Génesis 39 - Yura porciones de la biblia

Joséwe Potifarpa awĩ

¹ Ismaelitawawe José iyuawudu Egipto adu ikatu dukuwede awẽ ade Potifarpa José peiuxũ widi. Egipto adu diaiwukui faraón idi. Naatu Potifar diaiwuwaa soldadowawe atũ diaiwu.

² Diospa José kexesharapaudi. Awẽ diaiwu Egipto adua idi awẽ pexe adu ike Diospa axusharapaudi awẽ diaiwu yudusharaxunu.

³ Diospa José axuwaitu awẽ diaiwawe José unadi Diospa axusharapaudi sharata inu.

⁴ Naskake José awẽ diaiwu idibabapaudi. Naskata Potifar aki chipu diapaudi awẽ awarawumai kexexuwaitu.

⁵ Potifarpa José awarawu kexebaidu Joséuxũ Diospa Potifar Egipto bai adu ika sharawapaudi awẽ pexe adu awẽ wai aduri.

⁶ Potifarpa awẽ awarawu Josépa kexexupaudi. Naskake ana shinachakapaudiba. Pikĩ wisti shinapaudi. José wesu sharaya ipaudi kayakawikui.

⁷ Naskata peda wetsa awẽ diaiwũ awĩni uĩyana yuidi iskawadi: “Ewe iwe”, wadi.

⁸ José awe ikaspakĩ kebadi: “Ewẽ diaiwu iki chipu dia. Awẽ awarawu ẽ kexexuke ana awa shinachakaiba.

⁹ Matu pexe aduxu ea tsuã winuaba. Ewẽ diaiwawe ea awa wishkuaba. Mi awẽ awĩ. Aweskai ẽ chakatirume Epa Dioskiriwi”, Josépa wadi.

¹⁰ Na pedatiiwi: “Ewe iwe”, wawiyaitu Josépa tadapaudiba.

¹¹ Naskata wetsatiã Josépa awẽ diaiwawe pexe adu yudui kai kadi. Adu tsuabadu nadu Potifarpa awĩ wisti idi.

¹² Naatu José awẽ sawetini achita: “Ewe iwe”, wadi. Awẽ saweti achinadu aki edewaĩdi José pexe aduax ichudi.

¹³ José awẽ saweti tsubax Potifarpa awẽ awĩ

¹⁴ tsai ewapatu kedainakawa atu kedadi wene awẽ uibatiwu: “Ewẽ wene hebreo eweita dukuki kaxepai. Ewẽ pexe adu ikikaita ewe ipaiyaitu tsai ewapatu ẽ kedainakawada.

¹⁵ Ẽ wasĩ kedayaitu dikakĩ awẽ saweti putawaĩda ichukĩ”, Potifarpa awẽ awĩni atu wadi.

¹⁶ Naskata Josépa awẽ saweti wadi wede dasuxu uĩyunu.

¹⁷ Naskata wede dukuwaitu yuidi: “Hebreo mia duku ewexuita kede mera ikikaita ea achita ewe ipaiya. Eũ duitaba iki kaxepaiya.

¹⁸ Ẽ wasĩ kedayaitu dikai ichukĩ awẽ saweti iki putawaĩda”, wede wadi.

¹⁹ Awĩni naduri yuiyaitu dikai Josépa awẽ diaiwu sidakuidi.

²⁰ Naskaxu atu yuidi José achinuwu. Naskata faraón awẽ cárcel mera yurawu ikawu mera José nichidi.

²¹ Diaiwu Diospa awẽ shina shara José uĩbaidu cárcel mera ikawawe atũ diaiwawe sharawapaudi.

²² Naskakata cárcel mera atũ diaiwawe José diaiwuwadi cárcel meraduawu atu kexeta atu yuinu awara anuwu.

²³ Cárcel mera atũ diaiwawe ana shinachakadiba Josépamai naatiiwi kexeke. Dios Joséwe ipaudi. Naskake na akai sharakui ixupaudi.