Génesis 38 - Yura porciones de la biblia

Judáwe Tamar

¹ Naatiã Judá udiwetsawuki paxkadi. Dukuwene awẽ ade Hirá awẽ pexe adu iki kai kadi. Naa dukuwede Adulam adua idi.

² Narixu Canaán ikatu awẽ wake wichidi. Awẽ ade Súa idi nawe wianadi.

³ Judáweta Súa wake adiwu atũ wakẽ ade Er wadiwu.

⁴ Awiana wake wetsa dadedi. Awẽ ade Onán idi.

⁵ Judápa awiana wake wetsari adi. Awẽ ade Selá idi. Apa Judá Quezib iyuadu Selá kaĩdi.

⁶ Judápa awẽ wake iyua Er awĩwu wichixudi awẽ ade Tamar.

⁷ Judápa awẽ wake iyua Er chakayaitu uĩkĩ Diaiwu Diospa duidiba. Naskaitu Er dabadi.

⁸ Naskata Judápa awẽ wake chipuke yuidi Onán yuidi: “Mewẽ uchĩ awẽ awĩ ibis nawe wianawe na nu ibis weduyabanu mi uduax mewẽ uchĩ awẽ kaiwuu uduax ichapanawã kaipakexanuwu”, Judápa awẽ wake Onán wadi.

⁹ Naduri apã yuiyaitu dikakĩ Onánpa tapidi Tamarweta wake aka awena iixiwaituba. Naskake iyubawawe awe ikĩ awẽ uku aki badetaba xawakawi badepaudi wake dadeyabanu naa uduax awẽ uchĩ kaiwuu uduax ichapanawã kaipakexanuwu inuwuba.

¹⁰ Diospa Onán chakayaitu uĩkĩ duidiba naariwi dabadi.

¹¹ Naskata Judápa were raweta wibiswu Tamar yuidi: “Mewẽ epã pexe adu kayutawe. Na wedeyaba keskara iwe. Ewẽ wake Selá yusiyuaidu awe wiananupukuki”, Judápa Tamar wadi. Naskata Judápa shinadi: “Ewẽ wake Selá udiwetsa rawe ika keskai datiru”, raixu. Judápa yuiyaidu Tamar apã pexe adu kadi.

¹² Awetiira peda ma ikadu Judápa awĩ dadi. Naa Súapa awẽ wake idi. Awĩ daita shinabakita Judá pexe ichapa awẽ ade Timnat adu kadi naduxu oveja radi xateaiwudu. Hirá awe rawebis awe kadi.

¹³ Judá Timnat kaaxikĩ awẽ oveja radi xateaitu Tamarpa dikadi.

¹⁴ Naa dikakĩ awẽ saweti wisu pekadi. Naskata telapa awẽ wemana wepudi tsuã unayabanu. Naskatari pexe ichapa Enaim kaĩti adu tsaudi Timnat wai tapiadu. Tamar naskadi ma tapixu Selá ma yusike naskaweke Judápa awẽ wakewe wianawabayabaitu.

¹⁵ Judápa uĩkĩ da awĩwu ikabis raixu Judápa shinadi awẽ wemana wepuke.

¹⁶ Judápa Tamar ñukai kai kadi. Wawawa wabis tapitaba ñukadi: “Ẽ bewe itirubame”, Judápa kebadi. Tamarpa yuidi: “Ewe ixu awa mia inatirume”, wadi.

¹⁷ Naskaitu Judápa kebadi: “Ewẽ yuinawu adua cabrito wisti ẽ bia wubaikai”, wadi. Tamarpa yuidi: “Naskaweke mewẽ awara wetsa ea waxuwaĩtawe ẽ bia ikũira wanu”, wadi.

¹⁸ “Awa mi duime ẽ bia waxuwaĩtanu”, Judápa wadi. Tamarpa yuidi: “Mewẽ sello dishiya ea inawe mewẽ pukitiri”, wadi. Naskawaitu Judápa inata nawe idi. Wake dadebadi.

¹⁹ Chipu Tamar kata aũ wepua pekata awẽ saweti wisu awiana sawedi.

²⁰ Naa pedata awe rawebisya adulamita cabrito Judápa Tamar wubadi na wawerãita sello dishiya wixuta pukiti wixutanu. Oveja keskara inapaikakĩ uĩya ana adu idiba.

²¹ Adulamitapa atu ñukadi: “Wani awĩwu ikabisme Enaim adu ika da wai keseme tsaubis”, atu wadi. Dukuwedewawe yuidiwu: “Dudu awĩwu ikabisba”, wadiwu.

²² Awe rawebistu dasuxu Judá yuidi: “Awĩwu aduba ẽ wichiaba. Naskatari dukuwedewawe: ‘Dudu awĩwu ikabisba’, ea waawu”.

²³ Judápa kebadi: “Naskanuwe ewẽ awaraya naya inu dukuki yurawu kaxeyabanuwu. Naatiiwixu tapinuwu cabrito ẽ wuba mi wichiaba”, wadi.

²⁴ Rawenu wisti ma uxe ikadu dukuwedewawe Judá yui wekadi wediwu: “Mewẽ wawawa awẽ ade Tamar ma wake dadea dukuwedewuwe iki”, wadiwu. Ui ewapatu atu yuidi: “Tsekakawe. Kuwakawe”, Judápa atu wadi.

²⁵ Ma tsekayaiwudu awẽ wawawa ibis tsai wubadi: “Da sello dishiya pukitiri iwawe ea wake dadebaita. Na sello dishiya pukitiri tsuanamaiki unakawe”, atu wadi.

²⁶ Awẽ sello dishiya unata awẽ pukiti unai iskadi: “Tamar sharayaidu ẽ chaka ewẽ wake Seláwe ẽ wianawakeraita. Naskata ana ẽ awe idakaba”, Judá idi.

²⁷ Ma aki uxe ikadu Tamar wake rawe kaĩdi.

²⁸ Na kaĩ taeatu awẽ meke tsekadi wake wibistu yume ushima dexadi. “Da kaĩ taea”, wadi.

²⁹ Naskayaidu awẽ biwi ikibawaĩdaidu wetsa tsekekerãdi awẽ udiwetsa iyua kaĩ taea. Wake wibistu yuidi: “Aweskax tsekekeradame”, wadi. Naskake awẽ ade Fares, wadi. “Naatu wepexukĩ taea”, wadi.

³⁰ Na wetsa kaĩyadu naa yume ushima dexea kaĩdi. Naa adedi Zérah, wadi.