Génesis 31 - Yura porciones de la biblia

Jacobpa shinadi kaaxikĩ

¹ Labánpa wakewawe Jacob yuitiwadiwu: “Nuku epa uduax Jacob awarawuya”, wadiwu. Naa Jacobpa tapidi.

² Labánpa ana sharawayabaitu tapidi.

³ Naskake Diospa Jacob yuidi: “Mewẽ epa ikadu dasuwe mewẽ kaiwuu aduri. Na mi kai ari ẽ bewe kai”, wadi.

⁴ Jacobpa Raquel kedabadi Líari. Na oveja kexeadu ma weawuadu.

⁵ Jacobpa atu yuidi: “Matu epa ana ea apaudi keskawaiba. Naskaweke ea Diospa kexebis atu wadi.

⁶ Batu raweta ma tapia. Matu epa ẽ yuduxubis. Awara ẽ axui ẽ xadibisba.

⁷ Naskatari Labánpa ea paratiadi. Pei ea wetsa wetsawatiadi. Ewẽ Diospa ea chaka xitixubis.

⁸ Askataba naatu yuibis: ‘Oveja turuya ẽ bia inanu naa mi yudubisuxũ naa ovejapa awẽ wake raũya ibis. Naatu shinakĩ na yuina raũya nawu mewẽ pei iki ea wabis. Naatiiwi yuinawu atũ wake raũyawu ikita’, Jacobpa atu wadi.

⁹ Diospa yuinawu matu epa wiãta ea ina.

¹⁰ Wetsatiã yuinawu ibiyaiwawe ẽ dabayabea. Dabapa uĩya oveja raũyawu tutuyawu usiyawuri chutanaiwawe.

¹¹ Ewẽ dabapa Diospa awẽ ángelpa ea kedadi: ‘Jacob’, ea waitu: ‘Ẽ dudu’, ẽ wadi.

¹² Naskata ángelpa ea yuiyabea: ‘Uĩkuiwe naatiiwi cabra wedewu raũyawu kedeyawu tutuyawuri cabra awĩwu chutanaiwawe. Naskata awẽ wakewu mewena itiru. Mewẽ kuka Labánpa bia paraitu ma ẽ uĩya. Naskake ẽ bia sharawai.

¹³ Ẽ Dios Betel adu biki dukudi. Ruweki tekesebeshida widiniwuwata mi xidi aki nachiyabea ea mi parabisba. Na mi kaĩdi Canaán adu katawe’, ea ángelpa waita”, Jacobpa atu wadi.

¹⁴ Naskata Raquelweta Líapa kebadiwu: “Ana nu awayaba nuku epã pexe adu.

¹⁵ Awẽ wake keskara ana duku waiba. Naskataba duku yura wetsa atiru keskara duku wai. Dukuri bidibetsayabea bia yudubabis duku bia wibaxiki.

¹⁶ Nuku epa awẽ awara sharawu Dios wiãita nukuna nuku wakewunari. Naskake na Dios bia yuiyabea keskawe”, Raquelweta Líapa wadiwu.

¹⁷ Naskata Jacob itipinidi awẽ awĩ rawenu awẽ wakewuya atu camello mamakaya atu tsaũdi.

¹⁸ Naskata Padán-aram aduxu awarawu wibixakĩ nawuya kadi Canaán adu awẽ apa Isaac ipaudi adu.

¹⁹ Labánpa oveja radi wakira kaxu xateyuikadu Raquelpa apã awi awara udiwaxu ikũira waa awẽ pexe adua unedi.

²⁰ Jacobpa naskaxu Labán arameo paradi yuitaba kadi.

²¹ Kushi awẽ awarawuya ede Éufrates pukewaĩdi bachi awẽ ade Galaad adu kadi.

²² Ma peda tres ma ikadu Labán yuidiwu Jacob kaitake.

²³ Naskata Labánpa awẽ yurawu atu ichanawadi Jacob beewaĩxikĩ. Domingo wisti awaĩdi kai puchini bachi Galaad adu aki dukudi.

²⁴ Naa yabeta Labán arameo Epa Dios dababakĩ iskawadi: “Mi Jacob retetiwakiki”, wadi.

²⁵ Ma domingo wisti ikadu Labán Jacobki dukudi bachiwu awẽ ade Galaad. Nadu yuina wichi Jacobpa tapasdi. Labánpari nadu yuina wichi tapasdi awẽ kaiwuuweta.

²⁶ Naduxu Labánpa Jacob askawadi: “Aweskai mi iskaitame. Aweskakĩ mia paraitame. Ewẽ wake rawe na unewerãdai keskara mia waita.

²⁷ Ea yuitaba mi ichuita. Mia yuiwerãdaidu idibayana música tamborpa arpaneriwi nu bia buduxukeraita.

²⁸ Miakai ewẽ wake rawenu ewẽ chata rawe mi tabuki tsu abawerãitaba. Na mi tatiba keskarakui.

²⁹ Ẽ bitsisipaya bia chakawanu. Naskaweke ewẽ dabapa mewẽ epa awẽ Diospa ea yuiya ẽ bia aweskawayabanu. ‘Mi Jacob retetiwakiki’, ea waita.

³⁰ Ma ẽ tapia mewẽ epã pexe adu mi dasukuipai. Naskaweke aweskakĩ ẽ udiwaxu ikũira wabiswu mia weaitame”.

³¹ Jacobpa Labán kebadi: “Ẽ shinachakaita ea seteyana mewẽ wake rawe ea mia netewatiru raikax.

³² Na biwĩ udiwaxu mi ikũira waa yura wetsã bia wiãke wichixu naa dai. Da yurawawe uĩyaiwudu wedawe ẽ bia awa weaitamaiki. Na mewenawu wutawe”. Naskaweke Jacobpa tapidiba Raquelpa Labánpa awi udiwaxu ikũira waa wiãitake.

³³ Naskata Jacobpa yuina wichi tapas adu Labán ikikaĩdi wedai kai. Naskatari Jacobweta yudubis rawe atũ yuina wichi tapas mera wedadi. Líapa awẽ yuina wichi tapas meraduax tseketa Raquelna merari ikidi.

³⁴ Raquelpa wita camello tsauti wiata awẽ yuina wichi tapas mera ikikaita Labánpa awara udiwaxu ikũira wabis tsauti nunamari wata aki tsaudi. Labánpa wedawikĩ wichidiba.

³⁵ Naskata Raquelpa apa yuidi: “Epa sidapaiyabawe. Ẽ widitiruba ẽ ibi”. Na awi udiwaxu ikũira wabis wedawikĩ wichidiba.

³⁶ Jacobpa Labán sidakĩ askawadi: “Ẽ awa chaka waitame. Aweskakĩ mia chiruwerãitame.

³⁷ Ewẽ awarawu ma mia wedawikĩ adua mewẽ awa mi wichiaba. Nuku kaiwuwawe uĩnuwu xawakawi tsekawe nawawe duku yuinuwu.

³⁸ Veinte wari ẽ beweta yudubis mewẽ ovejane wake wisti kaĩ dabisba. Naskatari mewẽ oveja kede meradua ẽ bia piãbisba.

³⁹ Basharunu reteweke ẽ bia pei inabis. Naskatari yabeta iyabai pedata mewẽ yuinawu bia weduxuke mia ea pei ñukabis.

⁴⁰ Pedata ẽ wari xada beepaudi yabetari batsinapaudi. Ẽ uxa sharapaudiba.

⁴¹ Veinte wari mewẽ pexe adu ẽ ibis. Naskata mewẽ wake raweuxũ catorce wari ẽ bia yuduxubis. Mewẽ yuinauxuri ẽ seis wari yudubis. Ewẽ yuduxu ‘Ẽ bia inanu’, ea mia wawiaxu ea mia inabisba mia wetsa wetsawatiadi.

⁴² Ewẽ xuta Abraham awẽ Dios ewe iyabake naskata ewẽ epa Isaac awẽ Dios yabake awaya ẽ kakeradaba. Naskake ẽ shinachakayaitu Dios ea uĩyaidu mia chakawanuba”, Jacobpa Labán wadi.

Jacobweta Labán shinadiwu

⁴³ Naskata Labánpa Jacob kebadi: “Da awĩwu rawe ewẽ wake rawe da wakewu ewẽ wawawu ovejawuri ewena da mi uĩyaiwu ewenawu. Naskaweke ẽ aweskatiruba.

⁴⁴ Naskake dukuraweta nu shinanu”, Labánpa Jacob wadi.

⁴⁵ Naskata Jacobpa ruwe widiniwuwaxu na naniti keskara dibadi.

⁴⁶ Naskata awẽ kaiwuu atu yuidi: “Ruwe ichawakawe”, atu wadi. Naatiiwixu nadu wisti wuruwadiwu. Naa ruwewu wuruwaduxu pidiwu.

⁴⁷ Nadu Labánpa awẽ tsaima adekĩ Jegar Sadutá, wadi. Jacobpari awẽ tsaima adekĩ Galaad, wadi.

⁴⁸ Naskake Labánpa yuidi: “Da ruwewu wuruidaduxu atu uĩbapakedaka dukuraweta nu shinake”.

⁴⁹ Naskatari Labánpa awẽ tsaima: Mispá, wadi. “Nu uĩnanayabawiyaitu Epa Dios duku kexea. Bia kexeta ea kexea”, Labánpa Jacob wadi.

⁵⁰ Labánpa Jacob yuidi: “Awĩwu wetsa wita askayabai ewẽ wake rawe mi chakawaitu bia tsuã uĩyabawiyaitu Dios wistichi bia uĩxiwi”.

⁵¹ Awiana Labánpa Jacob yuikĩ iskawadi:

⁵² “Da ruwe wuruidaduxu dukuraweta nu shinai mewẽ bai auri ẽ katiruba mirikai ewẽ bai auri ma utiruba nu chakanatiru.

⁵³ Mewẽ xuta Abraham awẽ Dios ewẽ xutari Nahor awẽ Diosnari naatu duku uĩyaidu dukuraweta nu shinai”. Naskata Jacobpa yuikuidi Epa Dios apa Isaacpa ikũira wapaudiuxũ.

⁵⁴ Naskata bachi arixu Jacobpa yuina retexu awẽ kaiwuu kedadi pii wenuwu. Ma pikata nadu uxadiwu.

⁵⁵ Ma uxashita Labán widinakawata awẽ chata rana atu tsu ata awẽ wake rawe tsu adi. Atu yuisharata awẽ bai adu dasudi.