Génesis 37 - Yura porciones de la biblia

Josépa dabadi

¹ Canaán bai adu Jacob iyupaudi apa ipaudi adu.

² Jacob awẽ kaiwuuwe ipaudiwu. José diecisiete wariyaxu udiwetsawuweta ovejawu kexepaudi. Nawuwawe José chakawaiwawe Josépa apa Jacob yuipaudi. Zilpá awẽ wakewu Bilhápa awẽ wakewuri nawu Jacobpa wakewu ipaudiwu.

³ Jacobpa awẽ ade wetsa Israel. José duikuipaudi atiri awẽ wakewu duiwikĩ atu askakai wapaudiba adiwuxumai José adixakĩ. Naskake saweti raũya shara atu abadi José inaxikĩ.

⁴ Jacobpa José duiyaitu udiwetsawawe tapikaxu duikaspakata uĩkaspapaudiwu.

⁵ Wetsatiã Josépa dabaxu udiwetsawu yuidi. Naskaweke nawawe duikaspakuipaudiwu.

⁶ Atu yuidi: “Ea dikakawe ewẽ daba ẽ batu yuiyaitu.

⁷ Wai babakixu naatiiwixu trigo nu pishtanea. Naskayaidu ewena kushikui widinakawata kayakawikui dia ika. Batunawu kakuwawaĩda ika ewẽ trigo pishtanabea na diaiwũ atiruwu keskawaawu”, Josépa atu wadi.

⁸ Naduri atu yuiyaitu dikakakĩ iyua ranawai kebadiwu: “Mewẽ daba mia duku yuiyai mi nuku diaiwu iixiwi mi duku yuduxime”, wadiwu. Awẽ dabari dikakaspanadiwu atu yuiyaitu.

⁹ José awiana dabaxu awẽ uchi rana atu yuidi: “Wari uxe once exteweru ikaidu ikiri wesuxu na diaiwu atiru keska ea waawu”, atu wadi.

¹⁰ Josépa awẽ udiwetsawu atu yuita apa yuiyaitu apã José kebadi: “Awameti na mi dabawaa. Mewẽ ewanu mewẽ uchiwu nu bia baikiri wepexupakekawãxime”, apã José wadi.

¹¹ Naskata apã duiyaitu udiwetsawawe ma duikaspatiawu idi. Apã awẽ wake daba tapikuipaidi.

José awẽ uchiwawe peiuxũ atu inadiwu

¹² Peda wetsa José awẽ uchiwu Siquem chaiba wudiwu. Atũ apã awẽ ovejawu iyudiwu wasi wedaxu atu pibai wukadi.

¹³ Jacobpa awẽ ade wetsa Israel awẽ wake José yuidi: “Mewẽ uchiwawe oveja kexekadi Siquem chaibakixu. Atu uĩtawe”, wadi. Josépa kebadi: “Iya. Ẽ katanuwe”, idi.

¹⁴ Israelpa yuidi: “Mewẽ uchi rana uĩta ovejawuri atu uĩtawe aweskakadimaiki ea yuiyuxikĩ”, apã wadi. Hebrón bachi aduax kaax Siquem adu dukudi.

¹⁵ Josépa awẽ uchiwu atu wedai wedudi. Dukuwene wichixu ñukadi: “Tsuawu mi wedaime”, wadi.

¹⁶ Josépa kebadi: “Ewẽ uchi rana atu ẽ wedai. Wanixu ewẽ uchiwawe oveja kexekadime ea mia yuitirumame”, wadi.

¹⁷ Naa dukuwene kebadi: “ ‘Dotán adu nu wunukawe’, iwaĩkadi duduax ma wuawu”, dukuwene wadi. Naskata José atu wedawui kai Dotán adu atuki dukudi.

¹⁸ José chaikiduax uwaitu wichikaxu retepaixikakĩ shinakata yuinadiwu.

¹⁹ Awẽ uchiwu yuinanadiwu: “Uĩkapu dababis ui.

²⁰ Nu retenukawe. Ma retexu kidi wetsa mera nu putanu: ‘Ma basharunu pia’, nu wanu. Na dabaita ikũmaiki”, wadiwu.

²¹ Naskaiwawe dikakĩ Rubénpa udiwetsawu tibabapaidi: “Nu reteyabanukawe.

²² Aweskawakĩ ma retepaime. Aweskawataba kidi mera putakawe”, atu wadi. Rubén awẽ extu uduax rawanaipaidi.

²³ José udiwetsawuki ma atuki dukuadu awẽ saweti raũya sawea wiãdiwu.

²⁴ Achikaxu kidi betu adu putadiwu.

²⁵ Naskakata piixikakĩ tsaudiwu. Naskayaiwudu ismaelitawu Galaad adu ikawu weaiwawe atu wichidiwu. Atũ camellowu adu awarawu wui wukadi ini shara Egipto adu peiuxũ atu inai wukadi.

²⁶ Naskata Judápa udiwetsawu atu yuidi: “Nuku extu retexu nu awa witiruba nu reteauxũ. Dake nu wumapaitiru.

²⁷ Nu reteiba ismaelitawu peiuxũ nu atu inanukawe. Nuku extuki”, Judá idi. Naatiiwi “Ikũ”, idiwu.

²⁸ Ma weawudu bai kidi meradua José tsekakata peiuxũ atu inadiwu. Nauxũ veinte pei sapa widiwu. Naskakata ismaelitawawe José Egipto bai adu iyudiwu.

²⁹ Rubén dasukĩ uĩya bai kidi mera ana adu José idiba. Naskata siaiyana awẽ saweti waxtedi shinabetsakĩ.

³⁰ Rubén dasuta udiwetsa atu yuidi: “José ana aduba. Nuku epa nu awa akikaime”, atu wadi.

³¹ Cabrito retekata José awẽ saweti chaidipa ibinaswadiwu.

³² Naskata Josépa saweti Jacob wuxudiwu. Naskata yuidiwu: “Da saweti nu wichia nu shina mewẽ wakenaraiki”, wadiwu.

³³ Jacobpa awẽ wakẽ saweti unanadi. Naskax shinabetsakuiyana: “Yuina puwẽ wetsã ewẽ wake ea piã”, Jacob idi.

³⁴ Naskata Jacobpa awẽ saweti shara waxteta saweti chakashta sawedi. Na pedatiiwi awẽ wake shinai shinabetsata badubetsapaudi.

³⁵ Awẽ wake awĩwuwawe dukuwedewaweri siaiyabanu shinabapaiwiaiwawe atu dikataba siaipaudi. Na ẽ daitiã ẽ shinabetsaxiwiba Jacobpa awẽ wakewu atu wapaudi.

³⁶ Ismaelitawu adu ikawu Egipto dukukata José Potifar peiuxũ inadiwu. Nadu faraón diaiwukui idi. Naatu Potifar diaiwuwaa soldadowawe atũ diaiwu Potifar idi.