Génesis 32 - Yura porciones de la biblia

Jacobpa tsai Esaú wubadi

¹ Jacob ma kaidu Diospa awẽ ángelwu aki dukudiwu.

² Jacobpa nawu uĩ iskadi: “Da Diospa awẽ tapas rawe. Naskake dudu awẽ ade Mahanaim iki”, wadi.

³ Jacobpa tsai yuibiswu atu nichidi awẽ uchi Esaú bai awẽ ade Seír Edom aduke.

⁴ Naskata duduri atu yuidi yuitanuwu: “Ewẽ diaiwu Esaú. ‘Mewẽ uibati Jacobpa duku nichia nu bia yuiyua na Labánwe itiadi’, ea waxutakawe.

⁵ ‘Naskatari vacawuya asnowuyari ovejawuyari. Dukuwedewu awẽ yudubiswu awĩwuri. Ewẽ diaiwũ da tsai ẽ bia wubai ea mi sharawanu’ ”, Jacobpa atu wadi.

⁶ Tsai yuibiswu dasukaxu Jacob yuidiwu: “Esaúki ma nu dukutadi. Ma biki duku yui. Cuatrocientos dukuwedewuya ui”, wadiwu.

⁷ Naa dikai Jacob ratekuidi. Naskatari shinachakadi. Naskaxu nawe ikawu yurawu xuku rawe atu wadi. Naskatari idawuri paxkanawadi.

⁸ Duduri shinadi Esaú dukuxu xuku wetsa atu reteaiwawe atiriwi ichutanuwu raixu.

⁹ Naskaxu Jacobpa kiwĩdi: “Diaiwu Dios ewẽ xuta Abrahampa awẽ Dios mi ewẽ epa Isaacnari ea mia yuidi ewẽ kaiwuuwe ewẽ bai adu ẽ dasunupukunu: ‘Ẽ bia sharawanupukui’, mia wadi.

¹⁰ Ẽ mewẽ uibati. Ẽ awaba. Naskaweke mia ea sharawaitu ẽ tapiaba. Ede Jordán pukewuwãdi ẽ awaya kawadiba. Ẽ chati wistiya kawadi. Datiã ẽ yura xuku raweya.

¹¹ Ea kexewe ewẽ uchi Esaúpa ea reteyabanu. Ẽ ratei duku retei weaiwawe. Awĩwu retekata wakewuri retei wekadi.

¹² Mia ea yuikuidi: ‘Ẽ bia sharawanupukui’, mia wadi. Naskatari ea mia yuidi: ‘Mewẽ kaiwuu uduax ichapanawã kaĩpakedakawu na enewane bishputii ipaxanu’, ea mia wadi tsuã tanatiruba”, Jacobpa Dios wadi.

¹³ Naskata nadu uxadi. Naduxu yuina idawu katupakedi awẽ uchi Esaú inaxikĩ.

¹⁴ Doscientas cabras awĩwu veinte cabra wedewu doscientas oveja awĩwu veinte oveja wedewu

¹⁵ treinta camellas wakewuya cuarenta vaca awĩwu diez vaca wedewu veinte asno awĩwu diez asno wedewu. Nawu katudi.

¹⁶ Naskata awẽ yudubiswu atu inadi adu wisti wuyabanuwu. Naskata atu yuidi: “Reke wukaxu adu wisti ma ichanakiki”, atu wadi.

¹⁷ Na rewu nichiyai yuidi: “Ewẽ uchi Esaú biki dukuxu bia ñukayaitu: ‘Watu mewẽ diaiwume. Waki mi kaime. Da yuinawu tsuaname’, bia waitu duduri yuitawe:

¹⁸ ‘Nawu mewena mewẽ extu Jacobpa bia inai. Ẽ yuduxubis. Mewẽ uibati chipu ui’, watawe”.

¹⁹ Xuku wisti yuikĩ taewadi. Chipu xuku raweri yuidi. Na yuina iyuwaiwu atu yuidi: “Esaúki dukukaxu na tsai wisti ma yuitiru:

²⁰ ‘Mewẽ yudubis Jacob duku kachiuri ui’, watakawe”. “Na iki sidayai naa ẽ inauxũ iki raenu”, raixu Jacobpa shinadi.

²¹ Naskata awẽ awarawu udiwetsa wubadi. Nadu uxashidi awẽ tapas adu.

Jacobwe ángel beenadiwu

²² Naa yabeta widinakawata Jacobpa awẽ awĩ rawe, awẽ yudubis awĩwu raweri, awẽ wakewu once nawu ede awẽ ade Jaboc ukiri atu pukebadi.

²³ Naskata ma ukiri pukekata atũ awarawuya.

²⁴ Nadu ares wisti netedi naa yabe chai dukuwedewe beenashiyaiwudu pedadi.

²⁵ Kupiyabatiruxakĩ chipaki Jacob kushadu awẽ chipa xau xuxatadi. Naa kushadu paedi Jacobpa edenu.

²⁶ Ángelpa iskawadi: “Ea edewe ma pedaki”, wadi. Naskaweke: “Mia tsai shara inayabaitu ẽ bia edeiba”, Jacobpa wadi.

²⁷ Ángelpa Jacob awẽ ade ñukadi: “Mewẽ ade awame”, wadi. Jacobpa yuidi: “Ewẽ ade Jacob”, wadi.

²⁸ Naskata ángelpa yuidi: “Ana mewẽ ade Jacob ikiba. Mewẽ ade Israel iki. Dioswe mi beena. Dukuwedewuwe mi beena. Mi kupitibawaa. Naskake mi Israel iki”, ángelpa wadi.

²⁹ Jacobpa awẽ ade ñukadi: “Mewẽ aderi ea yuiwe”, Jacobpa wadi. Ángelpa Jacob kebadi: “Aweskakĩ ewẽ ade mi ñukakabeime”. Naskata ángelpa tsai shara yuidi.

³⁰ Naskake Jacobpa nadu adedi awẽ ade Penuel, wadi. “Duduax ma ẽ Dioswe uĩnana ẽ dayuaba”, Jacob idi.

³¹ Ma wari uwaidu Penuel aduax Jacob kadi awẽ kateki paeyana.

³² Naskake israeliwawe chipa pudu dabi pipaudiwuba. Iskaratiãri pitiruwuba Jacobpa awẽ chipa adu ángelpa kushadike.