Génesis 36 - Yura porciones de la biblia

Esaúpa awẽ wedawu

¹ Naawu Esaú awẽ wedawu ichapanawã kaĩpakedakawu. Esaú awẽ ade wetsa Edom.

² Esaú bai Canaán awĩwuwe atuwe wianadi. Adá awẽ apa Elón hitita. Oholibamá awẽ awa Aná awẽ chata Sibón heveo.

³ Basemat Ismael awẽ wake Nebaiot awẽ pui naweri wianadi.

⁴ Da wakewu Esaúpa adi. Adáweta Elifaz adi. Basematweta Reuel adi.

⁵ Oholibamáweta Jeús Jaalam Coré. Nawu Esaúpa wake idi bai Canaán adu iyuadu.

⁶ Naskata Esaú bai Canaán aduax kadi. Awẽ extu Jacobki paxkadi bai wetsa adu kadi. Awẽ awĩwu ita awẽ wakewuwe ita awẽ awarawuya kadi.

⁷ Jacobpa awẽ yuinawu ichapa idiwu Esaúnari. Adu wasi ichapaba idi yuinawawe pipana. Naskax adu wisti itiruwuba idi.

⁸ Naskadi Esaú awẽ ade wetsa Edom. Bai bachi Seír adu iki kai kadi.

⁹ Naawu Esaú awẽ kaiwuunuax ichapanawã kaĩpakedakawu. Esaú awẽ wedawu edomitawu. Bai machiwadu Seír adu idiwu.

¹⁰ Awẽ wakewu atũ adewu. Elifaz Adá awẽ wake Esaú awẽ awĩ Reuel Basemat awẽ wake Esaú awẽ awĩ.

¹¹ Elifaz awẽ wakewawe atũ adewu Temán Omar Sefó Gatam Quenaz.

¹² Elifaz awẽ awĩ wetsa awẽ ade Timná. Aki wake adi awẽ ade Amalec. Amalecwawe atũ xidi Adá Esaú awĩ.

¹³ Reuel awẽ wakewawe atũ adewu Náhat Zérah Samá Mizá. Nawu Basemat awẽ wawawu idi. Basemat awẽ wede Esaú idi.

¹⁴ Oholibamá Esaú awĩ wetsari awẽ wakewawe atũ adewu Jeús Jaalam Coré. Oholibamá Aná wake awẽ chata Sibón.

¹⁵ Diaiwuu awẽ wedawu Esaú. Elifaz awẽ wakewu atũ adewu Temán Omar Sefó Quenaz

¹⁶ Coré Gatam Amalec. Nawu diaiwuu Elifaz Edom bai adu ipaudiwu. Nawu Adá awẽ wedawu.

¹⁷ Reuel awẽ wakewu diaiwuwawe atũ adewu Náhat Zérah Samá Mizá. Edom bai idiwu. Nawu Basemat wedawu. Basemat awĩ wetsa Esaú.

¹⁸ Na awĩwu Oholibamá Anápa wake awẽ wede Esaú. Awẽ wakewu diaiwuwawe atũ adewu Jeús Jaalam Coré.

¹⁹ Naatiiwi Esaú awẽ kaiwuunuax ichapanawã kaĩpakedakawu. Esaú ade wetsa Edom. Nawu atũ kaiwuwawe atũ diaiwuu.

²⁰ Seír horeopa awẽ kaiwuu ichapanawã kaĩpakedakawu Edom bai adu ipaudi. Awẽ wakewawe atũ adewu Lotán Sobal Sibón Aná

²¹ Disón Éser Disán. Nawu Seír awẽ raba kaĩyawu ichapakedakawu horeowawe atũ diaiwuu. Nawu Edom bai adu ipaudiwu.

²² Naskadu Lotán wake rawe atũ ade Horí Hemam. Lotán awẽ pui Timná.

²³ Sobal awẽ wakewawe atũ adewu Alván Manáhat Ebal Sefó Onam.

²⁴ Sibón awẽ wake rawe atũ ade Aiáwe Aná. Naa Anápa ares ede bai meradua tsekea awetiira wichidi tsua ikabadua apa awẽ yuina awẽ ade asno kexexukĩ.

²⁵ Naa Aná wake raweya werunawake awẽ ade Disón wetsa awĩwu awẽ ade Oholibamá idi.

²⁶ Disón awẽ wakewu atũ adewu Hemdán Esbán Itrán Querán.

²⁷ Éser awẽ wakewu atũ adewu Bilhán Zaaván Acán.

²⁸ Disán awẽ wakewu atũ adewu Uz Arán.

²⁹ Horeowawe atũ diaiwuu atũ adewu Lotán Sobal Sibón Aná

³⁰ Disón Éser Disán. Nawu horeowawe atũ diaiwuu Seír bai adua xuku wetsa idi.

Edom adu awẽ diaiwuu

³¹ Israeliwu diaiwu datukuiya iyuwawubadu. Nawu atũ diaiwuu Edom adua ipaudiwu.

³² Beorpa awẽ wake awẽ ade Bela. Naa Edom bai adu atũ diaiwukui ipaudi. Pexe ichapa awẽ ade Dinaba adua.

³³ Bela daadu bai wetsadua awẽ ade Jobab atũ diaiwu idi. Naa Zérahpa awẽ wake idi. Bosrá aduax kaĩdi.

³⁴ Jobab daadu bai wetsadua awẽ ade Husam atu diaiwu idi. Temán aduax kaĩdi.

³⁵ Husam daadu awẽ ade Hadad atũ diaiwu idi awẽ bai adua. Hadad Bedadpa awẽ wake. Naa Bedad awẽ soldadowuwe Madián atũ soldadowu Moab bai adu atu mitudiwu. Atiriwi reteaiwudu atiriwi ichudi. Hadad diaiwuatiã pexe ichapa Avit adu iyudi.

³⁶ Hadad daadu awẽ ade Samlá atũ diaiwu idi awẽ bai adua. Awẽ pexe ichapa awẽ ade Masrecá.

³⁷ Samlá daadu awẽ ade Saúl awẽ bai adua atũ diaiwu idi. Awẽ pexe ichapa awẽ ade Rehobot ede Éufrates ketukunu adu.

³⁸ Saúl daadu wetsa awẽ bai adua atũ diaiwu idi awẽ ade Baal-hanán Acbor awẽ apa.

³⁹ Baal-hanán daadu wetsa awẽ bai adua atũ diaiwu idi awẽ ade Hadad. Awẽ pexe ichapa awẽ ade Pau. Hadad awẽ awĩ Mehetabel. Naatu Matredpa wake awẽ chata Mezaab.

⁴⁰ Nawu Esaú awẽ kaiwuunuax ichapanawã kaĩpakedakawu. Nawu xuku wetsawu idi. Atũ adewu Timná Alvá Jetet

⁴¹ Oholibamá Elá Pinón

⁴² Quenaz Temán Mibsar

⁴³ Magdiel Iram. Esaúriwi awẽ ade wetsa Edom. Nadua ikawawe edomwu atũ diaiwuu ipaudiwu.