẽ ade Henoc idi. Naskata Caínpa atiriwiwuweta pexe ichapa wadi. Pexe ichapa adekĩ awẽ wake adekiri adedi.

¹⁸ Henocpa awẽ wake Irad idi. Iradpa awẽ wake Mehujael idi. Mehujaelpa awẽ wake Metusael idi. Metusaelpa awẽ wake Lamec idi.

¹⁹ Lamec awĩ raweya idi. Wetsã awẽ ade Adá idi. Awĩ wetsa Zila idi.

²⁰ Adá wake dadeyabexakĩ werunawake kaĩdi. Awẽ ade Jabal idi. Jabalpa yuina wichi tapas wakĩ taewadi. Naaturiwi yuina idawakĩ taewadi.

²¹ Jabalpa awẽ extu Jubal idi. Jubalpa guitarra keskara awẽ ade arpa akĩ taewadi xaĩti keubakĩ taewadi.

²² Silápariwi wake adi. Awẽ ade Tubal-caín idi. Bronce udiwata hierrori naa ruwe kerexwawe awara wetsa keskarawu Tubal-caínpa udiwapaudi. Aũ yudutiruwu udiwapaudi. Naatu awẽ pui Naamá idi.

²³ Peda wetsa Lamecpa awĩ rawe yuidi awẽ awĩ rawe atũ adewu Adáwe Zila. “Ẽ batu yuiyaitu. Ea dikasharakawe. Dukuwede ea tseweawake ẽ retea. Pexkupari ea kushake.

²⁴ Epa Dios yuiya Caín watura wetsa reteke siete veces ubiskuitiru. Watura wetsã ea reteke setenta y siete veces ubiskuitiru”, Lamecpa atu wadi.

Adánweta Evapa atũ wake Set

²⁵ Adán awiana Evawe idi. Naskayabexakĩ werunawake kaĩdi. Evapa awẽ wake adekĩ Set, wadi. Duduri yuikĩ: “Caínpa Abel retedi. Awẽ naskake Diospa ea wake ina. Naskake ẽ adei awẽ ade Set”, Eva idi.

²⁶ Naskadiadu Setpari wake adi. Werunawake idi. Awẽ ade Enós idi. Naskaxu yurawawe Epa Dios awẽ adeuxũ kiwĩkĩ taewadiwu.